ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರೀ ನಿರೀಕ್ಷೆ ಮೂಡಿಸಿರುವ ದುಬೈ ಫ್ಯಾಶನ್ ವೀಕ್ ಕಾರ್ಯಕ್ರಮವು ಅದ್ಧೂರಿಯಾಗಿ ಆರಂಭವಾಗಿದ್ದು, ಮೊದಲ ದಿನವೇ ಭಾರತೀಯ ಡಿಸೈನರ್ ಒಬ್ಬರು ತಮ್ಮ ವಿಶಿಷ್ಟ ವಿನ್ಯಾಸಗಳ ಮೂಲಕ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದ್ದಾರೆ. ಅಕ್ಟೋಬರ್ 22 ರಂದು ನಡೆದ ಈ ಫ್ಯಾಶನ್ ಪ್ರದರ್ಶನದಲ್ಲಿ ಖ್ಯಾತ ಭಾರತೀಯ ಡಿಸೈನರ್ ಪಲ್ಲವಿ ಪುರಿ ಅವರು ತಮ್ಮ ಹೊಸ ಕಲೆಕ್ಷನ್ ಮೂಲಕ ಅತಿಥಿಗಳನ್ನು ಮಂತ್ರಮುಗ್ಧರನ್ನಾಗಿಸಿದರು. ಈ ಅಪರೂಪದ ಶೋನಲ್ಲಿ ಮಾಡೆಲ್ ಲಿಸಾ ಲಾಲ್ವಾನಿ ಶೋಸ್ಟಾಪರ್ ಆಗಿ ರಾಂಪ್ ವಾಕ್ ಮಾಡುವ ಮೂಲಕ ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾದರು.
ಈ ಫ್ಯಾಶನ್ ವೇದಿಕೆಯಲ್ಲಿ ಲಿಸಾ ಲಾಲ್ವಾನಿ ಅವರು ಸಂಪೂರ್ಣವಾಗಿ ಬಾರ್ಬಿಕೋರ್ ಶೈಲಿಯ ಬ್ಲಶ್ ಪಿಂಕ್ ಬಣ್ಣದ ಮಿನಿ ಡ್ರೆಸ್ ಧರಿಸಿ ಅತ್ಯಂತ ಸ್ಟೈಲಿಶ್ ಆಗಿ ಕಂಗೊಳಿಸಿದರು. ಉಡುಪಿನ ಮೇಲಿನ ಆಕರ್ಷಕ ಕಟ್-ಔಟ್ ವಿನ್ಯಾಸ ಹಾಗೂ ಭುಜಗಳ ಮೇಲಿನಿಂದ ಹರಿಯುವ ಗುಲಾಬಿ ಬಣ್ಣದ ಫ್ರಿಂಜ್ ವಿನ್ಯಾಸವು ರಾಂಪ್ ಮೇಲೆ ಪ್ರತಿಯೊಬ್ಬರ ಕಣ್ಣು ಕುಕ್ಕುವಂತಿತ್ತು. ಉಡುಪಿನ ಅಂದಕ್ಕೆ ಯಾವುದೇ ಅಡ್ಡಿಯಾಗದಂತೆ ಲಿಸಾ ಯಾವುದೇ ಆಭರಣಗಳನ್ನು ಧರಿಸಿರಲಿಲ್ಲ. ಮೃದುವಾದ ಅಲೆಅಲೆಯಾದ ಹೇರ್‌ಸ್ಟೈಲ್ ಹಾಗೂ ಪಿಂಕ್ ಮೇಕಪ್ ಅವರ ಸುಂದರ ನೋಟಕ್ಕೆ ಇನ್ನಷ್ಟು ಮೆರುಗು ನೀಡಿತು.
ದುಬೈ ಡಿಸೈನ್ ಡಿಸ್ಟ್ರಿಕ್ಟ್‌ನಲ್ಲಿ ಅಕ್ಟೋಬರ್ 22 ರಿಂದ 26 ರವರೆಗೆ ನಡೆಯುತ್ತಿರುವ ಈ ವಸಂತ ಮತ್ತು ಬೇಸಿಗೆ ಆವೃತ್ತಿಯ ಫ್ಯಾಶನ್ ವೀಕ್‌ನಲ್ಲಿ ಜಲ್ಫ್ ರಾಷ್ಟ್ರಗಳು, ಭಾರತ, ಯುರೋಪ್ ಹಾಗೂ ಲ್ಯಾಟಿನ್ ಅಮೆರಿಕಾದ ಪ್ರಸಿದ್ಧ ಡಿಸೈನರ್‌ಗಳು ಭಾಗವಹಿಸುತ್ತಿದ್ದಾರೆ. ಈ ಅಂತರರಾಷ್ಟ್ರೀಯ ಮಟ್ಟದ ಪ್ರತಿಷ್ಠಿತ ಫ್ಯಾಶನ್ ಕಾರ್ಯಕ್ರಮವು ಜಾಗತಿಕ ಫ್ಯಾಶನ್ ಲೋಕದಲ್ಲಿ ದುಬೈ ನಗರದ ಸ್ಥಾನವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತಿದೆ.
