ಚಿಕನ್ ಪ್ರಿಯರಿಗೆ ಒಂದು ಹೊಸ ರುಚಿಯ ಪರಿಚಯ ಇಲ್ಲಿದೆ. ಮಸಾಲೆಯುಕ್ತ ಚಿಕನ್ ಸ್ಟ್ರಿಪ್ಸ್‌ಗಳನ್ನು ನೂಡಲ್ಸ್‌ಗಳಿಂದ ಸುತ್ತಿ, ಗರಿಗರಿಯಾಗಿ ಎಣ್ಣೆಯಲ್ಲಿ ಕರಿದು ತಯಾರಿಸುವ ಈ ‘ಕ್ರಿಸ್ಪಿ ಥ್ರೆಡ್ ಚಿಕನ್’ ನೋಡಲು ಎಷ್ಟು ಆಕರ್ಷಕವೋ, ತಿನ್ನಲು ಅಷ್ಟೇ ರುಚಿಕರ. ಮನೆಗೆ ಅತಿಥಿಗಳು ಬಂದಾಗ ಅಥವಾ ವೀಕೆಂಡ್ ಸಂಜೆಗಳಲ್ಲಿ ಇದನ್ನು ಸುಲಭವಾಗಿ ತಯಾರಿಸಬಹುದು.
ಬೇಕಾಗುವ ಪದಾರ್ಥಗಳು:
- ಬೋನ್‌ಲೆಸ್ ಚಿಕನ್: 500 ಗ್ರಾಂ
- ಕಾರ್ನ್ ಫ್ಲೋರ್ (ಸೋಳದ ಹಿಟ್ಟು): 4-5 ಟೇಬಲ್ ಚಮಚ
- ಮೊಟ್ಟೆ: 1
- ಬೇಯಿಸಿದ ನೂಡಲ್ಸ್: 200 ಗ್ರಾಂ (ನೂಡಲ್ಸ್ ಬದಲಿಗೆ ಸ್ಪ್ರಿಂಗ್ ರೋಲ್ ಶೀಟ್ ಅಥವಾ ಸಮೋಸಾ ಪಟ್ಟಿಯನ್ನು ಸಣ್ಣಗೆ ಉದ್ದವಾಗಿ ಕತ್ತರಿಸಿ ಬಳಸಬಹುದು)
- ಮ್ಯಾರಿನೇಶನ್ ಮಿಶ್ರಣಕ್ಕಾಗಿ: 1 ಟೇಬಲ್ ಚಮಚ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, 1 ಟೀ ಚಮಚ ಕೆಂಪು ಮೆಣಸಿನ ಪುಡಿ, ಅರ್ಧ ಟೀ ಚಮಚ ಕಾಳುಮೆಣಸಿನ ಪುಡಿ, 1 ಟೀ ಚಮಚ ವಿನೆಗರ್, ಅರ್ಧ ಟೀ ಚಮಚ ಸೋಯಾ ಸಾಸ್, 2 ಟೇಬಲ್ ಚಮಚ ಸ್ವೀಟ್ ಚಿಲ್ಲಿ ಅಥವಾ ಟೊಮೆಟೊ ಸಾಸ್, 1 ಟೀ ಚಮಚ ಶೆಜ್ವಾನ್ ಸಾಸ್ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು.
- ಕರಿಯಲು: ಎಣ್ಣೆ
ತಯಾರಿಸುವ ವಿಧಾನ:
1. ಮೊದಲ ಹಂತ (ನೂಡಲ್ಸ್ ಮತ್ತು ಚಿಕನ್ ಸಿದ್ಧತೆ):
- ನೂಡಲ್ಸ್‌ಗಳನ್ನು ಮೆತ್ತಗಾಗುವವರೆಗೆ ಬೇಯಿಸಿ, ನೀರನ್ನು ಸೋಸಿ ತಣ್ಣಗಾಗಲು ಬಿಡಿ. ಒಂದು ವೇಳೆ ನೀವು ಸಮೋಸಾ ಪಟ್ಟಿ ಬಳಸುತ್ತಿದ್ದರೆ, ಅವುಗಳನ್ನು ನೂಡಲ್ಸ್‌ನಂತೆ ಉದ್ದವಾಗಿ ಮತ್ತು ಸಣ್ಣಗೆ ಕತ್ತರಿಸಿಕೊಳ್ಳಿ.
- ಚಿಕನ್ ಅನ್ನು ಮಧ್ಯಮ ಗಾತ್ರದ ಉದ್ದನೆಯ ಪಟ್ಟಿಗಳಾಗಿ (Strips) ಕತ್ತರಿಸಿಕೊಳ್ಳಿ.
2. ಎರಡನೇ ಹಂತ (ಮ್ಯಾರಿನೇಶನ್):
- ಒಂದು ದೊಡ್ಡ ಪಾತ್ರೆಯಲ್ಲಿ ಮ್ಯಾರಿನೇಶನ್‌ಗೆ ನೀಡಲಾದ ಎಲ್ಲ ಸಾಸ್ ಮತ್ತು ಮಸಾಲೆ ಪುಡಿಗಳನ್ನು ಬೆರೆಸಿ. ಇದಕ್ಕೆ ಚಿಕನ್ ತುಂಡುಗಳನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ 2 ಗಂಟೆಗಳ ಕಾಲ ನೆನೆಯಲು ಬಿಡಿ.
3. ಮೂರನೇ ಹಂತ (ಕೋಟಿಂಗ್):
- ಬೇಯಿಸಿದ ನೂಡಲ್ಸ್‌ಗೆ 2 ಟೇಬಲ್ ಚಮಚ ಕಾರ್ನ್ ಫ್ಲೋರ್ ಹಾಕಿ ಮಿಕ್ಸ್ ಮಾಡಿ. ಇದು ನೂಡಲ್ಸ್ ಪರಸ್ಪರ ಅಂಟಿಕೊಳ್ಳದಂತೆ ಮತ್ತು ತೇವಾಂಶವಿಲ್ಲದಂತೆ ನೋಡಿಕೊಳ್ಳುತ್ತದೆ.
- ಚಿಕನ್ ಕರಿಯುವ ಮೊದಲು, ಮ್ಯಾರಿನೇಟ್ ಮಾಡಿದ ಚಿಕನ್‌ಗೆ ಉಳಿದ ಕಾರ್ನ್ ಫ್ಲೋರ್ ಮತ್ತು ಒಂದು ಮೊಟ್ಟೆಯನ್ನು ಸೇರಿಸಿ ಚೆನ್ನಾಗಿ ಕಲಸಿ.
4. ನಾಲ್ಕನೇ ಹಂತ (ಫ್ರೈ ಮಾಡುವುದು):
- ಈಗ ಒಂದೊಂದು ಚಿಕನ್ ಪಟ್ಟಿಯನ್ನು ತೆಗೆದುಕೊಂಡು ಅದರ ಸುತ್ತಲೂ ನೂಡಲ್ಸ್‌ಗಳನ್ನು ದಾರದಂತೆ (Thread) ಸುತ್ತಿ.
- ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಸಣ್ಣ ಉರಿಯಲ್ಲಿ ಚಿಕನ್ ಗೋಲ್ಡನ್ ಬ್ರೌನ್ ಬಣ್ಣಕ್ಕೆ ಬರುವವರೆಗೆ ಮತ್ತು ಗರಿಗರಿಯಾಗುವವರೆಗೆ ಕರಿಯಿರಿ.
ಈಗ ಬಿಸಿಬಿಸಿಯಾದ ಕ್ರಿಸ್ಪಿ ಥ್ರೆಡ್ ಚಿಕನ್ ಅನ್ನು ನಿಮ್ಮ ಇಷ್ಟದ ಸಾಸ್ ಅಥವಾ ಚಟ್ನಿಯೊಂದಿಗೆ ಸವಿಯಿರಿ.
