ದುಬೈನಿಂದ ಟೆಲ್ ಅವೀವ್ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನ FZ1073 ಬುಧವಾರ ಮಧ್ಯ ಆಕಾಶದಲ್ಲಿ ತೀವ್ರ ಭದ್ರತಾ ಆತಂಕ ಸೃಷ್ಟಿಸಿತು. ವಿಮಾನದಿಂದ ತುರ್ತು ಸಂಕೇತಗಳು ರವಾನೆಯಾಗಿದ್ದು, ಸೌದಿ ಅರೇಬಿಯಾ ವಾಯುಪ್ರದೇಶದಲ್ಲಿ ಮಾರ್ಗ ಬದಲಾಯಿಸಿತು. ಕೆಲಕಾಲ ಹೈಜಾಕ್ಗೆ ಸಂಬಂಧಿಸಿದ ಅಂತರರಾಷ್ಟ್ರೀಯ ಕೋಡ್ ಕೂಡ ಪ್ರಸಾರವಾಗಿತ್ತು.
ವಿಮಾನದಲ್ಲಿದ್ದ ಸುಮಾರು 180 ಪ್ರಯಾಣಿಕರ ಸುರಕ್ಷತೆ ಬಗ್ಗೆ ಆತಂಕ ಉಂಟಾಗಿತ್ತು. ಇಸ್ರೇಲ್ ಯುದ್ಧವಿಮಾನಗಳನ್ನು ಕೂಡ ಕಾರ್ಯಾಚರಣೆಗೆ ಕಳುಹಿಸಿತ್ತು. ಆದರೆ ಕೊನೆಗೆ ವಿಮಾನ ಸುರಕ್ಷಿತವಾಗಿ ಸೌದಿ ಅರೇಬಿಯಾದಲ್ಲಿ ಇಳಿಯಿತು.
ನಂತರದ ಮಾಹಿತಿಯ ಪ್ರಕಾರ ಇದು ಹೈಜಾಕ್ ಪ್ರಕರಣವಲ್ಲ ಎಂದು ಇಸ್ರೇಲಿ ಅಧಿಕಾರಿಗಳು ತಿಳಿಸಿದ್ದಾರೆ. ಬದಲಾಗಿ, ಕಾಕ್ಪಿಟ್ನಲ್ಲೇ ಇಬ್ಬರು ಪೈಲಟ್ಗಳ ನಡುವೆ ತೀವ್ರ ಸಂಘರ್ಷ ನಡೆದಿರುವ ಸಾಧ್ಯತೆ ಕುರಿತು ವರದಿಗಳು ಬಂದಿವೆ. ಪ್ರಯಾಣಿಕರು ವಿಮಾನದಲ್ಲಿ ಕಿರುಚಾಟ ಹಾಗೂ ರಕ್ತದ ದೃಶ್ಯ ಕಂಡಿದ್ದಾಗಿ ಹೇಳಿದ್ದಾರೆ.
ಇಸ್ರೇಲಿ ಅಧಿಕಾರಿಗಳು ಈ ಘಟನೆಯನ್ನು ಭಯೋತ್ಪಾದಕ ದಾಳಿಯ ಪ್ರಯತ್ನವೆಂದು ಪರಿಗಣಿಸುತ್ತಿದ್ದಾರೆ ಎಂಬ ವರದಿಗಳೂ ಬಂದಿವೆ. ಇಸ್ರೇಲಿ ಚಾನೆಲ್ N12 ಮೂಲಗಳನ್ನು ಉಲ್ಲೇಖಿಸಿ, ವಿಮಾನವನ್ನು ಅಪಹರಿಸಲು ಅಥವಾ ಪತನಗೊಳಿಸಲು ಯತ್ನಿಸಿದ ಸಹ-ಪೈಲಟ್ ಒಮಾನಿ ಮತ್ತು ಮುಖ್ಯ ಪೈಲಟ್ ಎಮಿರಾತಿ ಎಂದು ವರದಿ ಮಾಡಿದೆ. ಈ ಮಾಹಿತಿಯ ಕುರಿತು ಹೆಚ್ಚಿನ ತನಿಖೆ ನಡೆಯುತ್ತಿದೆ.
ಘಟನೆ ಆರಂಭವಾಗಿದ್ದು ಹೇಗೆ?
ಫ್ಲೈದುಬೈಯ FZ1073 ವಿಮಾನ ಬುಧವಾರ ಬೆಳಗ್ಗೆ ದುಬೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಟೆಲ್ ಅವೀವ್ನ ಬೆನ್ ಗುರಿಯನ್ ವಿಮಾನ ನಿಲ್ದಾಣದತ್ತ ಹೊರಟಿತ್ತು.
ವಿಮಾನ ಹಾರಾಟ ಆರಂಭಿಸಿ ಸುಮಾರು ಎರಡು ಗಂಟೆಗಳ ನಂತರ Squawk 7700 ತುರ್ತು ಸಂಕೇತವನ್ನು ರವಾನಿಸಿತು. ಇದು ವಿಮಾನದಲ್ಲಿ ಸಾಮಾನ್ಯ ತುರ್ತು ಪರಿಸ್ಥಿತಿ ಎದುರಾಗಿದೆ ಎಂಬುದನ್ನು ಸೂಚಿಸುವ ಅಂತರರಾಷ್ಟ್ರೀಯ ಟ್ರಾನ್ಸ್ಪಾಂಡರ್ ಕೋಡ್.ಸೌದಿ ಅರೇಬಿಯಾ ವಾಯುಪ್ರದೇಶದ ಮೇಲೆ ಹಾರುತ್ತಿದ್ದ ವಿಮಾನ ತನ್ನ ನಿಗದಿತ ಮಾರ್ಗದಿಂದ ದಿಢೀರ್ವಾಗಿ ತಿರುಗಿತು.
ಇದರ ಬೆನ್ನಲ್ಲೇ ವಿಮಾನದಿಂದ ಕೆಲಕಾಲ Squawk 7500 ಕೋಡ್ ಪ್ರಸಾರವಾಯಿತು. ಈ ಕೋಡ್ ಅನ್ನು ವಿಮಾನದಲ್ಲಿ ಅಕ್ರಮ ಹಸ್ತಕ್ಷೇಪ ಅಥವಾ ಹೈಜಾಕ್ನಂತಹ ಪರಿಸ್ಥಿತಿಯನ್ನು ಸೂಚಿಸಲು ಬಳಸಲಾಗುತ್ತದೆ. ಇದರಿಂದ ಆತಂಕ ಮತ್ತಷ್ಟು ಹೆಚ್ಚಾಯಿತು.ಆ ಸಮಯದಲ್ಲಿ ಇಸ್ರೇಲಿ ಅಧಿಕಾರಿಗಳಿಗೆ ವಿಮಾನದೊಂದಿಗೆ ಸಂಪರ್ಕ ಸಾಧಿಸಲು ಸಾಧ್ಯವಾಗಲಿಲ್ಲ. ವಿಮಾನದಲ್ಲಿ ಹಲವು ಇಸ್ರೇಲಿ ನಾಗರಿಕರು ಇದ್ದರೆಂಬ ಹಿನ್ನೆಲೆಯಲ್ಲಿ ಹೈಜಾಕ್ ಸಾಧ್ಯತೆ ಗಂಭೀರವಾಗಿ ಪರಿಗಣಿಸಲಾಯಿತು.
ಇಸ್ರೇಲಿ ವಾಯುಪಡೆಯ ಯುದ್ಧವಿಮಾನಗಳನ್ನು ವಿಮಾನದತ್ತ ಕಳುಹಿಸಲಾಯಿತು. ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸೇರಿದಂತೆ ಹಿರಿಯ ಭದ್ರತಾ ಅಧಿಕಾರಿಗಳು ತುರ್ತು ಸಭೆ ನಡೆಸಿದರು.
ವಿಮಾನದ ಆತಂಕಕಾರಿ ಚಲನೆ
ವಿಮಾನವನ್ನು ಟ್ರ್ಯಾಕ್ ಮಾಡುತ್ತಿದ್ದ ಮಾಹಿತಿಯೂ ಆತಂಕಕ್ಕೆ ಕಾರಣವಾಯಿತು.ದಿ ಟೈಮ್ಸ್ ಆಫ್ ಇಸ್ರೇಲ್ ಉಲ್ಲೇಖಿಸಿರುವ ಮಾಹಿತಿಯ ಪ್ರಕಾರ, ಹಾರಾಟ ಆರಂಭವಾಗಿ ಸುಮಾರು 2 ಗಂಟೆ 15 ನಿಮಿಷಗಳ ನಂತರ, ಬೋಯಿಂಗ್ 737 ವಿಮಾನವು ಸುಮಾರು 34,000 ಅಡಿ ಎತ್ತರದಿಂದ ಕೇವಲ ಒಂದು ನಿಮಿಷದೊಳಗೆ 17,000 ಅಡಿಗೆ ಕುಸಿದಿದೆ.
ಅದೇ ವೇಳೆ ವಿಮಾನದ ವೇಗವೂ ತೀವ್ರವಾಗಿ ಹೆಚ್ಚಾಗಿತ್ತು.ನಂತರ ವಿಮಾನ ಸ್ವಲ್ಪ ಎತ್ತರಕ್ಕೆ ಏರಿದರೂ ಮತ್ತೆ ಕೆಳಕ್ಕೆ ಇಳಿಯಿತು. ಕೆಲಕಾಲ ಸುಮಾರು 15,000 ಅಡಿ ಎತ್ತರದಲ್ಲಿ ಹಾರಾಟ ನಡೆಸಿತು.
ವಿಮಾನದ ಎತ್ತರದಲ್ಲಿ ಕಂಡುಬಂದ ಈ ಅಸಾಮಾನ್ಯ ಬದಲಾವಣೆಗಳು ವಿಮಾನವನ್ನು ಸಾಮಾನ್ಯ ಆಟೋಪೈಲಟ್ ವ್ಯವಸ್ಥೆಯ ಬದಲಿಗೆ ಕೈಯಾರೆ ನಿಯಂತ್ರಿಸಲಾಗುತ್ತಿತ್ತೇ ಎಂಬ ಅನುಮಾನಕ್ಕೆ ಕಾರಣವಾದವು.
ಕಾಕ್ಪಿಟ್ನಲ್ಲಿ ಕಿರುಚಾಟ, ರಕ್ತ ಕಂಡ ಪ್ರಯಾಣಿಕರು
ನೆಲದಲ್ಲಿದ್ದ ಅಧಿಕಾರಿಗಳು ವಿಮಾನದ ಅಸಹಜ ಚಲನವಲನಗಳನ್ನು ಗಮನಿಸುತ್ತಿದ್ದಾಗ, ವಿಮಾನದೊಳಗಿದ್ದ ಪ್ರಯಾಣಿಕರು ಕೂಡ ಭಯಾನಕ ಘಟನೆ ಬಗ್ಗೆ ಮಾಹಿತಿ ನೀಡಿದರು.ಇಸ್ರೇಲ್ನ ಚಾನೆಲ್ 12ಕ್ಕೆ ಮಾತನಾಡಿದ ಪ್ರಯಾಣಿಕರೊಬ್ಬರು, ವಿಮಾನದಲ್ಲಿ ಕಿರುಚಾಟ ಕೇಳಿಸಿತು. ನಂತರ ಕಾಕ್ಪಿಟ್ ಬಾಗಿಲು ತೆರೆಯಲಾಯಿತು. ಆಗ ಒಳಗೆ ರಕ್ತ ಕಾಣಿಸಿಕೊಂಡಿತ್ತು ಎಂದು ಹೇಳಿದ್ದಾರೆ. ಒಬ್ಬ ಪೈಲಟ್ಗೆ ಪಾಕೆಟ್ ಚಾಕುವಿನಿಂದ ಇರಿಯಲಾಗಿದೆ ಎಂದು ಪ್ರಯಾಣಿಕರು ಆರೋಪಿಸಿದ್ದಾರೆ.
