ಹೊಸದಿಲ್ಲಿ: ಬಜಾಜ್ ಫೈನಾನ್ಸ್ ತನ್ನ ಸ್ಥಿರ ಠೇವಣಿ (FD) ಮೇಲಿನ ಬಡ್ಡಿದರವನ್ನು ಹೆಚ್ಚಿಸಿದೆ. 12ರಿಂದ 60 ತಿಂಗಳ ಅವಧಿಯ ಎಫ್‌ಡಿಗಳಿಗೆ 15ರಿಂದ 40 ಮೂಲಾಂಕಗಳವರೆಗೆ ಬಡ್ಡಿ ಹೆಚ್ಚಳ ಮಾಡಲಾಗಿದೆ. ಹೊಸ ದರಗಳು 2026ರ ಅಕ್ಟೋಬರ್ 7ರಿಂದ ಜಾರಿಗೆ ಬಂದಿವೆ.
ಈ ಪರಿಷ್ಕೃತ ದರಗಳು ಹೊಸದಾಗಿ ಎಫ್‌ಡಿ ತೆರೆಯುವವರಿಗೆ ಮಾತ್ರವಲ್ಲದೆ, ಹಳೆಯ ಎಫ್‌ಡಿಯನ್ನು ನವೀಕರಿಸುವ ಗ್ರಾಹಕರಿಗೂ ಅನ್ವಯವಾಗುತ್ತವೆ. ₹15,000ರಿಂದ ₹3 ಕೋಟಿವರೆಗಿನ ಠೇವಣಿಗಳಿಗೆ ಈ ದರಗಳು ಅನ್ವಯಿಸುತ್ತವೆ.
ಸಾಮಾನ್ಯ ಗ್ರಾಹಕರಿಗೆ 7.75% ಬಡ್ಡಿ
31ರಿಂದ 60 ತಿಂಗಳ ಅವಧಿಯ ಹೊಸ ಎಫ್‌ಡಿಗೆ ಸಾಮಾನ್ಯ ಗ್ರಾಹಕರಿಗೆ ಗರಿಷ್ಠ ಶೇ.7.75 ಬಡ್ಡಿ ಸಿಗಲಿದೆ. ಈ ಹಿಂದೆ ಇದೇ ಅವಧಿಗೆ ಶೇ.7.40 ಬಡ್ಡಿ ನೀಡಲಾಗುತ್ತಿತ್ತು.
12ರಿಂದ 17 ತಿಂಗಳ ಅವಧಿಗೆ ಬಡ್ಡಿದರ ಶೇ.6.80 ಹಾಗೂ 18ರಿಂದ 30 ತಿಂಗಳ ಅವಧಿಗೆ ಶೇ.7.00 ಇರಲಿದೆ.
ಹಿರಿಯ ನಾಗರಿಕರಿಗೆ 8.15% ಬಡ್ಡಿ
ಹಿರಿಯ ನಾಗರಿಕರಿಗೆ ಸಾಮಾನ್ಯ ಗ್ರಾಹಕರಿಗಿಂತ ಹೆಚ್ಚುವರಿಯಾಗಿ ಶೇ.0.40 ಬಡ್ಡಿ ಸಿಗಲಿದೆ. ಹೀಗಾಗಿ 31ರಿಂದ 60 ತಿಂಗಳ ಅವಧಿಯ ಹೊಸ ಎಫ್‌ಡಿಗೆ ಗರಿಷ್ಠ ಶೇ.8.15 ಬಡ್ಡಿ ಪಡೆಯಬಹುದು.
12ರಿಂದ 17 ತಿಂಗಳ ಎಫ್‌ಡಿಗೆ ಶೇ.7.20 ಮತ್ತು 18ರಿಂದ 30 ತಿಂಗಳ ಅವಧಿಗೆ ಶೇ.7.40 ಬಡ್ಡಿ ಸಿಗಲಿದೆ.
FD ನವೀಕರಣಕ್ಕೆ ಹೆಚ್ಚುವರಿ ಬಡ್ಡಿ
ಹಳೆಯ ಎಫ್‌ಡಿ ಮುಕ್ತಾಯಗೊಂಡ ಬಳಿಕ ಅದನ್ನು ನವೀಕರಿಸುವ ಗ್ರಾಹಕರಿಗೆ ಅನ್ವಯವಾಗುವ ದರದ ಮೇಲೆ ಹೆಚ್ಚುವರಿಯಾಗಿ ಶೇ.0.10 ಬಡ್ಡಿ ನೀಡಲಾಗುತ್ತದೆ.
ಇದರಿಂದ 31ರಿಂದ 60 ತಿಂಗಳ ಎಫ್‌ಡಿ ನವೀಕರಿಸುವ ಸಾಮಾನ್ಯ ಗ್ರಾಹಕರಿಗೆ ಗರಿಷ್ಠ ಶೇ.7.85 ಹಾಗೂ ಹಿರಿಯ ನಾಗರಿಕರಿಗೆ ಶೇ.8.25 ಬಡ್ಡಿ ಸಿಗಲಿದೆ.
ಬಜಾಜ್ ಫೈನಾನ್ಸ್ FD ಬಡ್ಡಿದರ
ಠೇವಣಿ ಅವಧಿ ಸಾಮಾನ್ಯರು – ಹೊಸ FD ಹಿರಿಯರು – ಹೊಸ FD ಸಾಮಾನ್ಯರು – ನವೀಕರಣ ಹಿರಿಯರು – ನವೀಕರಣ
12–17 ತಿಂಗಳು 6.80% 7.20% 6.90% 7.30%
18–30 ತಿಂಗಳು 7.00% 7.40% 7.10% 7.50%
31–60 ತಿಂಗಳು 7.75% 8.15% 7.85% 8.25%
ದೀರ್ಘಾವಧಿ ಹೂಡಿಕೆಗೆ ಒತ್ತು
ಬಜಾಜ್ ಫೈನಾನ್ಸ್‌ನ ಡೆಪಾಸಿಟ್ಸ್ ಮತ್ತು ವೆಲ್ತ್ ಮ್ಯಾನೇಜ್‌ಮೆಂಟ್ ವಿಭಾಗದ ಹಿರಿಯ ಕಾರ್ಯನಿರ್ವಾಹಕ ಉಪಾಧ್ಯಕ್ಷ ಸಚಿನ್ ಸಿಕ್ಕಾ ಮಾತನಾಡಿ, ಸ್ಥಿರ ಆದಾಯ ಬಯಸುವವರಿಗೆ ಎಫ್‌ಡಿ ಪ್ರಮುಖ ಉಳಿತಾಯ ಆಯ್ಕೆಯಾಗಿದೆ ಎಂದು ಹೇಳಿದ್ದಾರೆ.
ದೀರ್ಘಾವಧಿಯ ಎಫ್‌ಡಿಗಳಿಗೆ ಹೆಚ್ಚಿನ ಬಡ್ಡಿ ನೀಡುವ ಮೂಲಕ ಹೂಡಿಕೆದಾರರಿಗೆ ಉತ್ತಮ ಆದಾಯದ ಅವಕಾಶ ಕಲ್ಪಿಸಲಾಗಿದೆ. ಎಎಎ ರೇಟಿಂಗ್ ಹೊಂದಿರುವ ಈ ಎಫ್‌ಡಿಯನ್ನು ಆನ್‌ಲೈನ್ ಮೂಲಕ ಕೆಲವೇ ನಿಮಿಷಗಳಲ್ಲಿ ತೆರೆಯಬಹುದು ಎಂದು ಅವರು ತಿಳಿಸಿದ್ದಾರೆ.
ನವೀಕರಣ ಮಾಡಿಕೊಳ್ಳುವ ಹಳೆಯ ಗ್ರಾಹಕರಿಗೆ ನೀಡುತ್ತಿರುವ ಹೆಚ್ಚುವರಿ ಶೇ.0.10 ಬಡ್ಡಿ, ಬಜಾಜ್ ಫೈನಾನ್ಸ್‌ನೊಂದಿಗೆ ಮುಂದುವರಿಯುವ ಗ್ರಾಹಕರಿಗೆ ನೀಡುತ್ತಿರುವ ಹೆಚ್ಚುವರಿ ಪ್ರಯೋಜನವಾಗಿದೆ ಎಂದು ಸಿಕ್ಕಾ ಹೇಳಿದ್ದಾರೆ.
