ಪ್ರತಿಷ್ಠಿತ 79ನೇ ಕಾನ್ ಚಲನಚಿತ್ರೋತ್ಸವದ ರೆಡ್ ಕಾರ್ಪೆಟ್ ಮೇಲೆ ಬಾಲಿವುಡ್ ನಟಿ ಊರ್ವಶಿ ರೌಟೇಲಾ ಸತತ ಐದನೇ ಬಾರಿಗೆ ಕಾಣಿಸಿಕೊಂಡಿದ್ದಾರೆ. ಪ್ರತಿ ವರ್ಷದಂತೆ ಈ ಬಾರಿಯೂ ತಮ್ಮ ವಿಭಿನ್ನ ಮತ್ತು ಅದ್ದೂರಿ ಉಡುಪಿನ ಮೂಲಕ ಸುದ್ದಿಯಾಗಲು ಹೋದ ನಟಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟೀಕೆಗಳು ವ್ಯಕ್ತವಾಗುತ್ತಿವೆ.
ಬೆಳ್ಳಿಯ ಬಣ್ಣದ ವಿಶಿಷ್ಟ ಉಡುಪು ವಿಯೆಟ್ನಾಂ ಮೂಲದ ‘ಜೋಲಿಪೋಲಿ ಕೌಚರ್’ ವಿನ್ಯಾಸಗೊಳಿಸಿದ ಬೆಳ್ಳಿಯ ಬಣ್ಣದ ಹರಳುಗಳಿಂದ ಕೂಡಿದ ಗೌನ್ ಧರಿಸಿ ಊರ್ವಶಿ ರೆಡ್ ಕಾರ್ಪೆಟ್ ಮೇಲೆ ಹೆಜ್ಜೆ ಹಾಕಿದರು. ಸಾವಿರಾರು ಸ್ಫಟಿಕಗಳು ಮತ್ತು ಮಣಿಗಳಿಂದ ಕೂಡಿದ ಈ ಉಡುಪಿನ ಜೊತೆಗೆ ತಲೆಗೆ ವಿಭಿನ್ನವಾದ ‘ಮಾಂಗ್ ಟಿಕಾ’ ಶೈಲಿಯ ಆಭರಣವನ್ನು ಅವರು ಧರಿಸಿದ್ದರು. ಅವರ ಈ ವಿಚಿತ್ರ ನೋಟ ಈಗ ಅಂತರಾಷ್ಟ್ರೀಯ ವೇದಿಕೆಯಲ್ಲಿ ಭಾರತೀಯ ಅಭಿಮಾನಿಗಳಿಗೆ ಮುಜುಗರ ತಂದಿದೆ ಎಂಬ ಚರ್ಚೆ ಶುರುವಾಗಿದೆ.
ಭಾರತವನ್ನು ಪ್ರತಿನಿಧಿಸುವ ಬಗ್ಗೆ ನೆಟ್ಟಿಗರ ಕಿಡಿ ಈ ಸಂದರ್ಭದಲ್ಲಿ ಮಾಧ್ಯಮವೊಂದರ ಜೊತೆ ಮಾತನಾಡಿದ ಊರ್ವಶಿ, “ಅಂತರಾಷ್ಟ್ರೀಯ ವೇದಿಕೆಯಲ್ಲಿ ನನ್ನ ದೇಶವನ್ನು ಪ್ರತಿನಿಧಿಸುತ್ತಿರುವುದಕ್ಕೆ ನನಗೆ ಹೆಮ್ಮೆ ಇದೆ” ಎಂದು ಹೇಳಿಕೊಂಡಿದ್ದರು. ಆದರೆ, ಈ ಹೇಳಿಕೆಯೇ ಈಗ ಅವರಿಗೆ ತಿರುಗುಬಾಣವಾಗಿದೆ. ವಿಯೆಟ್ನಾಂ ವಿನ್ಯಾಸಕಾರರ ಉಡುಪು ಧರಿಸಿ ಭಾರತವನ್ನು ಹೇಗೆ ಪ್ರತಿನಿಧಿಸುತ್ತೀರಿ? ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿಕ್ರಿಯಿಸಿರುವ ಅಭಿಮಾನಿಗಳು, “ದಯವಿಟ್ಟು ಈ ರೀತಿ ಭಾರತವನ್ನು ಪ್ರತಿನಿಧಿಸಬೇಡಿ, ಇದು ನಮಗೆ ಮುಜುಗರ ತರುತ್ತಿದೆ” ಎಂದು ಕಾಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು, “ಭಾರತೀಯ ಸಂಸ್ಕೃತಿಯನ್ನು ಪ್ರತಿನಿಧಿಸುವುದಾದರೆ ಸೀರೆ ಧರಿಸಬೇಕಿತ್ತು, ಈ ರೀತಿ ಅತಿಯಾದ ಮೇಕಪ್ ಮತ್ತು ವಿಚಿತ್ರ ಉಡುಪಿನಿಂದ ಅಲ್ಲ” ಎಂದು ಕಿಡಿ ಕಾರಿದ್ದಾರೆ.
ವೈರಲ್ ಟ್ರೋಲ್ಸ್ ಊರ್ವಶಿ ಅವರ ಮೇಕಪ್ ಮತ್ತು ಹೇರ್ಸ್ಟೈಲ್ ಬಗ್ಗೆಯೂ ಟ್ರೋಲ್ಗಳು ಶುರುವಾಗಿವೆ. “ಸ್ಥಳೀಯ ಬ್ಯೂಟಿ ಪಾರ್ಲರ್ನಲ್ಲಿ ಮಾಡಿಸಿಕೊಂಡ ಬ್ರೈಡಲ್ ಮೇಕಪ್ನಂತೆ ಕಾಣುತ್ತಿದೆ” ಎಂದು ಕೆಲವರು ಹಾಸ್ಯ ಮಾಡಿದರೆ, ಮತ್ತೆ ಕೆಲವರು ಇವರ ನೋಟವನ್ನು ‘ಬಾಲ್ ವೀರ್’ ಧಾರಾವಾಹಿಯ ಪಾತ್ರಗಳಿಗೆ ಹೋಲಿಸಿದ್ದಾರೆ. ಸತತ ಐದನೇ ವರ್ಷ ಕಾನ್ನಲ್ಲಿ ಕಾಣಿಸಿಕೊಳ್ಳುತ್ತಿರುವ ಊರ್ವಶಿ, ಫ್ಯಾಷನ್ ವಿಚಾರದಲ್ಲಿ ಮಾತ್ರ ಈ ಬಾರಿ ಪ್ರಶಂಸೆಗಿಂತ ಹೆಚ್ಚು ಟೀಕೆಗಳನ್ನೇ ಎದುರಿಸುತ್ತಿದ್ದಾರೆ.
