ಮಕ್ಕಳ ಪಾಲನೆಯಲ್ಲಿ ತಾಯಿ ಮತ್ತು ತಂದೆ ಇಬ್ಬರಿಗೂ ಸಮಾನ ಜವಾಬ್ದಾರಿ ಇರುತ್ತದೆ, ಆದರೆ ಸಮಾಜವು ತಂದೆಯ ಸಣ್ಣ ಕೆಲಸಗಳಿಗೂ ಅತಿಯಾದ ಪ್ರಶಂಸೆ ನೀಡುವ ಮೂಲಕ ತಾರತಮ್ಯ ಮಾಡುತ್ತಿದೆ ಎಂದು ಟಾಲಿವುಡ್ ನಟ ರಾಮ್ ಚರಣ್ ಪತ್ನಿ ಹಾಗೂ ಉದ್ಯಮಿ ಉಪಾಸನಾ ಕೊನಿಡೇಲಾ ಅಭಿಪ್ರಾಯಪಟ್ಟಿದ್ದಾರೆ. ವಿಶಾಖಪಟ್ಟಣದಲ್ಲಿ ನಡೆದ ಸಿಐಐ ಪಾಲುದಾರಿಕೆ ಶೃಂಗಸಭೆ 2026ರಲ್ಲಿ ಆಂಧ್ರಪ್ರದೇಶದ ಸಚಿವ ನಾರಾ ಲೋಕೇಶ್ ಅವರೊಂದಿಗಿನ ಸಂವಾದದಲ್ಲಿ ಪಾಲ್ಗೊಂಡು ಅವರು ಈ ಮಹತ್ವದ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
ಮಕ್ಕಳ ಲಾಲನೆ ಪಾಲನೆಯ ವಿಷಯದಲ್ಲಿ ಸಮಾಜದ ದೃಷ್ಟಿಕೋನ ಬದಲಾಗಬೇಕಿದೆ ಎಂದು ಒತ್ತಿ ಹೇಳಿದ ಉಪಾಸನಾ, ಒಬ್ಬ ತಂದೆ ತನ್ನ ಮಗುವಿಗೆ ಆಹಾರ ತಿನ್ನಿಸಿದರೆ ಅಥವಾ ಡೈಪರ್ ಬದಲಾಯಿಸಿದರೆ ಮನೆಯವರು ಮತ್ತು ಸುತ್ತಮುತ್ತಲಿನವರು ಚಪ್ಪಾಳೆ ತಟ್ಟಿ ಎಷ್ಟು ಒಳ್ಳೆಯ ತಂದೆ ಎಂದು ಹೊಗಳುತ್ತಾರೆ. ಆದರೆ ಅದೇ ಕೆಲಸವನ್ನು ತಾಯಿ ಪ್ರತಿದಿನ ಮಾಡಿದಾಗ ಯಾರೂ ಯಾಕೆ ಚಪ್ಪಾಳೆ ತಟ್ಟುವುದಿಲ್ಲ ಎಂದು ಪ್ರಶ್ನಿಸಿದ್ದಾರೆ. ಮನೆಯೊಳಗೆ ಈ ಮನಸ್ಥಿತಿ ಬದಲಾಗದ ಹೊರತು ಕಚೇರಿಗಳು ಮತ್ತು ಸಮಾಜದ ಉನ್ನತ ಹಂತಗಳಲ್ಲಿ ಸಮಾನತೆ ತರಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ.
ತಂದೆ ಮಕ್ಕಳ ಕೆಲಸ ಮಾಡುವುದು ಯಾರಿಗೂ ಮಾಡುವ ಉಪಕಾರವಲ್ಲ, ಅದು ಅವರ ಕರ್ತವ್ಯ ಮತ್ತು ಪೋಷಕತ್ವದ ಸಹಜ ಭಾಗವಾಗಿದೆ. ಈ ವಿಚಾರವು ನಮ್ಮ ಶಿಕ್ಷಣ ಪಠ್ಯಕ್ರಮದಲ್ಲೂ ಸೇರಬೇಕು ಮತ್ತು ಮಕ್ಕಳನ್ನು ಬೆಳೆಸುವ ರೀತಿಯಲ್ಲೇ ಈ ಸಮಾನತೆಯ ಭಾವನೆ ಮೂಡಿಸಬೇಕು ಎಂದು ಉಪಾಸನಾ ತಿಳಿಸಿದ್ದಾರೆ. ತಮ್ಮ ವೈಯಕ್ತಿಕ ಅನುಭವವನ್ನೂ ಹಂಚಿಕೊಂಡ ಅವರು, ರಾಮ್ ಚರಣ್ ಮಕ್ಕಳಿಗೆ ಊಟ ಮಾಡಿಸುವಾಗ ತಮಗೂ ಅದು ತುಂಬಾ ಮುದ್ದಾಗಿ ಕಾಣಿಸುತ್ತದೆ, ಆದರೆ ಈಗ ಅದು ಪೋಷಕರ ಸಹಜ ಜವಾಬ್ದಾರಿ ಎಂಬ ಅರಿವು ತಮಗೆ ಮೂಡಿದೆ ಎಂದಿದ್ದಾರೆ.
2012ರಲ್ಲಿ ವಿವಾಹವಾಗಿದ್ದ ರಾಮ್ ಚರಣ್ ಮತ್ತು ಉಪಾಸನಾ ದಂಪತಿ 2023ರಲ್ಲಿ ಮೊದಲ ಮಗಳು ಕ್ಲಿನ್ ಕಾರಾಳನ್ನು ಬರಮಾಡಿಕೊಂಡಿದ್ದರು. ಇನ್ನು ಈ ವರ್ಷ ಈ ದಂಪತಿ ಅವಳಿ ಮಕ್ಕಳಿಗೆ ಪೋಷಕರಾಗಿದ್ದು, ಗಂಡು ಮಗುವಿಗೆ ಶಿವರಾಮ್ ಮತ್ತು ಹೆಣ್ಣು ಮಗುವಿಗೆ ಅನ್ವೀರಾ ದೇವಿ ಎಂದು ನಾಮಕರಣ ಮಾಡಿದ್ದಾರೆ.