ಬೆಂಗಳೂರು: ಬಂಗಾರ ಅಂದರೆ ಇಷ್ಟಪಡದವರೇ ಇಲ್ಲ, ಅದರಲ್ಲೂ ಭಾರತೀಯ ಮಹಿಳೆಯರಿಗೆ ಚಿನ್ನದ ಮೇಲಿರುವ ಕ್ರೇಜ್ ಅಷ್ಟಿಷ್ಟಲ್ಲ. ಮದುವೆ, ಹಬ್ಬ, ಸಮಾರಂಭ ಯಾವುದೇ ಇರಲಿ, ರೇಷ್ಮೆ ಸೀರೆಯ ಜೊತೆಗೆ ಮಿನುಗುವ ಚಿನ್ನದ ಒಡವೆಗಳು ಇರಲೇಬೇಕು. ಕೇವಲ ಆಭರಣವಾಗಿ ಮಾತ್ರವಲ್ಲದೆ, ಇಂದಿನ ದಿನಗಳಲ್ಲಿ ಚಿನ್ನದ ಮೇಲಿನ ಹೂಡಿಕೆಯೂ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಲೇ ಇದೆ.
ಆದರೆ, ಭೂಮಿಯ ಮೇಲೆ ಬೆಳ್ಳಿ, ತಾಮ್ರ, ಅಲ್ಯೂಮಿನಿಯಂ ಸೇರಿದಂತೆ ಅನೇಕ ಲೋಹಗಳಿದ್ದರೂ, ಇವೆಲ್ಲವೂ ಹೆಚ್ಚಾಗಿ ಬಿಳಿ ಅಥವಾ ಬೂದು (Grey) ಬಣ್ಣದಲ್ಲಿ ಕಾಣಿಸುತ್ತವೆ. ಆದರೆ ಚಿನ್ನ ಮಾತ್ರ ನೈಸರ್ಗಿಕವಾಗಿ ಗಾಢ ಹಳದಿ ಬಣ್ಣವನ್ನು ಹೊಂದಿರುತ್ತದೆ. ಅಷ್ಟಕ್ಕೂ ಚಿನ್ನ ಯಾಕೆ ಹಳದಿ ಬಣ್ಣದಲ್ಲೇ ಇರುತ್ತದೆ ಎಂದು ನೀವು ಎಂದಾದರೂ ಯೋಚಿಸಿದ್ದೀರಾ? ಇದರ ಹಿಂದೆ ರೋಚಕ ವೈಜ್ಞಾನಿಕ ಕಾರಣವಿದೆ
ಹಳದಿ ಬಣ್ಣದ ಹಿಂದಿನ ತರಂಗಾಂತರಗಳ ಆಟ
ವಿಜ್ಞಾನದ ಪ್ರಕಾರ, ಯಾವುದೇ ಒಂದು ವಸ್ತುವಿನ ಬಣ್ಣವು ಅದು ಪ್ರತಿಫಲಿಸುವ (Reflect) ಬೆಳಕಿನ ತರಂಗಾಂತರಗಳ (Wavelengths) ಮೇಲೆ ಆಧಾರಿತವಾಗಿರುತ್ತದೆ. ಸೂರ್ಯನ ಬಿಳಿ ಬೆಳಕು ಒಂದು ವಸ್ತುವಿನ ಮೇಲೆ ಬಿದ್ದಾಗ, ಆ ವಸ್ತುವು ಕೆಲವು ಬಣ್ಣಗಳನ್ನು ಹೀರಿಕೊಂಡು, ಇನ್ನು ಕೆಲವು ಬಣ್ಣಗಳನ್ನು ಮರಳಿ ಪ್ರತಿಫಲಿಸುತ್ತದೆ. ಹೀಗೆ ಪ್ರತಿಫಲಿಸುವ ಬೆಳಕು ನಮ್ಮ ಕಣ್ಣುಗಳನ್ನು ತಲುಪಿದಾಗ, ನಮ್ಮ ಮೆದುಳು ಅದನ್ನು ಆ ವಸ್ತುವಿನ ಬಣ್ಣ ಎಂದು ಗುರುತಿಸುತ್ತದೆ.
ಬೆಳ್ಳಿ ಮತ್ತು ಅಲ್ಯೂಮಿನಿಯಂನಂತಹ ಲೋಹಗಳು ತಮ್ಮ ಮೇಲೆ ಬೀಳುವ ಸಂಪೂರ್ಣ ಗೋಚರ ವರ್ಣಪಟಲವನ್ನು (Visible Spectrum) ಪ್ರತಿಫಲಿಸುತ್ತವೆ. ಹಾಗಾಗಿ ಅವು ಬಿಳಿ ಅಥವಾ ಬೆಳ್ಳಿಯ ಬಣ್ಣದಲ್ಲಿ ಕಾಣಿಸುತ್ತವೆ. ಆದರೆ ಚಿನ್ನದ ವಿಷಯದಲ್ಲಿ ಇದು ಸಂಪೂರ್ಣ ಉಲ್ಟಾ ಆಗುತ್ತದೆ. ಚಿನ್ನವು ತನ್ನ ಮೇಲೆ ಬೀಳುವ ಸೂರ್ಯನ ಬೆಳಕಿನಲ್ಲಿರುವ ನೀಲಿ ಮತ್ತು ನೇರಳೆ ತರಂಗಾಂತರಗಳನ್ನು ಹೆಚ್ಚಾಗಿ ಹೀರಿಕೊಳ್ಳುತ್ತದೆ. ತದನಂತರ ಕೆಂಪು, ಕಿತ್ತಳೆ ಮತ್ತು ಹಳದಿ ತರಂಗಾಂತರಗಳನ್ನು ಮಾತ್ರ ನಮ್ಮ ಕಣ್ಣುಗಳಿಗೆ ಮರಳಿ ಪ್ರತಿಫಲಿಸುತ್ತದೆ. ಈ ಪ್ರತಿಫಲಿತ ಬಣ್ಣಗಳ ಸಂಯೋಜನೆಯೇ ಚಿನ್ನಕ್ಕೆ ಆಕರ್ಷಕ ಹಳದಿ ಹೊಳಪನ್ನು ನೀಡುತ್ತದೆ.
ಚಿನ್ನದ ಪರಮಾಣು ಮತ್ತು ಎಲೆಕ್ಟ್ರಾನ್ಗಳ ವೇಗ
ಚಿನ್ನದ ಪರಮಾಣು ಸಂಖ್ಯೆ (Atomic Number) 79 ಆಗಿದೆ. ಅಂದರೆ, ಪ್ರತಿ ಚಿನ್ನದ ಪರಮಾಣುವಿನ ನ್ಯೂಕ್ಲಿಯಸ್ 79 ಪ್ರೋಟಾನ್ಗಳನ್ನು ಹೊಂದಿರುತ್ತದೆ. ಈ ನ್ಯೂಕ್ಲಿಯಸ್ ತುಂಬಾ ಭಾರವಾಗಿರುವುದರಿಂದ, ಅದಕ್ಕೆ ಅತ್ಯಂತ ಹತ್ತಿರವಿರುವ ಒಳಗಿನ ಎಲೆಕ್ಟ್ರಾನ್ಗಳು ಭಾರಿ ಪ್ರಮಾಣದ ಆಕರ್ಷಕ ಶಕ್ತಿಯನ್ನು ಅನುಭವಿಸುತ್ತವೆ. ಈ ಕಾರಣದಿಂದಾಗಿ, ಚಿನ್ನದ ಒಳಗಿನ ಎಲೆಕ್ಟ್ರಾನ್ಗಳು ಬೆಳಕಿನ ವೇಗದ ಅರ್ಧದಷ್ಟು ಅತಿ ಹೆಚ್ಚಿನ ವೇಗದಲ್ಲಿ ನ್ಯೂಕ್ಲಿಯಸ್ ಸುತ್ತ ತಿರುಗುತ್ತವೆ!
ಐನ್ಸ್ಟೈನ್ನ ಸಾಪೇಕ್ಷತಾ ಸಿದ್ಧಾಂತದ ಕನೆಕ್ಷನ್
ಇಲ್ಲಿಯೇ ಮಹಾನ್ ವಿಜ್ಞಾನಿ ಆಲ್ಬರ್ಟ್ ಐನ್ಸ್ಟೈನ್ ಅವರ ಸಾಪೇಕ್ಷತಾ ಸಿದ್ಧಾಂತ (Theory of Relativity) ಕೆಲಸ ಮಾಡುತ್ತದೆ. ಈ ಸಿದ್ಧಾಂತದ ಪ್ರಕಾರ, ಅತಿ ಹೆಚ್ಚಿನ ವೇಗದಲ್ಲಿ ಚಲಿಸುವ ಕಣಗಳ ದ್ರವ್ಯರಾಶಿ (Mass) ಹೆಚ್ಚಾಗುತ್ತದೆ. ಇದು ಚಿನ್ನದ ಪರಮಾಣುವಿನಲ್ಲಿರುವ ಒಳಗಿನ ಎಲೆಕ್ಟ್ರಾನ್ ಕಕ್ಷೆಗಳನ್ನು ಸ್ವಲ್ಪ ಕುಗ್ಗಿಸುವಂತೆ ಮಾಡಿ ನ್ಯೂಕ್ಲಿಯಸ್ಗೆ ಹತ್ತಿರ ತರುತ್ತದೆ.
ಯಾವಾಗ ಎಲೆಕ್ಟ್ರಾನ್ ಕಕ್ಷೆಗಳು ಕುಗ್ಗುತ್ತವೆಯೋ, ಆಗ ಎಲೆಕ್ಟ್ರಾನ್ಗಳು ವಿಭಿನ್ನ ಶಕ್ತಿಯ ಮಟ್ಟಗಳ ನಡುವೆ ಚಲಿಸಲು ಅಗತ್ಯವಿರುವ ಶಕ್ತಿಯ ಪ್ರಮಾಣ ಬದಲಾಗುತ್ತದೆ. ಈ ಬದಲಾವಣೆಯಿಂದಾಗಿ ಚಿನ್ನವು ನೀಲಿ ಬೆಳಕನ್ನು ಹೀರಿಕೊಂಡು, ಹಳದಿ ಮತ್ತು ಕೆಂಪು ಬೆಳಕನ್ನು ಹೊರಹಾಕುತ್ತದೆ. ಇದೇ ಕಾರಣಕ್ಕೆ ಜಗತ್ತಿನ ಬೇರೆ ಲೋಹಗಳಿಗೆ ಸಿಗದ ವಿಶಿಷ್ಟ ಹಳದಿ ಬಣ್ಣ ನಮ್ಮ ಪ್ರೀತಿಯ ಬಂಗಾರಕ್ಕೆ ಸಿಕ್ಕಿದೆ.
ಮುಂದಿನ ಬಾರಿ ನೀವು ಚಿನ್ನದ ಒಡವೆ ಧರಿಸಿದಾಗ ಅಥವಾ ಖರೀದಿಸುವಾಗ, ಅದರ ಹೊಳಪಿನ ಹಿಂದೆ ಐನ್ಸ್ಟೈನ್ ಅವರ ಸಾಪೇಕ್ಷತಾ ಸಿದ್ಧಾಂತ ಅಡಗಿದೆ ಎಂಬ ಅಪರೂಪದ ವಿಷಯ ನಿಮ್ಮ ನೆನಪಿನಲ್ಲಿರಲಿ
