ಬೆಂಗಳೂರು: ರಾಜ್ಯದಲ್ಲಿ ಹೊಸ ಅಬಕಾರಿ ನೀತಿ ಜಾರಿಗೆ ಬಂದ ಬೆನ್ನಲ್ಲೇ ಮದ್ಯದ ವಹಿವಾಟು ಸಾರ್ವಕಾಲಿಕ ದಾಖಲೆ ಬರೆದಿದೆ ಸಿದ್ದರಾಮಯ್ಯ ಹಾಗೂ ಡಿ.ಕೆ. ಶಿವಕುಮಾರ್ ನೇತೃತ್ವದ ಗ್ಯಾರಂಟಿ ಸರ್ಕಾರಕ್ಕೆ ಈ ಬಾರಿ ಮದ್ಯಪ್ರಿಯರು ಭರ್ಜರಿ ಕಿಕ್ ನೀಡಿದ್ದು, ಕೇವಲ ಒಂದೇ ತಿಂಗಳ ಅವಧಿಯಲ್ಲಿ ಸರ್ಕಾರದ ಖಜಾನೆ ತುಂಬಿ ತುಳುಕುವಂತೆ ಮಾಡಿದ್ದಾರೆ.ಹೊಸ ನೀತಿ ಜಾರಿಯಾದ ಕೇವಲ ಒಂದೇ ತಿಂಗಳಲ್ಲಿ ರಾಜ್ಯದ ಅಬಕಾರಿ ಆದಾಯವು ದಾಖಲೆಯ ಶೇ.14.84 ರಷ್ಟು ಭಾರಿ ಬೆಳವಣಿಗೆ ಕಂಡಿದೆ ಏನಿದು ಹೊಸ ಅಬಕಾರಿ ನೀತಿಯ ಮ್ಯಾಜಿಕ್?
ದರ ಇಳಿಕೆಯಾಗಿದ್ದೇ ತಡ ಬಿಯರ್ ಮಾರಾಟ ಗಣನೀಯವಾಗಿ ಜಿಗಿತ
ಹೊಸ ಅಬಕಾರಿ ನೀತಿಯ ಅನ್ವಯ, ಪಾನೀಯಗಳಲ್ಲಿರುವ ಆಲ್ಕೋಹಾಲ್ ಪ್ರಮಾಣಕ್ಕೆ ಅನುಗುಣವಾಗಿ ತೆರಿಗೆ ವಿಧಿಸುವ ವ್ಯವಸ್ಥೆ ತರಲಾಗಿದೆ. ಇದರಿಂದಾಗಿ ಕಡಿಮೆ ಆಲ್ಕೋಹಾಲ್ ಅಂಶವಿರುವ ಪ್ರೀಮಿಯಂ, ವಿದೇಶಿ ಹಾಗೂ ದೇಶಿ ಬಿಯರ್ ಬೆಲೆಗಳಲ್ಲಿ ಶೇಕಡಾ 16 ರಿಂದ 20 ರಷ್ಟು ಭಾರಿ ಕಡಿತ ಮಾಡಲಾಗಿತ್ತು. ದರ ಇಳಿಕೆಯಾಗುತ್ತಿದ್ದಂತೆ ಮದ್ಯಪ್ರಿಯರು ಮುಗಿಬಿದ್ದಿದ್ದಾರೆ:
ಶೇ.54.67 ರಷ್ಟು ಭಾರಿ ಏರಿಕೆ: ಪರಿಷ್ಕೃತ ಬೆಲೆ ಜಾರಿಗೆ ಬಂದ ಮೇ 11 ರಿಂದ ಜೂನ್ 11 ರ ನಡುವೆ, ಬಿಯರ್ ಮಾರಾಟವು ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇ.54.67 ರಷ್ಟು ಜಿಗಿತ ಕಂಡಿದೆ.
ದಾಖಲೆಯ ಮಾರಾಟ: ಕಳೆದ ವರ್ಷ ಇದೇ ಅವಧಿಯಲ್ಲಿ 35.3 ಲಕ್ಷ ಕೇಸ್ ಬಿಯರ್ ಮಾರಾಟವಾಗಿದ್ದರೆ, ಈ ಬಾರಿ ಅದು ಬರೋಬ್ಬರಿ 54.6 ಲಕ್ಷ ಕೇಸ್ಗಳಿಗೆ (ಸುಮಾರು 51.68 ಲಕ್ಷ ಬಾಕ್ಸ್) ಏರಿಕೆಯಾಗಿದೆ
ಕಾರಣವೇನು?: ಬಿಯರ್ ದರ ಇಳಿಕೆಯ ಜೊತೆಗೆ ರಾಜ್ಯಾದ್ಯಂತ ಚಾಲ್ತಿಯಲ್ಲಿರುವ ಬಿಸಿಲಿನ ವಾತಾವರಣವೂ ಈ ದಾಖಲೆಯ ಮಾರಾಟಕ್ಕೆ ಪ್ರಮುಖ ಕಾರಣ ಎಂದು ಹೇಳಲಾಗಿದೆ.
ದರ ಹೆಚ್ಚಳದ ನಡುವೆಯೂ ಕುಗ್ಗದ ಐಎಂಎಲ್ (IML) ಕ್ರೇಜ್
ಮತ್ತೊಂದೆಡೆ, ಹೊಸ ನೀತಿಯಲ್ಲಿ ವಿಸ್ಕಿ, ರಮ್, ಬ್ರಾಂಡಿ ಹಾಗೂ ವೋಡ್ಕಾದಂತಹ ಭಾರತೀಯ ತಯಾರಿಕೆಯ ವಿದೇಶಿ ಮದ್ಯದ (IML) ಬೆಲೆ ಶೇಕಡಾ 20 ರಿಂದ 30 ರಷ್ಟು ಹೆಚ್ಚಳವಾಗಿತ್ತು. ಇಷ್ಟಾದರೂ ಮದ್ಯಪ್ರಿಯರ ಕ್ರೇಜ್ ಮಾತ್ರ ಕಿಂಚಿತ್ತೂ ಕಮ್ಮಿಯಾಗಿಲ್ಲ
ದರ ಏರಿಕೆಯ ನಡುವೆಯೂ ಐಎಂಎಲ್ ಮಾರಾಟದಲ್ಲಿ ಕೇವಲ ಶೇ.0.35 ರಷ್ಟು ಮಾತ್ರ ಅಲ್ಪ ಕುಸಿತ ಕಂಡುಬಂದಿದೆ. ಕಳೆದ ವರ್ಷದ 54.74 ಲಕ್ಷ ಕೇಸ್ಗಳಿಗೆ ಹೋಲಿಸಿದರೆ, ಈ ಬಾರಿ 54.55 ಲಕ್ಷ ಕೇಸ್ಗಳು (ಸುಮಾರು 51.33 ಲಕ್ಷ ಬಾಕ್ಸ್) ಮಾರಾಟವಾಗುವ ಮೂಲಕ ತನ್ನ ಹವಾ ಕಾಯ್ದುಕೊಂಡಿದೆ.
ಲಾಭ ತಂದುಕೊಟ್ಟ ಸ್ಲ್ಯಾಬ್ಗಳ ಕಡಿತ: ಬೊಕ್ಕಸಕ್ಕೆ ₹486 ಕೋಟಿಗೂ ಅಧಿಕ ಲಾಭ
ಅಬಕಾರಿ ಇಲಾಖೆಯ ಪ್ರಕಾರ, ಹೊಸ ನೀತಿಯಲ್ಲಿ ಮದ್ಯದ ಮೇಲಿನ ತೆರಿಗೆ ಸ್ಲ್ಯಾಬ್ಗಳ (Tax Slabs) ಸಂಖ್ಯೆಯನ್ನು 16 ರಿಂದ 8 ಕ್ಕೆ ಇಳಿಸಲಾಗಿತ್ತು. ಈ ತಾಂತ್ರಿಕ ಬದಲಾವಣೆ ಮತ್ತು ದರ ಪರಿಷ್ಕರಣೆ ಸರ್ಕಾರಕ್ಕೆ ಲಕ್ಕಿ ಸಾಬೀತಾಗಿದೆ. ಡೈಜಿ ವರ್ಲ್ಡ್ ಹಾಗೂ ಇಲಾಖೆಯ ಅಂಕಿ-ಅಂಶಗಳ ಪ್ರಕಾರ ಆದಾಯದ ಡಿಟೇಲ್ಸ್ ಹೀಗಿದೆ:
ಕಳೆದ ವರ್ಷದ ಆದಾಯ (ಇದೇ ಅವಧಿ): ₹3,261.24 ಕೋಟಿ
ಹೊಸ ನೀತಿ ಜಾರಿ ಬಳಿಕದ ಆದಾಯ: ₹3,745.14 ಕೋಟಿ (ಮಾರುಕಟ್ಟೆ ಮೂಲಗಳ ಪ್ರಕಾರ ₹3,509 ಕೋಟಿ ದಾಟಿದೆ)
ಹೆಚ್ಚುವರಿ ಆದಾಯ: ಕೇವಲ ಒಂದೇ ತಿಂಗಳಲ್ಲಿ ಬರೋಬ್ಬರಿ ₹486 ಕೋಟಿಗೂ ಅಧಿಕ ಹೈಯೆಸ್ಟ್ ಆದಾಯ ಸರ್ಕಾರದ ಖಜಾನೆಗೆ ಹರಿದುಬಂದಿದೆ
2025-26ರ ಹಿಂದಿನ ಹಣಕಾಸು ವರ್ಷದಲ್ಲಿ ಬಿಯರ್ ಮಾರಾಟವು ಶೇ.11.3 ರಷ್ಟು ಭಾರಿ ಕುಸಿತ ಕಂಡಿತ್ತು. ಆದರೆ ಈ ಹೊಸ ನೀತಿ ಮುಳುಗುತ್ತಿದ್ದ ಮಾರುಕಟ್ಟೆಗೆ ಸಂಜೀವಿನಿಯಾಗಿದೆ.
