ಕುಟುಂಬಗಳಲ್ಲಿ ಆಸ್ತಿ ಹಂಚಿಕೆ ವಿಚಾರವಾಗಿ ವಿವಾದಗಳು ಸಾಮಾನ್ಯ. ಅದರಲ್ಲೂ ತಂದೆಯ ಆಸ್ತಿಯಲ್ಲಿ ಹೆಣ್ಣುಮಕ್ಕಳಿಗೆ ಹಕ್ಕಿದೆಯೇ, ತಂದೆ ಬದುಕಿರುವಾಗಲೇ ಮಗಳು ಪಾಲು ಕೇಳಬಹುದೇ ಎಂಬ ಗೊಂದಲ ಹಲವರಲ್ಲಿದೆ. ಹಿಂದೂ ಉತ್ತರಾಧಿಕಾರ ಕಾಯ್ದೆಯ ನಿಯಮಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡರೆ ಇಂತಹ ಕೌಟುಂಬಿಕ ಕಲಹಗಳನ್ನು ಸುಲಭವಾಗಿ ತಪ್ಪಿಸಬಹುದು. ಈ ಕುರಿತ ಕಾನೂನು ನಿಬಂಧನೆಗಳ ವಿವರ ಇಲ್ಲಿದೆ.
ಪೂರ್ವಜರ ಆಸ್ತಿಯಲ್ಲಿ ಸಮಾನ ಹಕ್ಕು
ತಂದೆಗೆ ತನ್ನ ಪೂರ್ವಜರಿಂದ (ಅಜ್ಜ-ಮುತ್ತಜ್ಜರಿಂದ) ಬಂದ ಪಿತ್ರಾರ್ಜಿತ ಆಸ್ತಿಯಾಗಿದ್ದರೆ, ಅದರಲ್ಲಿ ಮಗನಂತೆಯೇ ಮಗಳಿಗೂ ಹುಟ್ಟಿನಿಂದಲೇ ಸಮಾನ ಹಕ್ಕಿರುತ್ತದೆ.
ಪೂರ್ವಜರ ಆಸ್ತಿಯಲ್ಲಿ ತಂದೆ ಜೀವಂತವಾಗಿದ್ದಾಗಲೇ ಮಗಳು ಕಾನೂನುಬದ್ಧವಾಗಿ ತನ್ನ ಪಾಲನ್ನು ಕೇಳಬಹುದು.
ತಂದೆ ಪಾಲು ನೀಡಲು ನಿರಾಕರಿಸಿದರೆ ನ್ಯಾಯಾಲಯದ ಮೊರೆ ಹೋಗಲು ಕಾನೂನಿನಲ್ಲಿ ಅವಕಾಶವಿದೆ.
ಮಕ್ಕಳ ಒಪ್ಪಿಗೆಯಿಲ್ಲದೆ ತಂದೆ ಇಂತಹ ಪಿತ್ರಾರ್ಜಿತ ಆಸ್ತಿಯನ್ನು ಪರಭಾರೆ ಮಾಡಲು ಅಥವಾ ಮಾರಾಟ ಮಾಡಲು ಸಾಧ್ಯವಿಲ್ಲ.
ಸ್ವಯಾರ್ಜಿತ ಆಸ್ತಿಗೆ ನಿಯಮಗಳೇನು?
ತಂದೆ ತನ್ನ ಸ್ವಂತ ದುಡಿಮೆ ಅಥವಾ ಸ್ವಂತ ಪರಿಶ್ರಮದಿಂದ ಸಂಪಾದಿಸಿದ ಆಸ್ತಿಯಾಗಿದ್ದರೆ ನಿಯಮಗಳು ಸಂಪೂರ್ಣವಾಗಿ ಭಿನ್ನವಾಗಿರುತ್ತವೆ:
ಸ್ವಯಾರ್ಜಿತ ಆಸ್ತಿಯ ಮೇಲೆ ತಂದೆಗೆ ಸಂಪೂರ್ಣ ವೈಯಕ್ತಿಕ ಅಧಿಕಾರವಿರುತ್ತದೆ.
ಈ ಆಸ್ತಿಯನ್ನು ತಂದೆ ಜೀವಂತವಾಗಿರುವಾಗ ಪಾಲು ನೀಡುವಂತೆ ಕೇಳುವ ಹಕ್ಕು ಮಗನಿಗಾಗಲಿ, ಮಗಳಿಗಾಗಲಿ ಇರುವುದಿಲ್ಲ.
ತಂದೆ ತನ್ನ ಇಷ್ಟದಂತೆ ಆಸ್ತಿಯನ್ನು ಯಾರಿಗಾದರೂ ಮಾರಾಟ ಮಾಡಬಹುದು, ಉಡುಗೊರೆಯಾಗಿ (Gift Deed) ನೀಡಬಹುದು ಅಥವಾ ಯಾರ ಹೆಸರಿಗಾದರೂ ವಿಲ್ (ಉಯಿಲು) ಬರೆಯಬಹುದು.
ವಿಲ್ ಬರೆಯದೆ ತಂದೆ ಮೃತಪಟ್ಟರೆ?
ಒಂದು ವೇಳೆ ತಂದೆ ತನ್ನ ಸ್ವಯಾರ್ಜಿತ ಆಸ್ತಿಗೆ ಯಾವುದೇ ವಿಲ್ ಬರೆಯದೆ ಮೃತಪಟ್ಟರೆ, ಆ ಆಸ್ತಿಯು ಕಾನೂನುಬದ್ಧವಾಗಿ ಆತನ ಹೆಂಡತಿ, ಪುತ್ರರು ಮತ್ತು ಪುತ್ರಿಯರಿಗೆ ಸಮಾನವಾಗಿ ಹಂಚಿಕೆಯಾಗುತ್ತದೆ.
ಕಾನೂನಿನ ಸ್ಪಷ್ಟ ಅರಿವಿದ್ದರೆ ಮತ್ತು ಸ್ವಯಾರ್ಜಿತ ಆಸ್ತಿಗೆ ಸಂಬಂಧಿಸಿದಂತೆ ಜೀವಿತಾವಧಿಯಲ್ಲೇ ಸೂಕ್ತ ವಿಲ್ ಸಿದ್ಧಪಡಿಸಿಕೊಂಡರೆ ಮುಂದಿನ ಪೀಳಿಗೆಯಲ್ಲಿ ಆಸ್ತಿ ಕಲಹಗಳು ತಲೆದೋರುವುದಿಲ್ಲ.
