ಬಂಗಾಳಿ ಪಾಕಪದ್ಧತಿ ಅಂದರೆ ಕೇವಲ ಮೀನು ಸಾರು ಮತ್ತು ಅನ್ನ ಮಾತ್ರವಲ್ಲ, ಅಲ್ಲಿನ ಸಾಂಪ್ರದಾಯಿಕ ಸಸ್ಯಾಹಾರಿ ಅಡುಗೆಗಳೂ ಕೂಡ ಅತ್ಯಂತ ಜನಪ್ರಿಯವಾಗಿವೆ. ಅಂತಹ ವಿಶೇಷ ಮತ್ತು ಸಾಂಪ್ರದಾಯಿಕ ಖಾದ್ಯಗಳಲ್ಲಿ ‘ಕುಮ್ರೋರ್ ಚೊಕ್ಕಾ’ (Kumror Chokka) ಕೂಡ ಒಂದು. ಸಿಹಿಗುಂಬಳಕಾಯಿ ಮತ್ತು ಆಲೂಗಡ್ಡೆಯನ್ನು ಬಳಸಿ ತಯಾರಿಸುವ ಈ ಸಾಂಪ್ರದಾಯಿಕ ಕರಿಯು ಊಟದ ರುಚಿಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ.
ಈ ಹೆಸರಿನ ಹಿನ್ನೆಲೆಯೂ ಬಹಳ ವಿಶೇಷವಾಗಿದೆ. ಬಂಗಾಳಿ ಭಾಷೆಯಲ್ಲಿ ‘ಕುಮ್ರೋರ್’ ಅಂದರೆ ಕುಂಬಳಕಾಯಿ ಎಂದರ್ಥ ಮತ್ತು ‘ಚೊಕ್ಕಾ’ ಎಂದರೆ ತರಕಾರಿಗಳನ್ನು ಕತ್ತರಿಸಿ ತಯಾರಿಸುವ ಒಂದು ವಿಶಿಷ್ಟ ಶೈಲಿಯನ್ನು ಸೂಚಿಸುತ್ತದೆ. ಬಂಗಾಳಿ ಅಡುಗೆಯಲ್ಲಿ ತರಕಾರಿಗಳನ್ನು ಕತ್ತರಿಸುವ ಹಾಗೂ ಬೇಯಿಸುವ ವಿಧಾನಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತದೆ. ಇತ್ತೀಚೆಗೆ ಕಂಟೆಂಟ್ ಕ್ರಿಯೇಟರ್ ಪ್ರದೀಪ್ತಾ ಅವರು ಈ ಸಾಂಪ್ರದಾಯಿಕ ರೆಸಿಪಿಯನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಳ್ಳುವ ಮೂಲಕ ಆಹಾರಪ್ರಿಯರ ಗಮನ ಸೆಳೆದಿದ್ದಾರೆ.
ಈ ಖಾದ್ಯದ ವಿಶೇಷತೆಯೆಂದರೆ ಇದರಲ್ಲಿ ಬಳಸುವ ‘ಪಂಚಫೋರನ್’ (Panch Phoron) ಎಂಬ ಐದು ಮಸಾಲೆಗಳ ಮಿಶ್ರಣ ಹಾಗೂ ವಿಶೇಷ ‘ಭಜಾ ಮೊಶ್ಲಾ’ (Bhaja Moshla). ಸಿಹಿಗುಂಬಳಕಾಯಿ, ಆಲೂಗಡ್ಡೆ, ಕಪ್ಪು ಕಡಲೆ, ಹಸಿ ತೆಂಗಿನತುರಿ, ಸಾಸಿವೆ ಎಣ್ಣೆ ಹಾಗೂ ಹುಣಸೆಹಣ್ಣಿನ ತಿರುಳಿನೊಂದಿಗೆ ತಯಾರಿಸುವ ಈ ಕರಿಯು ವಿಭಿನ್ನವಾದ ಪರಿಮಳ ಮತ್ತು ಸವಿ ಹೊಂದಿದೆ. ಇದನ್ನು ಸಾಮಾನ್ಯವಾಗಿ ಪೂರಿ ಅಥವಾ ಬಿಸಿ ಅನ್ನದೊಂದಿಗೆ ಸವಿಯಲಾಗುತ್ತದೆ.
ಮಾಡುವ ವಿಧಾನದ ಸಂಕ್ಷಿಪ್ತ ರೂಪುರೇಷೆ: ಮೊದಲು ಬಾಣಲೆಯಲ್ಲಿ ಸಾಸಿವೆ ಎಣ್ಣೆಯನ್ನು ಕಾಯಿಸಿ, ಕತ್ತರಿಸಿದ ಸಿಹಿಗುಂಬಳಕಾಯಿಯನ್ನು ಗೋಲ್ಡನ್ ಬ್ರೌನ್ ಬರುವವರೆಗೆ ಹುರಿದು ತೆಗೆದಿಟ್ಟುಕೊಳ್ಳಬೇಕು. ಅದೇ ಬಾಣಲೆಗೆ ಪಂಚಫೋರನ್, ಒಣ ಮೆಣಸಿನಕಾಯಿ, ತೇಜಪಾತ ಮತ್ತು ಇಂಗು ಹಾಕಿ ಒಗ್ಗರಣೆ ನೀಡಬೇಕು. ನಂತರ ಆಲೂಗಡ್ಡೆ ಸೇರಿಸಿ ಲೈಟಾಗಿ ಹುರಿದು ಬೇಯಿಸಬೇಕು. ಶುಂಠಿ ಪೇಸ್ಟ್, ಜೀರಿಗೆ ಪುಡಿ, ಕಾಶ್ಮೀರಿ ಮೆಣಸಿನಕಾಯಿ ಪುಡಿ ಹಾಗೂ ಅರಿಶಿನದ ಮಿಶ್ರಣವನ್ನು ಹಾಕಿ ಹುರಿದು, ಬಳಿಕ ಕಪ್ಪು ಕಡಲೆ ಮತ್ತು ತೆಂಗಿನತುರಿ ಸೇರಿಸಬೇಕು. ಅಂತಿಮವಾಗಿ ಹುರಿದಿಟ್ಟ ಕುಂಬಳಕಾಯಿ, ಹುಣಸೆ ಹಣ್ಣಿನ ತಿರುಳು ಹಾಗೂ ಅಗತ್ಯವಿದ್ದರೆ ಬಿಸಿ ನೀರು ಸೇರಿಸಿ ಚೆನ್ನಾಗಿ ಬೇಯಿಸಿ, ಕೊನೆಯಲ್ಲಿ ‘ಭಜಾ ಮೊಶ್ಲಾ’ ಪುಡಿಯನ್ನು ಉದುರಿಸಿದರೆ ರುಚಿಕರವಾದ ಕುಮ್ರೋರ್ ಚೊಕ್ಕಾ ಸಿದ್ಧವಾಗುತ್ತದೆ.
