ಕ್ರಿಕೆಟ್ ಅಭಿಮಾನಿಗಳಿಗೆ ಡಿಸೆಂಬರ್ 16ರಂದು ಒಂದೇ ದಿನ ಎರಡು ರಸದೌತಣ ಸಿಗಲಿದೆ. ಬೆಳಗ್ಗೆ 11 ಗಂಟೆಗೆ ಗೋವಾದಲ್ಲಿ ಐಪಿಎಲ್ 2027ರ ಆಟಗಾರರ ಹರಾಜು ಆರಂಭವಾದರೆ, ಮಧ್ಯಾಹ್ನ 2 ಗಂಟೆಗೆ ಬೆಂಗಳೂರಿನಲ್ಲಿ ಭಾರತ ಮತ್ತು ಶ್ರೀಲಂಕಾ ತಂಡಗಳ ನಡುವೆ ಏಕದಿನ ಪಂದ್ಯ ನಡೆಯಲಿದೆ. ಹೀಗಾಗಿ ಕ್ರಿಕೆಟ್ ಪ್ರಿಯರಿಗೆ ಅಂದು ಬೆಳಗ್ಗಿನಿಂದ ಸಂಜೆಯವರೆಗೂ ಕ್ರಿಕೆಟ್ ಸಂಭ್ರಮ ಇರಲಿದೆ.
ಹೌದು.ಕ್ರಿಕೆಟ್ ಅಭಿಮಾನಿಗಳಿಗೆ ಡಿಸೆಂಬರ್ 16ರಂದು ಹಬ್ಬದ ವಾತಾವರಣ ಸೃಷ್ಟಿಯಾಗಲಿದೆ. ಒಂದೆಡೆ ಐಪಿಎಲ್ 2027ರ ತಂಡಗಳಿಗೆ ಯಾವ ಆಟಗಾರರು ಸೇರ್ಪಡೆಯಾಗಲಿದ್ದಾರೆ ಎಂಬ ಕುತೂಹಲ, ಮತ್ತೊಂದೆಡೆ ಭಾರತ ಮತ್ತು ಶ್ರೀಲಂಕಾ ನಡುವಿನ ಏಕದಿನ ಕ್ರಿಕೆಟ್ ಪಂದ್ಯ. ಒಂದೇ ದಿನ ಎರಡು ಪ್ರಮುಖ ಕ್ರಿಕೆಟ್ ಆಕರ್ಷಣೆಗಳು ಅಭಿಮಾನಿಗಳನ್ನು ರಂಜಿಸಲಿವೆ.
2027ರ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಆಟಗಾರರ ಹರಾಜು ಪ್ರಕ್ರಿಯೆ ಡಿಸೆಂಬರ್ 16ರಂದು ಗೋವಾದಲ್ಲಿ ನಡೆಯಲಿದೆ. ಭಾರತೀಯ ಕಾಲಮಾನ ಬೆಳಗ್ಗೆ 11 ಗಂಟೆಗೆ ಹರಾಜು ಆರಂಭವಾಗಲಿದೆ. ಐಪಿಎಲ್ ಆಡಳಿತ ಮಂಡಳಿ ಬುಧವಾರ ತನ್ನ ಅಧಿಕೃತ X ಖಾತೆಯಲ್ಲಿ ಫೋಟೋ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ದಿನಾಂಕ, ಸ್ಥಳ ಮತ್ತು ಸಮಯವನ್ನು ಅಧಿಕೃತವಾಗಿ ಪ್ರಕಟಿಸಿದೆ.
ಬೆಳಗ್ಗೆ IPL ಹರಾಜು, ಮಧ್ಯಾಹ್ನ ಭಾರತ-ಶ್ರೀಲಂಕಾ ಪಂದ್ಯ!
ಡಿಸೆಂಬರ್ 16ರಂದು ಕ್ರಿಕೆಟ್ ಪ್ರಿಯರಿಗೆ ದಿನವಿಡೀ ಕ್ರಿಕೆಟ್ ಸಂಭ್ರಮ ಸಿಗಲಿದೆ. ಬೆಳಗ್ಗೆ 11 ಗಂಟೆಗೆ ಗೋವಾದಲ್ಲಿ ಐಪಿಎಲ್ 2027ರ ಆಟಗಾರರ ಹರಾಜು ಆರಂಭವಾಗಲಿದೆ. ಬಳಿಕ ಮಧ್ಯಾಹ್ನ 2 ಗಂಟೆಗೆ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಭಾರತ ಮತ್ತು ಶ್ರೀಲಂಕಾ ತಂಡಗಳು ಮುಖಾಮುಖಿಯಾಗಲಿವೆ.
ಮೂರು ಪಂದ್ಯಗಳ ಏಕದಿನ ಸರಣಿಯ ಎರಡನೇ ಪಂದ್ಯ ಅಂದು ನಡೆಯಲಿದೆ. ಹೀಗಾಗಿ ಅಭಿಮಾನಿಗಳು ಬೆಳಗ್ಗೆಯಿಂದಲೇ ಐಪಿಎಲ್ ಹರಾಜಿನತ್ತ ಗಮನಹರಿಸಿ, ಮಧ್ಯಾಹ್ನ ಭಾರತ-ಶ್ರೀಲಂಕಾ ನಡುವಿನ ರೋಚಕ ಪಂದ್ಯವನ್ನು ವೀಕ್ಷಿಸಬಹುದು.
ಯಾವ ತಂಡಕ್ಕೆ ಯಾರು ಸೇರ್ಪಡೆಯಾಗುತ್ತಾರೆ?
ಐಪಿಎಲ್ ಹರಾಜು ಎಂದರೆ ಕ್ರಿಕೆಟ್ ಅಭಿಮಾನಿಗಳಲ್ಲಿ ಸಹಜವಾಗಿಯೇ ಕುತೂಹಲ ಹೆಚ್ಚಾಗುತ್ತದೆ. ಯಾವ ಆಟಗಾರನಿಗೆ ಯಾವ ತಂಡ ಮಣೆ ಹಾಕಲಿದೆ? ಯುವ ಆಟಗಾರರಿಗೆ ಎಷ್ಟು ಬೇಡಿಕೆ ಬರಲಿದೆ? ಸ್ಟಾರ್ ಆಟಗಾರರನ್ನು ಖರೀದಿಸಲು ಫ್ರಾಂಚೈಸಿಗಳು ಎಷ್ಟು ಹಣ ಖರ್ಚು ಮಾಡಲಿವೆ? ಎಂಬ ಪ್ರಶ್ನೆಗಳು ಈಗಾಗಲೇ ಅಭಿಮಾನಿಗಳಲ್ಲಿ ಚರ್ಚೆಗೆ ಕಾರಣವಾಗಿವೆ.
ಹರಾಜಿನಲ್ಲಿ ನಡೆಯುವ ಆಟಗಾರರ ಖರೀದಿ ಪ್ರಕ್ರಿಯೆ ಮುಂದಿನ ಐಪಿಎಲ್ ಟೂರ್ನಿಯ ತಂಡಗಳ ಬಲಾಬಲದ ಮೇಲೆ ಪರಿಣಾಮ ಬೀರಲಿದೆ. ಹೀಗಾಗಿ ಎಲ್ಲಾ ಫ್ರಾಂಚೈಸಿಗಳ ನಡೆ ಕುತೂಹಲ ಮೂಡಿಸಿದೆ.
ಕಳೆದ ಬಾರಿ ಅಬುಧಾಬಿಯಲ್ಲಿ ನಡೆದಿತ್ತು ಹರಾಜು
ಕಳೆದ ಆವೃತ್ತಿಯ ಐಪಿಎಲ್ ಆಟಗಾರರ ಹರಾಜು ಅಬುಧಾಬಿಯ ಎತಿಹಾದ್ ಅರೆನಾದಲ್ಲಿ ನಡೆದಿತ್ತು. ಅದಕ್ಕೂ ಹಿಂದಿನ ಮೂರು ಹರಾಜುಗಳು ದುಬೈ, ಜೆಡ್ಡಾ ಮತ್ತು ಅಬುಧಾಬಿಯಲ್ಲಿ ನಡೆದಿದ್ದವು. ಇದೀಗ 2027ರ ಆವೃತ್ತಿಯ ಹರಾಜಿಗೆ ಗೋವಾ ಆತಿಥ್ಯ ವಹಿಸುತ್ತಿದೆ.
ವಿದೇಶಗಳಲ್ಲಿ ಹರಾಜು ಪ್ರಕ್ರಿಯೆ ನಡೆದ ಬಳಿಕ ಈ ಬಾರಿ ಭಾರತದಲ್ಲೇ ಆಯೋಜನೆಗೊಳ್ಳುತ್ತಿರುವುದು ವಿಶೇಷವಾಗಿದೆ. ಡಿಸೆಂಬರ್ 16ರಂದು ಬೆಳಗ್ಗೆಯಿಂದಲೇ ಕ್ರಿಕೆಟ್ ಅಭಿಮಾನಿಗಳ ಗಮನ ಗೋವಾದತ್ತ ಇರಲಿದೆ.