ಬರ್ಗರ್ ಪ್ರಿಯರಿಗೆ ಕ್ರಿಸ್ಪಿ ಮತ್ತು ಜ್ಯೂಸಿ ಫ್ರೈಡ್ ಚಿಕನ್ ಬರ್ಗರ್ ಎಂದರೆ ಸದಾ ಅಚ್ಚುಮೆಚ್ಚು. ಹೊರಗಡೆ ಗರಿಗರಿಯಾಗಿ, ಒಳಗಡೆ ಅತ್ಯಂತ ಮೆದುವಾಗಿರುವ ಚಿಕನ್ ಬರ್ಗರ್ ಅನ್ನು ರೆಸ್ಟೋರೆಂಟ್ ಶೈಲಿಯಲ್ಲೇ ಮನೆಯಲ್ಲಿ ಸುಲಭವಾಗಿ ತಯಾರಿಸಬಹುದು. ಮಸಾಲೆಯುಕ್ತ ಮಜ್ಜಿಗೆಯಲ್ಲಿ ಚಿಕನ್ ನೆನೆಸಿಡುವುದರಿಂದ ಅದು ಹೆಚ್ಚು ಮೆದು ಮತ್ತು ರುಚಿಕರವಾಗುತ್ತದೆ.
ಬೇಕಾಗುವ ಸಾಮಗ್ರಿಗಳು
-
ಎಲುಬಿಲ್ಲದ ಚಿಕನ್ ತೊಡೆಯ ಭಾಗ (Thighs) – 4 ತುಂಡು
-
ಮಜ್ಜಿಗೆ – 500 ಎಂಎಲ್
-
ಮೈದಾ ಹಿಟ್ಟು – 250 ಗ್ರಾಂ
-
ಗಾರ್ಲಿಕ್ ಮೆಯೋನೈಸ್ – 100 ಗ್ರಾಂ
-
ಬರ್ಗರ್ ಬನ್ – 4
-
ಐಸ್‌ಬರ್ಗ್ ಲೆಟ್ಯೂಸ್ – ಅರ್ಧ ಕಪ್
-
ಗಾರ್ಲಿಕ್ ಪೌಡರ್, ಒಣ ಓರೆಗಾನೋ, ಸ್ಮೋಕ್ಡ್ ಪ್ಯಾಪ್ರಿಕಾ ಹಾಗೂ ಕಾಜುನ್ ಮಸಾಲೆ – ಅಗತ್ಯಕ್ಕೆ ತಕ್ಕಷ್ಟು
-
ಸಕ್ಕರೆ, ಉಪ್ಪು ಮತ್ತು ಎಣ್ಣೆ – ರುಚಿಗೆ ತಕ್ಕಷ್ಟು
-
ಸೌತೆಕಾಯಿ ಉಪ್ಪಿನಕಾಯಿ ಚೂರುಗಳು (Gherkins) – 4
ತಯಾರಿಸುವ ವಿಧಾನ
ಮೊದಲು ಚಿಕನ್ ತುಂಡುಗಳನ್ನು ಹಗುರವಾಗಿ ಚಪ್ಪಟೆಗೊಳಿಸಿ. ನಂತರ ಒಂದು ಪಾತ್ರೆಯಲ್ಲಿ ಮಜ್ಜಿಗೆ, ಗಾರ್ಲಿಕ್ ಪೌಡರ್, ಓರೆಗಾನೋ, ಪ್ಯಾಪ್ರಿಕಾ, ಕಾಜುನ್ ಮಸಾಲೆ, ಸಕ್ಕರೆ ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಬೆರೆಸಿ. ಈ ಮಸಾಲೆ ಮಜ್ಜಿಗೆಯಲ್ಲಿ ಚಿಕನ್ ತುಂಡುಗಳನ್ನು ಹಾಕಿ ಕನಿಷ್ಠ 8 ಗಂಟೆಗಳ ಕಾಲ ನೆನೆಯಲು ಬಿಡಿ.
ಮತ್ತೊಂದು ಪಾತ್ರೆಯಲ್ಲಿ ಮೈದಾ ಹಿಟ್ಟಿಗೆ ಓರೆಗಾನೋ, ಪ್ಯಾಪ್ರಿಕಾ, ಕಾಜುನ್ ಮಸಾಲೆ ಹಾಗೂ ಉಪ್ಪು ಸೇರಿಸಿ ಮಿಶ್ರಣ ಮಾಡಿ. ಮಜ್ಜಿಗೆಯಲ್ಲಿ ನೆನೆಸಿದ ಚಿಕನ್ ಅನ್ನು ಈ ಹಿಟ್ಟಿನಲ್ಲಿ ಚೆನ್ನಾಗಿ ಹೊರಳಿಸಿ. ನಂತರ ಅದನ್ನು 15 ಸೆಕೆಂಡುಗಳ ಕಾಲ ತಣ್ಣನೆಯ ನೀರಿನಲ್ಲಿ ಮುಳುಗಿಸಿ, ತಕ್ಷಣವೇ ಮತ್ತೆ ಮೈದಾ ಹಿಟ್ಟಿನಲ್ಲಿ ಹಾಕಿ ಚೆನ್ನಾಗಿ ಉಜ್ಜಿ. ಇದರಿಂದ ಚಿಕನ್ ಮೇಲ್ಭಾಗದಲ್ಲಿ ಗರಿಗರಿಯಾದ ಕೋಟಿಂಗ್ ಸಿಗುತ್ತದೆ. ಹಿಟ್ಟಿನಲ್ಲಿ ಹೊರಳಿಸಿದ ತಕ್ಷಣವೇ ಕಾಯಿಸಿದ ಎಣ್ಣೆಯಲ್ಲಿ ಸಣ್ಣ ಉರಿಯಲ್ಲಿ ಹೊಂಬಣ್ಣ ಬರುವವರೆಗೆ ಕರಿಯಿರಿ.
ಬರ್ಗರ್ ಬನ್‌ಗಳನ್ನು ಸ್ವಲ್ಪ ಬಿಸಿ ಮಾಡಿ, ಎರಡೂ ಭಾಗಕ್ಕೆ ಗಾರ್ಲಿಕ್ ಮೆಯೋನೈಸ್ ಹಚ್ಚಿ. ಕೆಳಗಿನ ಬನ್ ಮೇಲೆ ಲೆಟ್ಯೂಸ್ ಎಲೆಗಳನ್ನು ಇಟ್ಟು, ಅದರ ಮೇಲೆ ಗರಿಗರಿಯಾದ ಫ್ರೈಡ್ ಚಿಕನ್ ಇರಿಸಿ. ನಂತರ ಸೌತೆಕಾಯಿ ಚೂರುಗಳನ್ನು ಇಟ್ಟು ಮೇಲಿನ ಬನ್‌ನಿಂದ ಮುಚ್ಚಿದರೆ ಬಿಸಿಬಿಸಿಯಾದ ಕ್ರಿಸ್ಪಿ ಫ್ರೈಡ್ ಚಿಕನ್ ಬರ್ಗರ್ ಸವಿಯಲು ಸಿದ್ಧ.
