ದೇಶದ ಚುನಾವಣೆಗಳಲ್ಲಿ ಅಕ್ರಮ: ಮತ ಕಳ್ಳತನದಿಂದ ಕಾನೂನು ಕಳ್ಳತನವೂ ನಡೆಯುತ್ತಿದೆ: ರಾಹುಲ್ ಗಾಂಧಿ ಆರೋಪ

ನವದೆಹಲಿ: ಭಾರತದ ಚುನಾವಣೆಗಳಲ್ಲಿ ಅಕ್ರಮ ನಡೆಯುತ್ತಿದೆ, ಮತ ಕಳ್ಳತನದಿಂದ ಕಾನೂನು ಕಳ್ಳತನ ಎಂದು ಲೋಕಸಭೆ ಪ್ರತಿಪಕ್ಷ ನಾಯಕ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ.

‘ವಿಶೇಷ ತೀವ್ರ ಪರಿಷ್ಕರಣೆ’ (SIR) ಪ್ರಕ್ರಿಯೆಯ ಕುರಿತು ಇಬ್ಬರು ಚುನಾವಣಾ ಆಯುಕ್ತರು ವ್ಯಕ್ತಪಡಿಸಿದ ಆಕ್ಷೇಪಣೆಗಳ ಬಗ್ಗೆ ‘ಇಂಡಿಯನ್ ಎಕ್ಸ್‌ಪ್ರೆಸ್’ ವರದಿಗೆ ಪ್ರತಿಕ್ರಿಯಿಸುತ್ತಾ ಮತ್ತು ದೆಹಲಿಯಲ್ಲಿ ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡುತ್ತಾ ಗಾಂಧಿ ಈ ಹೇಳಿಕೆ ನೀಡಿದರು.

ಚುನಾವಣಾ ಆಯೋಗವು “ಮತದ ಸಾಂಸ್ಥಿಕ ರಕ್ಷಕ” ಎಂದು ಹೇಳಿದ ರಾಹುಲ್ ಗಾಂಧಿ, ಭಾರತದಲ್ಲಿ ಚುನಾವಣೆಗಳಲ್ಲಿ ಅಕ್ರಮ (ರಿಗ್ಗಿಂಗ್) ನಡೆಯುತ್ತಿದೆ ಎಂಬುದನ್ನು ಸಾಬೀತುಪಡಿಸಲು ಸಾಕಷ್ಟು ಮಾಹಿತಿಯಿದೆ ಎಂದು ಆರೋಪಿಸಿದರು.

“ನಾನು ಇದನ್ನು ಸಾಕ್ಷ್ಯದೊಂದಿಗೆ ತೋರಿಸಿದ್ದೇನೆ. ಭಾರತದ ಚುನಾವಣೆಗಳು, ಲೋಕಸಭೆ ಚುನಾವಣೆಗಳು, 2024ರ ಚುನಾವಣೆ ಮತ್ತು ವಿಧಾನಸಭೆ ಚುನಾವಣೆಗಳೆಲ್ಲವೂ ಅಕ್ರಮಕ್ಕೆ (ರಿಗ್ಗಿಂಗ್‌ಗೆ) ಒಳಗಾಗುತ್ತಿವೆ ಎಂಬುದನ್ನು 100% ಖಚಿತಪಡಿಸಲು ಸಾಕಷ್ಟು ಮಾಹಿತಿಯಿದೆ” ಎಂದು ಅವರು ಹೇಳಿದರು.

ನಂತರ ಗಾಂಧಿ ಅವರು ಕುಮಾರ್ ಅವರ ಬಗ್ಗೆ ಇಬ್ಬರು ಚುನಾವಣಾ ಆಯುಕ್ತರು ವ್ಯಕ್ತಪಡಿಸಿದ ಕಳವಳಗಳನ್ನು ಪ್ರಸ್ತಾಪಿಸಿದರು.

“ಜ್ಞಾನೇಶ್ ಕುಮಾರ್ ಅವರ ಬಗ್ಗೆ ಇಬ್ಬರು ಚುನಾವಣಾ ಆಯುಕ್ತರು ಪ್ರಶ್ನೆಗಳನ್ನು ಎತ್ತುತ್ತಿದ್ದಾರೆ. ನಾನೂ ಪ್ರಶ್ನೆಗಳನ್ನು ಎತ್ತುತ್ತಿದ್ದೇನೆ. ಆ ಪ್ರಶ್ನೆಗಳನ್ನು ನಿರ್ಲಕ್ಷಿಸಲಾಯಿತು. ಭಾರತದ ಜನರು ಅದನ್ನು ನಂಬಿದರು. ಆದರೆ ಭಾರತದ ಸಾಂಸ್ಥಿಕ ವ್ಯವಸ್ಥೆಗೆ ಅದರಲ್ಲಿ ಆಸಕ್ತಿ ಇರಲಿಲ್ಲ,” ಎಂದು ಗಾಂಧಿ ಹೇಳಿದರು.

ಜ್ಞಾನೇಶ್ ಕುಮಾರ್ ಅವರ ನೇಮಕಾತಿಯನ್ನು ಪ್ರಶ್ನಿಸಿದ ರಾಹುಲ್ ಗಾಂಧಿ ಮುಖ್ಯ ಚುನಾವಣಾ ಆಯುಕ್ತರಾಗಿ ಜ್ಞಾನೇಶ್ ಕುಮಾರ್ ಅವರನ್ನು ನೇಮಿಸಿದ ಪ್ರಕ್ರಿಯೆಯನ್ನೂ ಪ್ರಸ್ತಾಪಿಸಿದ್ದಾರೆ.

“ಜ್ಞಾನೇಶ್ ಕುಮಾರ್ ಅವರನ್ನು ಭಾರತದ ಪ್ರಧಾನ ಮಂತ್ರಿಯೇ ಆಯ್ಕೆ ಮಾಡಿದ್ದಾರೆ, ಬೇರೆ ಯಾರೂ ಅಲ್ಲ. ಅವರನ್ನು ಅಮಿತ್ ಶಾ ಆಯ್ಕೆ ಮಾಡಿದ್ದಾರೆ” ಎಂದು ಹೇಳಿದರು.

“ನಮ್ಮ ಮತದಾನ ವ್ಯವಸ್ಥೆಯಲ್ಲಿ ಉಂಟಾದ ಅವ್ಯವಸ್ಥೆ ಮತ್ತು ಹಾನಿಗೆ ಜ್ಞಾನೇಶ್ ಕುಮಾರ್ ಅವರೇ ಕಾರಣ ಎಂದು ಈಗ ಇಬ್ಬರು ಚುನಾವಣಾ ಆಯುಕ್ತರು ಹೇಳುತ್ತಿದ್ದಾರೆ” ಎಂದರು.

‘ಮತ ಕಳ್ಳತನ’ವನ್ನು ಕಾನೂನುಗಳು ಮತ್ತು ಸಂಸ್ಥೆಗಳೊಂದಿಗೆ ಜೋಡಿಸಿದ ರಾಹುಲ್ ಗಾಂಧಿ

ಮತ, ಕಾನೂನುಗಳು ಮತ್ತು ಸಂಸ್ಥೆಗಳನ್ನು ಬೆಸೆಯುವ ಸರಪಳಿಯಂತಹ ಪ್ರಕ್ರಿಯೆಯನ್ನು ವಿವರಿಸಿದ ಅವರು,

“ಮತ ಕಳ್ಳತನದಿಂದ ಕಾನೂನು ಕಳ್ಳತನ ಉಂಟಾಗುತ್ತದೆ… ಕಾನೂನು ಕಳ್ಳತನದಿಂದ ಸಂಸ್ಥೆಗಳ ಕಳ್ಳತನ ಉಂಟಾಗುತ್ತದೆ. ಇದೇ ಆ ಸರಪಳಿ”.ಮತದಾನ ಪ್ರಕ್ರಿಯೆಯಲ್ಲಿ ಯಾವುದೇ ರೀತಿಯ ರಾಜಿ ಅಥವಾ ಅಕ್ರಮ ನಡೆದರೆ, ಅದು ಸಂಸತ್ತು ಮತ್ತು ಅದರ ಮೂಲಕ ರಚಿತವಾದ ಸಂಸ್ಥೆಗಳ ಮೇಲೆ ಪರಿಣಾಮ ಬೀರುತ್ತದೆ ಎಂದು ಗಾಂಧಿ ವಾದಿಸಿದರು.

“ಒಂದು ವೇಳೆ ಮತ ಕಳ್ಳತನವಾಗಿದ್ದು, ಸಂಸತ್ತಿನಲ್ಲಿರುವ ಸಂಸದರು ಆ ಕಳವು ಮಾಡಿದ ಮತಗಳ ಆಧಾರದ ಮೇಲೆ ಅಲ್ಲಿ ಕುಳಿತಿದ್ದರೆ, ಅವರು ರೂಪಿಸುವ ಯಾವುದೇ ಕಾನೂನು ಕಾನೂನುಬಾಹಿರವಾಗಿರುತ್ತದೆ ಮತ್ತು ಅವರು ಮಾಡುವ ಯಾವುದೇ ಸಾಂಸ್ಥಿಕ ಬದಲಾವಣೆಯೂ ಕಾನೂನುಬಾಹಿರವಾಗಿರುತ್ತದೆ” ಎಂದು ಅವರು ಹೇಳಿದರು.

ಹಿಂದಿನ ‘ಮತ ಕಳ್ಳತನ’ದ ಆರೋಪಗಳನ್ನು ನೆನಪಿಸಿಕೊಂಡ ರಾಹುಲ್ ಗಾಂಧಿ

ಇಬ್ಬರು ಚುನಾವಣಾ ಆಯುಕ್ತರು ಆಕ್ಷೇಪಣೆಗಳನ್ನು ವ್ಯಕ್ತಪಡಿಸುವ ಮೊದಲು ನಡೆದ ಘಟನೆಗಳ ಸರಣಿಯನ್ನೂ ಗಾಂಧಿ ವಿವರಿಸಿದರು.

“21 ಡಿಸೆಂಬರ್ 2023 ರಂದು ಒಂದು ವಿಚಿತ್ರ ಕಾನೂನನ್ನು ಅಂಗೀಕರಿಸಲಾಯಿತು. ಚುನಾವಣಾ ಆಯುಕ್ತರನ್ನು ತನಿಖೆಯಿಂದ ರಕ್ಷಿಸುವ ಕಾನೂನು ಅದು. ಅವರು ಭಾರತೀಯ ಕಾನೂನು ವ್ಯವಸ್ಥೆಯ ವ್ಯಾಪ್ತಿಯಿಂದ ಹೊರತಾಗಿರುತ್ತಾರೆ(ತನಿಖೆಗೆ ಒಳಪಡದಂತೆ ರಕ್ಷಣೆ ಹೊಂದಿರುತ್ತಾರೆ),” ಎಂದು ಗಾಂಧಿ ಹೇಳಿದರು.

ನಂತರ ಅವರು ಮಹಾರಾಷ್ಟ್ರಕ್ಕೆ ಸಂಬಂಧಿಸಿದ ಪತ್ರಿಕಾಗೋಷ್ಠಿಯ ಬಗ್ಗೆ ಪ್ರಸ್ತಾಪಿಸಿದರು.

“7 ಫೆಬ್ರವರಿಯಂದು ನಾವು ಮಹಾರಾಷ್ಟ್ರದ ಕುರಿತು ಪತ್ರಿಕಾಗೋಷ್ಠಿ ನಡೆಸಿದೆವು. ಮತ ಕಳ್ಳತನ ನಡೆಯುತ್ತಿದೆ ಎಂದು ನಾವು ಸ್ಪಷ್ಟವಾಗಿ ಹೇಳಿದೆವು ಮತ್ತು ಅದಕ್ಕೆ ಸಂಬಂಧಿಸಿದ ಸಾಕ್ಷ್ಯಗಳನ್ನು ಮುಂದಿಟ್ಟೆವು” ಎಂದು ಅವರು ಹೇಳಿದರು.

ಚುನಾವಣಾ ಆಯುಕ್ತರು ಮತ್ತು ಮುಖ್ಯ ಚುನಾವಣಾ ಆಯುಕ್ತರ ಆಯ್ಕೆ ಪ್ರಕ್ರಿಯೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿ, ತಾನು ನಂತರ ಭಾರತದ ಪ್ರಧಾನ ಮಂತ್ರಿಗೆ ಭಿನ್ನಮತದ ಟಿಪ್ಪಣಿಯನ್ನು (dissent note) ಸಲ್ಲಿಸಿದ್ದಾಗಿ ಗಾಂಧಿ ಹೇಳಿದರು.

“ನನ್ನ ಅಭಿಪ್ರಾಯವನ್ನು ಬದಿಗಿರಿಸಲಾಯಿತು ಮತ್ತು ಆ ವ್ಯಕ್ತಿಯನ್ನು ಭಾರತದ ಪ್ರಧಾನ ಮಂತ್ರಿಯೇ ನೇಮಕ ಮಾಡಿದರು,” ಎಂದು ಅವರು ಹೇಳಿದರು.

ಮಹದೇವಪುರ ಮತ್ತು ಹರಿಯಾಣದ ಬಗ್ಗೆ ಪ್ರಸ್ತಾಪಿಸಿದ ರಾಹುಲ್ ಗಾಂಧಿ

ಕಾಂಗ್ರೆಸ್ ಪಕ್ಷವು “ಮಹದೇವಪುರ ಮತ ಕಳ್ಳತನ”ದ ಸಾಕ್ಷ್ಯವೆಂದು ಪರಿಗಣಿಸಿದ್ದನ್ನು ಆಗ ಪ್ರಸ್ತುತಪಡಿಸಿತ್ತು ಮತ್ತು ನಂತರದ ದಿನಗಳಲ್ಲಿ ಹೆಚ್ಚಿನ ಮಾಹಿತಿ ಹೊರಬರಲು ಪ್ರಾರಂಭಿಸಿತು ಎಂದು ಗಾಂಧಿ ಹೇಳಿದರು. “ನಂತರ ನಾವು ಮಹದೇವಪುರದ ಮತ ಕಳ್ಳತನದ(vote chori) ವಿಷಯವನ್ನು ಬಹಿರಂಗಪಡಿಸುತ್ತೇವೆ. ನಮಗೆ ಹೆಚ್ಚಿನ ಮಾಹಿತಿ ಲಭ್ಯವಾಗುತ್ತಿರುವುದರಿಂದ ಒತ್ತಡವು ನಿಧಾನವಾಗಿ ಹೆಚ್ಚುತ್ತಿದೆ. ಒಳಗಿನಿಂದಲೇ ಮಾಹಿತಿ ಸೋರಿಕೆಯಾಗುತ್ತಿದೆ ಮತ್ತು ಅದು ನಮಗೆ ತಲುಪುತ್ತಿದೆ” ಎಂದು ಗಾಂಧಿ ಹೇಳಿದರು.

“ಸಂಬಂಧಿತ ಸಂಸ್ಥೆಯ ಮೇಲೆ ಒತ್ತಡ ಹೆಚ್ಚುತ್ತಿದೆ ಮತ್ತು ಈಗ ಒಂದು ಸಮಸ್ಯೆ ಎದುರಾಗಲಿದೆ ಎಂಬುದು ಅವರಿಗೆ ಅರಿವಾಗುತ್ತದೆ”. ಆಗಸ್ಟ್ 16 ಮತ್ತು ಸೆಪ್ಟೆಂಬರ್ 1 ರಂದು ನಡೆದ ‘ವೋಟ್-ಚೋರಿ ಅಧಿಕಾರ್ ಯಾತ್ರೆ’ ಹಾಗೂ ನಂತರ ಸೆಪ್ಟೆಂಬರ್ 18 ರಂದು ನಡೆದ ‘ಆಳಂದ ವೋಟ್-ಚೋರಿ'(ಆಳಂದ ಮತ ಕಳ್ಳತನ) ಘಟನೆಯ ಬಗ್ಗೆಯೂ ಗಾಂಧಿ ಪ್ರಸ್ತಾಪಿಸಿದರು.

“ಇಲ್ಲಿ ನಡೆಯುತ್ತಿರುವ ಒಂದು ನಿರ್ದಿಷ್ಟ ಕಾರ್ಯವಿಧಾನವನ್ನು ನಾವು ತೋರಿಸುತ್ತಿದ್ದೇವೆ. ಈ ಪತ್ರಗಳ ಸರಣಿಯು ನಮ್ಮ ‘ಆಳಂದ ವೋಟ್-ಚೋರಿ’ಯ ನಂತರ ಮತ್ತು ನಮ್ಮ ‘ಹರಿಯಾಣ ವೋಟ್-ಚೋರಿ’ಯ ಸಮಯದ ಆಸುಪಾಸಿನಲ್ಲೇ ಪ್ರಾರಂಭವಾಗುತ್ತವೆ,” ಎಂದು ಗಾಂಧಿ ಹೇಳಿದರು.

‘SIR’ ವಿವಾದದ ನಡುವೆ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ರಾಜೀನಾಮೆಗೆ ರಾಹುಲ್ ಗಾಂಧಿ ಆಗ್ರಹಿಸಿದ್ದಾರೆ. ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರು ಚುನಾವಣಾ ವ್ಯವಸ್ಥೆಯ ಮೇಲೆ ದಾಳಿ ನಡೆಸಿದ್ದಾರೆ ಎಂದು ಆರೋಪಿಸಿದ ರಾಹುಲ್ ಗಾಂಧಿ ತಕ್ಷಣದ ರಾಜೀನಾಮೆಗೆ ಆಗ್ರಹಿಸಿದ್ದಾರೆ.