ವಿಶೇಷ ದಿನಗಳಲ್ಲಿ ಅಥವಾ ಹಬ್ಬದ ಸಂದರ್ಭಗಳಲ್ಲಿ ಮನೆಯವರಿಗಾಗಿ ಏನಾದರೂ ಹೊಸದಾಗಿ ಮಾಡಬೇಕು ಎಂದು ಯೋಚಿಸುತ್ತಿದ್ದರೆ, ದಮ್ ಪನೀರ್ ರೋಲ್ ಅತ್ಯುತ್ತಮ ಆಯ್ಕೆಯಾಗಿದೆ. ವಿವಿಧ ಮಸಾಲೆಗಳ ಸಮ್ಮಿಶ್ರಣದಿಂದ ಸಿದ್ಧವಾಗುವ ಈ ಖಾದ್ಯವು ಅತ್ಯಂತ ರುಚಿಕರವಾಗಿದ್ದು, ಎಲ್ಲ ವಯಸ್ಸಿನವರಿಗೂ ಇಷ್ಟವಾಗುತ್ತದೆ. ರೆಸ್ಟೋರೆಂಟ್ ಶೈಲಿಯಲ್ಲಿ ಅತ್ಯಂತ ಸುಲಭವಾಗಿ ಇದನ್ನು ಮನೆಯಲ್ಲೇ ಹೇಗೆ ತಯಾರಿಸಬಹುದು ಎಂಬ ಮಾಹಿತಿ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು
ನಾಲ್ಕು ನೂರು ಗ್ರಾಂ ಪನೀರ್ ತುಂಡುಗಳು, ಎರಡು ಚಮಚ ಎಣ್ಣೆ, ಎರಡು ಪಲಾವ್ ಎಲೆ, ಎರಡು ಏಲಕ್ಕಿ, ಎರಡು ಲವಂಗ, ಸಣ್ಣ ತುಂಡು ದಾಲ್ಚಿನ್ನಿ, ಒಂದು ಚಮಚ ಶುಂಠಿ ಪೇಸ್ಟ್, ಒಂದು ಚಮಚ ಬೆಳ್ಳುಳ್ಳಿ ಪೇಸ್ಟ್, ಮುಕ್ಕಾಲು ಚಮಚ ಹಸಿಮೆಣಸಿನಕಾಯಿ ಪೇಸ್ಟ್, ಅರ್ಧ ಕಪ್ ಹುರಿದ ಈರುಳ್ಳಿ ಪೇಸ್ಟ್, ಮುಕ್ಕಾಲು ಚಮಚ ಜೀರಿಗೆ ಪುಡಿ, ಒಂದೂವರೆ ಚಮಚ ಕೊತ್ತಂಬರಿ ಪುಡಿ, ಆರರಿಂದ ಎಂಟು ಜಜ್ಜಿದ ಕಾಳುಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು, ಮುಕ್ಕಾಲು ಕಪ್ ಮೊಸರು, ಅರ್ಧ ಕಪ್ ಫ್ರೆಶ್ ಕ್ರೀಮ್, ಚಿಟಿಕೆ ಕೇಸರಿ, ಮುಕ್ಕಾಲು ಚಮಚ ಗರಂ ಮಸಾಲಾ, ಎರಡು ಚಮಚ ಹೆಚ್ಚಿದ ಕೊತ್ತಂಬರಿ ಸೊಪ್ಪು, ಅರ್ಧ ಚಮಚ ಪುದೀನಾ ಎಲೆಗಳು, ಸ್ವಲ್ಪ ಗುಲಾಬಿ ದಳಗಳು ಮತ್ತು ಒಂದೂವರೆ ಚಮಚ ಗುಲಾಬಿ ನೀರು.
ತಯಾರಿಸುವ ಸರಳ ವಿಧಾನ
ಮೊದಲಿಗೆ ಒಂದು ಪಾತ್ರೆಯಲ್ಲಿ ಎಣ್ಣೆಯನ್ನು ಬಿಸಿ ಮಾಡಿ. ಅದಕ್ಕೆ ಪಲಾವ್ ಎಲೆ, ಏಲಕ್ಕಿ, ಲವಂಗ ಮತ್ತು ದಾಲ್ಚಿನ್ನಿ ಹಾಕಿ ಸುವಾಸನೆ ಬರುವವರೆಗೆ ಹುರಿಯಿರಿ. ನಂತರ ಶುಂಠಿ, ಬೆಳ್ಳುಳ್ಳಿ ಮತ್ತು ಹಸಿಮೆಣಸಿನಕಾಯಿ ಪೇಸ್ಟ್ ಸೇರಿಸಿ ಚೆನ್ನಾಗಿ ಕೈಯಾಡಿಸಿ. ಇದಕ್ಕೆ ಹುರಿದ ಈರುಳ್ಳಿ ಪೇಸ್ಟ್ ಅನ್ನು ಸಹ ಸೇರಿಸಿ ಮಿಶ್ರಣ ಮಾಡಿ.
ಬಳಿಕ ಒಂದು ಕಪ್ ನೀರು ಸುರಿದು ಎರಡು ನಿಮಿಷಗಳ ಕಾಲ ಬೇಯಿಸಿ. ನಂತರ ಜೀರಿಗೆ ಪುಡಿ, ಕೊತ್ತಂಬರಿ ಪುಡಿ, ಜಜ್ಜಿದ ಕಾಳುಮೆಣಸು ಮತ್ತು ಉಪ್ಪು ಸೇರಿಸಿ ಒಂದು ನಿಮಿಷ ಚೆನ್ನಾಗಿ ಫ್ರೈ ಮಾಡಿ.
ಈ ಮಿಶ್ರಣಕ್ಕೆ ಚೆನ್ನಾಗಿ ಕದಡಿದ ಮೊಸರನ್ನು ಸೇರಿಸಿ ಕೈಯಾಡಿಸಿ. ನಂತರ ಪನೀರ್ ತುಂಡುಗಳನ್ನು ಮಸಾಲೆಯೊಂದಿಗೆ ಸೇರಿಸಿ ಮಧ್ಯಮ ಉರಿಯಲ್ಲಿ ಬೇಯಲು ಬಿಡಿ. ಕೊನೆಯಲ್ಲಿ ಫ್ರೆಶ್ ಕ್ರೀಮ್ ಮತ್ತು ಕೇಸರಿಯನ್ನು ಇದಕ್ಕೆ ಸೇರಿಸಿ.
ಈ ಸಂಪೂರ್ಣ ಮಿಶ್ರಣವನ್ನು ಒಂದು ಮಣ್ಣಿನ ಪಾತ್ರೆಗೆ ವರ್ಗಾಯಿಸಿ. ಅದಕ್ಕೆ ಜಜ್ಜಿದ ಏಲಕ್ಕಿ, ಗರಂ ಮಸಾಲಾ ಪುಡಿ, ಕೊತ್ತಂಬರಿ ಸೊಪ್ಪು, ಪುದೀನಾ ಎಲೆಗಳು, ಗುಲಾಬಿ ದಳಗಳು ಮತ್ತು ಗುಲಾಬಿ ನೀರನ್ನು ಸೇರಿಸಿ ಸಣ್ಣ ಉರಿಯಲ್ಲಿ ದಮ್ ಇಟ್ಟರೆ ಘಮಘಮಿಸುವ ದಮ್ ಪನೀರ್ ರೋಲ್ ಮಿಶ್ರಣ ಸಿದ್ಧವಾಗುತ್ತದೆ. ಇದನ್ನು ರೊಟ್ಟಿ ಅಥವಾ ಚಪಾತಿಯೊಳಗೆ ರೋಲ್ ಮಾಡಿ ಸವಿಯಬಹುದು.
