ಭೋಪಾಲ್: ಡೆಟಾಲ್ ಸೋಪಿನೊಳಗೆ ಬ್ಲೇಡ್ ಪತ್ತೆಯಾಅಗಿರುವ ಘಟನೆ ಬೆಳಕಿಗೆ ಬಂದಿದೆ. ಸೋಪ್ ನಲ್ಲಿದ್ದ ಬ್ಲೇಡ್ನಿಂದ ಮಗುವೊಂದಕ್ಕೆ ಗಾಯವಾಗಿದ್ದು, ಈ ಹಿನ್ನೆಲೆಯಲ್ಲಿ ಜಿಲ್ಲಾ ಗ್ರಾಹಕ ನ್ಯಾಯಾಲಯವೊಂದು ಪರಿಹಾರಕ್ಕೆ ಆದೇಶಿಸಿದೆ.
ಮಗುವಿನ ಪೋಷಕರಿಗೆ 50,000 ರೂ ಪರಿಹಾರವನ್ನು ನೀಡುವಂತೆ ಡೆಟಾಲ್ ಸೋಪ್ ತಯಾರಕ ರೆಕಿಟ್ ಇಂಡಿಯಾ ಲಿಮಿಟೆಡ್ ಕಂಪನಿಗೆ ಜಿಲ್ಲಾ ಗ್ರಾಹಕ ಆಯೋಗವು ನಿರ್ದೇಶನ ನೀಡಿದೆ.
ಮಗು ಸ್ನಾನ ಮಾಡುವಾಗ ಡೆಟಾಲ್ ಸೋಪ್ ನಲ್ಲಿದ್ದ ಬ್ಲೇಡ್ ನಿಂದ ಅದರ ಕೆನ್ನೆಗೆ ಗೀರಾಗಿತ್ತು. ಕೆನ್ನೆಯಿಂದ ರಕ್ತ ಬರುವುದನ್ನು ಕಂಡ ಪೋಷಕರು ಕಾರಣ ಏನಿರಬಹುದು ಎಂದು ಶೋಧಿಸಿದ್ದಾರೆ. ಆ ಸೋಪಿನಲ್ಲಿ ಹುದುಗಿದ್ದ ಬ್ಲೇಡ್ನಿಂದ ಗಾಯವಾಗಿರುವುದು ಅವರ ಗಮನಕ್ಕೆ ಬಂದಿದೆ.
ಆ ಸೋಪನ್ನು ತಂದ ಅಂಗಡಿಗೆ ಹೋಗಿ ಮತ್ತೊಂದು ಸೋಪು ತಂದಿದ್ದಾರೆ. ವಿಚಿತ್ರವೆಂದರೆ, ಹೊಸ ಸೋಪಿನಲ್ಲೂ ಬ್ಲೇಡ್ ಕಂಡು ಬಂದಿದೆ. ಆಗ ಮಗುವಿನ ಕುಟುಂಬವು ಗ್ರಾಹಕ ಆಯೋಗಕ್ಕೆ ದೂರು ನೀಡಿದೆ.
ದೂರು ಪರಿಶೀಲಿಸಿದ ಜಿಲ್ಲಾ ಗ್ರಾಹಕ ವ್ಯಾಜ್ಯ ಪರಿಹಾರ ಆಯೋಗದ ಅಧ್ಯಕ್ಷ ರಾಜೇಂದ್ರ ಪ್ರಸಾದ್ ಅವರು ಪರಿಹಾರವಾಗಿ 50,000 ರೂ ಪಾವತಿಸುವಂತೆ ರೆಕಿಟ್ ಇಂಡಿಯಾ ಲಿಮಿಟೆಡ್ ಕಂಪನಿಗೆ ನಿರ್ದೇಶನ ನೀಡಿದ್ದಾರೆ. ಅಷ್ಟೇ ಅಲ್ಲ, ಅಂಗಡಿಯವ ಮತ್ತು ವಿತರಕರು ತಲಾ 2,000 ರೂ ಪಾವತಿಸುವಂತೆಯೂ ಆಯೋಗವು ಆದೇಶ ಹೊರಡಿಸಿದೆ.
ರೆಕಿಟ್ ಇಂಡಿಯಾ ಕಂಪನಿ 50,000 ರೂ, ಅಂಗಡಿಯವ 2,000 ರೂ ಮತ್ತು ಡಿಸ್ಟ್ರಿಬ್ಯೂಟರ್ 2,000 ರೂ ಹಣವನ್ನು 45 ದಿನದೊಳಗೆ ಪಾವತಿಸಬೇಕು. ಇಲ್ಲದಿದ್ದರೆ ವರ್ಷಕ್ಕೆ ಶೇ. 6ರಂತೆ ಬಡ್ಡಿ ಸೇರಿಸಿ ಕೊಡಬೇಕಾಗುತ್ತದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.