ಬೆಳಗಾವಿ : ಬೆಳಗಾವಿ ಜಿಲ್ಲೆಯ ಅಥಣಿ ಪಟ್ಟಣದಲ್ಲಿ ಸಂಚಾರ ಪೊಲೀಸರ ತಂತ್ರಜ್ಞಾನದ ಬಳಕೆಯ ಎಡವಟ್ಟಿನಿಂದ ವಿಚಿತ್ರ ಘಟನೆಯೊಂದು ಸಂಭವಿಸಿದೆ. ಕಾರು ಓಡಿಸುವಾಗ ಹೆಲ್ಮೆಟ್ ಧರಿಸಿಲ್ಲ ಎಂಬ ಕಾರಣ ನೀಡಿ ಕಾರು ಮಾಲೀಕರೊಬ್ಬರಿಗೆ ದಂಡ ವಿಧಿಸಿರುವ ಘಟನೆ ಸಾರ್ವಜನಿಕರಲ್ಲಿ ಆಶ್ಚರ್ಯ ಹಾಗೂ ನಗುವಿಗೆ ಕಾರಣವಾಗಿದೆ. ವಾಟ್ಸಪ್‌ನಲ್ಲಿ ಬಂದ ನೋಟಿಸ್ ಕಂಡು ಕಾರು ಮಾಲೀಕ ಸಂಪೂರ್ಣವಾಗಿ ತಬ್ಬಿಬ್ಬಾಗಿದ್ದಾರೆ.
ಅಥಣಿ ಪಟ್ಟಣದ ನಿವಾಸಿ ಸುಭಾಷ್ ಬೋಜನೆ ಎಂಬುವವರು ಇತ್ತೀಚೆಗೆ ತಮ್ಮ ಕಾರಿನಲ್ಲಿ ಕೆಲಸದ ನಿಮಿತ್ತ ಹೊರಗಡೆ ಹೋಗಿದ್ದರು. ಈ ವೇಳೆ ಪಟ್ಟಣದ ಪ್ರಮುಖ ಅಂಬೇಡ್ಕರ್ ಸರ್ಕಲ್‌ನಲ್ಲಿ ಕಾರು ಪ್ರಯಾಣಿಸುತ್ತಿದ್ದಾಗ, ಅಲ್ಲಿ ಅಳವಡಿಸಲಾಗಿದ್ದ ಎಐ (ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್) ಕ್ಯಾಮೆರಾ ಕಾರಿನ ಫೋಟೋವನ್ನು ಸೆರೆಹಿಡಿದಿದೆ. ಆದರೆ, ಕಾರಿನಲ್ಲಿದ್ದ ಚಾಲಕ ಹೆಲ್ಮೆಟ್ ಧರಿಸಿಲ್ಲವೆಂದು ತಂತ್ರಜ್ಞಾನ ತಪ್ಪಾಗಿ ಗ್ರಹಿಸಿ ನೋಟಿಸ್ ಕಳುಹಿಸಿದೆ.
ಎಐ ಕ್ಯಾಮೆರಾ ಕಳುಹಿಸಿದ ಸಂದೇಶ ಹಾಗೂ ಫೋಟೋವನ್ನು ಸರಿಯಾಗಿ ಪರಿಶೀಲಿಸದ ಸಂಚಾರ ಪೊಲೀಸರು, ನಿಯಮ ಉಲ್ಲಂಘನೆಯಾಗಿದೆ ಎಂದು ಪರಿಗಣಿಸಿ ಸುಭಾಷ್ ಅವರ ವಾಟ್ಸಪ್ ಸಂಖ್ಯೆಗೆ 500 ರೂಪಾಯಿ ದಂಡದ ನೋಟಿಸ್ ರವಾನಿಸಿದ್ದಾರೆ. ವಾಟ್ಸಪ್‌ನಲ್ಲಿ ಕಾರಿನ ಫೋಟೋದೊಂದಿಗೆ ಬಂದ ದಂಡದ ನೋಟಿಸ್ ನೋಡಿ ಮಾಲೀಕ ಸುಭಾಷ್ ಶಾಕ್‌ಗೆ ಒಳಗಾಗಿದ್ದು, "ಕಾರು ಓಡಿಸುವಾಗಲೂ ಹೆಲ್ಮೆಟ್ ಧರಿಸಬೇಕೇ?" ಎಂದು ಪ್ರಶ್ನಿಸಿದ್ದಾರೆ.
ಬೆಳಗಾವಿ ಜಿಲ್ಲಾ ಸಂಚಾರ ಪೊಲೀಸರು ಕಾರು ಚಾಲಕರಿಗೂ ಹೆಲ್ಮೆಟ್ ಕಡ್ಡಾಯಗೊಳಿಸುವಂತಹ ಹೊಸ ನಿಯಮವನ್ನೇನಾದರೂ ಜಾರಿಗೆ ತಂದಿದ್ದಾರೆಯೇ ಎಂದು ಸಾರ್ವಜನಿಕರು ತಮಾಷೆಯಾಗಿ ಚರ್ಚಿಸುತ್ತಿದ್ದಾರೆ. ಸಂಚಾರ ವ್ಯವಸ್ಥೆಯಲ್ಲಿ ಎಐ ಕ್ಯಾಮೆರಾಗಳು ಮತ್ತು ಆಧುನಿಕ ತಂತ್ರಜ್ಞಾನದ ಅತಿಯಾದ ನಂಬಿಕೆಯಿಂದ ಎಂತಹ ಎಡವಟ್ಟುಗಳು ಉಂಟಾಗುತ್ತವೆ ಎಂಬುದಕ್ಕೆ ಈ ಘಟನೆ ಸ್ಪಷ್ಟ ಉದಾಹರಣೆಯಾಗಿದೆ.
ಈ ಘಟನೆಯ ನಂತರ ಕಾರು ಮಾಲೀಕ ಸುಭಾಷ್ ಅವರು ಸ್ವತಃ ಹೆಲ್ಮೆಟ್ ಧರಿಸಿ ಕಾರು ಓಡಿಸುವ ಮೂಲಕ ಎಐ ತಂತ್ರಜ್ಞಾನ ಹಾಗೂ ಪೊಲೀಸರ ನಿರ್ಲಕ್ಷ್ಯದ ಎಡವಟ್ಟನ್ನು ಸಾರ್ವಜನಿಕವಾಗಿ ಬಯಲಿಗೆಳೆದಿದ್ದಾರೆ. ಸೂಕ್ತ ಪರಿಶೀಲನೆ ನಡೆಸದೇ ದಂಡದ ನೋಟಿಸ್ ಕಳುಹಿಸುವ ವ್ಯವಸ್ಥೆಯ ವಿರುದ್ಧ ವಾಹನ ಸವಾರರು ಅಸಮಾಧಾನ ವ್ಯಕ್ತಪಡಿಸಿದ್ದು, ಪೊಲೀಸರು ಇನ್ಮುಂದೆಯಾದರೂ ಪರಿಶೀಲಿಸಿ ನೋಟಿಸ್ ಕಳುಹಿಸಲಿ ಎಂದು ಆಗ್ರಹಿಸಿದ್ದಾರೆ.
