ತಮ್ಮ ವಿಭಿನ್ನ ಮತ್ತು ವಿಶಿಷ್ಟ ಫ್ಯಾಷನ್ ಶೈಲಿಯಿಂದಲೇ ಸದಾ ಸುದ್ದಿಯಲ್ಲಿರುವ ಬಾಲಿವುಡ್ ನಟಿ ಸೋನಮ್ ಕಪೂರ್, ಮುಂಬೈನಲ್ಲಿ ನಡೆದ ಆರನೇ ವಾರ್ಷಿಕ ‘ಅರ್ಥ್ಶಾಟ್ ಪ್ರೈಜ್ 2026’ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಎಲ್ಲರ ಕಣ್ಣು ಕುಕ್ಕುವಂತೆ ಮಿಂಚಿದ್ದಾರೆ. ಕೇವಲ ಗ್ಲಾಮರ್ಗೆ ಸೀಮಿತವಾಗದೆ, ಭಾರತೀಯ ಕಲಾ ಇತಿಹಾಸವನ್ನು ಸಾರುವ ಉಡುಗೆಯಲ್ಲಿ ಕಾಣಿಸಿಕೊಳ್ಳುವ ಮೂಲಕ ಸೋನಮ್ ಮತ್ತೊಮ್ಮೆ ಫ್ಯಾಷನ್ ಲೋಕದ ಗಮನ ಸೆಳೆದಿದ್ದಾರೆ.
ಖ್ಯಾತ ಚಿತ್ರಕಲಾವಿದೆ ಅಮೃತಾ ಶೇರ್-ಗಿಲ್ ಅವರು 1936ರಲ್ಲಿ ರಚಿಸಿದ ‘ಸುಮೇರ್’ ಎಂಬ ಪ್ರಸಿದ್ಧ ತೈಲವರ್ಣ ಚಿತ್ರದಿಂದ ಪ್ರೇರಿತವಾದ ಉಡುಪನ್ನು ಸೋನಮ್ ಧರಿಸಿದ್ದರು. ಖ್ಯಾತ ವಸ್ತ್ರವಿನ್ಯಾಸಕಿ ಅನಾಮಿಕಾ ಖನ್ನಾ ಈ ವಿಶೇಷ ಉಡುಪನ್ನು ವಿನ್ಯಾಸಗೊಳಿಸಿದ್ದು, ಸೋನಮ್ ಸಹೋದರಿ ರಿಯಾ ಕಪೂರ್ ಇದಕ್ಕೆ ಸ್ಟೈಲಿಂಗ್ ಮಾಡಿದ್ದಾರೆ.
1936ರ ಕಲಾಕೃತಿಗೆ ಆಧುನಿಕ ಫ್ಯಾಷನ್ ಸ್ಪರ್ಶ: ಅಮೃತಾ ಶೇರ್-ಗಿಲ್ ತಮ್ಮ ಸೋದರಸಂಬಂಧಿ ಸುಮೇರ್ ಅಪ್ಜಿತ್ ಸಿಂಗ್ ಅವರನ್ನು ಕಡು ಹಸಿರು ಸೀರೆಯುಟ್ಟು, ಕೈಯಲ್ಲಿ ಬಿಳಿ ಹೂವುಗಳ ಗುಚ್ಛ ಹಿಡಿದಿರುವಂತೆ 1936ರಲ್ಲಿ ಚಿತ್ರಿಸಿದ್ದರು. ಭಾರತೀಯ ಮತ್ತು ಪಾಶ್ಚಾತ್ಯ ಸಂಸ್ಕೃತಿಯ ಸಮ್ಮಿಲನದಂತಿದ್ದ ಆ ಕಲಾಕೃತಿಯನ್ನು ಬರೋಬ್ಬರಿ ಒಂಬತ್ತು ದಶಕಗಳ ನಂತರ ಅನಾಮಿಕಾ ಖನ್ನಾ ಆಧುನಿಕ ಶೈಲಿಯಲ್ಲಿ ಮರುಸೃಷ್ಟಿಸಿದ್ದಾರೆ. ಹಸಿರು ಛಾಯೆಗಳಲ್ಲಿ ಕೈಯಿಂದ ಚಿತ್ರಿಸಲಾದ ಶುದ್ಧ ಶಿಫಾನ್ ಸೀರೆಗೆ, ಪಾಶ್ಚಾತ್ಯ ಶೈಲಿಯ ಸಿಲ್ಕ್ ವೆಲ್ವೆಟ್ ಕೋಟ್ ಮತ್ತು ಅಂಚಿನಲ್ಲಿ ಸೂಕ್ಷ್ಮ ಜರ್ದೋಸಿ ಕಸೂತಿ ಕೆಲಸವಿರುವ ವಿನ್ಯಾಸದಲ್ಲಿ ಸೋನಮ್ ಕಂಗೊಳಿಸಿದ್ದಾರೆ.
400 ಕ್ಯಾರೆಟ್ ಪಚ್ಚೆ ಆಭರಣಗಳ ಮೆರುಗು: ಸೋನಮ್ ಅವರ ಈ ರಾಜವೈಭವದ ಉಡುಗೆಗೆ ಅಂಜಲಿ ಭೀಮ್ರಾಜ್ಕಾ ಫೈನ್ ಜ್ಯುವೆಲ್ಸ್ನ ಬರೋಬ್ಬರಿ 400 ಕ್ಯಾರೆಟ್ಗೂ ಅಧಿಕ ತೂಕದ ರಷ್ಯನ್ ಪಚ್ಚೆ (Emeralds) ಮತ್ತು ಸಾಂಪ್ರದಾಯಿಕ ಭಾರತೀಯ ಪೋಲ್ಕಿ ನೆಕ್ಲೇಸ್ ಇನ್ನಷ್ಟು ಮೆರುಗು ನೀಡಿತು. ಇದರೊಂದಿಗೆ ಆಮ್ರಪಾಲಿ ಜ್ಯುವೆಲ್ಸ್ನ ಕೊಲಂಬಿಯನ್ ಪಚ್ಚೆಯ ಇಯರ್ ಕಫ್ಗಳು ಹಾಗೂ ಬೃಹತ್ ಪಚ್ಚೆಯ ಉಂಗುರ ಎಲ್ಲರ ಗಮನ ಸೆಳೆಯಿತು. ಆಭರಣಗಳೇ ಪ್ರಮುಖ ಆಕರ್ಷಣೆಯಾಗಿದ್ದರಿಂದ ಸೋನಮ್ ಅತ್ಯಂತ ಸರಳ ಮೇಕಪ್, ನಡು ಬೈತಲೆ ತೆಗೆದ ನೇರ ಕೇಶವಿನ್ಯಾಸ ಹಾಗೂ ತಿಳಿ ಗುಲಾಬಿ ಬಣ್ಣದ ಲಿಪ್ಸ್ಟಿಕ್ನೊಂದಿಗೆ ಅತ್ಯಂತ ಆಕರ್ಷಕವಾಗಿ ಕಾಣಿಸಿಕೊಂಡಿದ್ದಾರೆ.