ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ತನ್ನ ಆನ್ಲೈನ್ ಸೇವೆಗಳ ಸ್ಥಗಿತಾವಧಿಯನ್ನು ಮತ್ತೊಮ್ಮೆ ವಿಸ್ತರಿಸಿದೆ. ಕಳೆದ ತಿಂಗಳು ಸಾಫ್ಟ್ವೇರ್ ಅಪ್ಗ್ರೇಡ್ಗಾಗಿ ಕೆಲವು ದಿನಗಳ ಕಾಲ ಸೇವೆಗಳನ್ನು ಸ್ಥಗಿತಗೊಳಿಸಿದ್ದ ಸಂಸ್ಥೆ, ಇದೀಗ ಮತ್ತೊಮ್ಮೆ ಆನ್ಲೈನ್ ಸೇವೆಗಳನ್ನು ತಾತ್ಕಾಲಿಕವಾಗಿ ನಿಲ್ಲಿಸಿರುವುದಾಗಿ ತಿಳಿಸಿದೆ.
EPFO ನೀಡಿರುವ ಮಾಹಿತಿ ಪ್ರಕಾರ, ಜುಲೈ 2ರ ಮಧ್ಯರಾತ್ರಿವರೆಗೆ ಆನ್ಲೈನ್ ಸೇವೆಗಳು ಲಭ್ಯವಿರುವುದಿಲ್ಲ. ಭಾರಿ ಪ್ರಮಾಣದ ಡೇಟಾಬೇಸ್ ವಿಲೀನ ಮತ್ತು ಸಾಫ್ಟ್ವೇರ್ ಅಪ್ಗ್ರೇಡ್ ಕಾರ್ಯಗಳು ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಸೇವೆಗಳ ಸ್ಥಗಿತಾವಧಿಯನ್ನು ಇನ್ನೂ ಮೂರು ದಿನಗಳ ಕಾಲ ವಿಸ್ತರಿಸಲಾಗಿದೆ. ಮೊದಲು ಈ ನಿರ್ವಹಣಾ ಕಾರ್ಯಗಳು ಜೂನ್ 28ರೊಳಗೆ ಪೂರ್ಣಗೊಳ್ಳುತ್ತವೆ ಮತ್ತು ಜೂನ್ 29ರಿಂದ ಸೇವೆಗಳು ಪುನರಾರಂಭವಾಗುತ್ತವೆ ಎಂದು EPFO ತಿಳಿಸಿತ್ತು. ಆದರೆ ತಾಂತ್ರಿಕ ಬದಲಾವಣೆಗಳಿಗೆ ನಿರೀಕ್ಷೆಗಿಂತ ಹೆಚ್ಚು ಸಮಯ ಬೇಕಾದ ಕಾರಣ ಗಡುವನ್ನು ಪರಿಷ್ಕರಿಸಲಾಗಿದೆ. ಜೂನ್ 26ರ ಮಧ್ಯರಾತ್ರಿಯಿಂದ ಆರಂಭವಾದ ನಿರ್ವಹಣಾ ಕಾರ್ಯಗಳು ಜುಲೈ 1ರ ರಾತ್ರಿ 11:59ರವರೆಗೆ ಮುಂದುವರಿಯಲಿವೆ.
ಯಾವ ಸೇವೆಗಳು ಸ್ಥಗಿತ?
ನಿರ್ವಹಣಾ ಕಾರ್ಯಗಳ ಕಾರಣದಿಂದ EPFO ಸದಸ್ಯರು ಹಾಗೂ ಉದ್ಯೋಗದಾರರು ಹಲವು ಆನ್ಲೈನ್ ಸೇವೆಗಳನ್ನು ಬಳಸಲು ಸಾಧ್ಯವಾಗುವುದಿಲ್ಲ. ಅವುಗಳಲ್ಲಿ: ಪಿಎಫ್ (PF) ಹಣ ಹಿಂಪಡೆಯುವ ಅರ್ಜಿ ಸಲ್ಲಿಕೆ ಕ್ಲೈಮ್ ಸ್ಥಿತಿ ಪರಿಶೀಲನೆ ಪಾಸ್ಬುಕ್ ವೀಕ್ಷಣೆ ವೈಯಕ್ತಿಕ ಮಾಹಿತಿ ತಿದ್ದುಪಡಿ ಖಾತೆ ವರ್ಗಾವಣೆಗೆ ಅರ್ಜಿ ಸಲ್ಲಿಕೆ ಇತ್ಯಾದಿ ಸೇವೆಗಳು ತಾತ್ಕಾಲಿಕವಾಗಿ ಸ್ಥಗಿತಗೊಂಡಿವೆ. ಅದೇ ರೀತಿ ಉದ್ಯೋಗದಾರರು ಕೂಡ Employer Interface ಮೂಲಕ ಲಾಗಿನ್ ಆಗಿ ಉದ್ಯೋಗಿಗಳ ಪಿಎಫ್ಗೆ ಸಂಬಂಧಿಸಿದ ಕಂಪ್ಲಯನ್ಸ್ ಫೈಲಿಂಗ್ ಹಾಗೂ ಇತರ ಆಡಳಿತಾತ್ಮಕ ಕಾರ್ಯಗಳನ್ನು ಪೂರ್ಣಗೊಳಿಸಲು ಸಾಧ್ಯವಾಗುವುದಿಲ್ಲ.
ಅಪ್ಗ್ರೇಡ್ನ ಉದ್ದೇಶವೇನು?
ಈ ತಾಂತ್ರಿಕ ಬದಲಾವಣೆಗಳ ಪ್ರಮುಖ ಉದ್ದೇಶ ಕ್ಲೈಮ್ ಪ್ರೊಸೆಸಿಂಗ್ ವ್ಯವಸ್ಥೆಯನ್ನು ಆಧುನೀಕರಿಸುವುದಾಗಿದೆ ಎಂದು EPFO ತಿಳಿಸಿದೆ. ಡೇಟಾಬೇಸ್ ವಿಲೀನ ಹಾಗೂ ಸಾಫ್ಟ್ವೇರ್ ಅಪ್ಗ್ರೇಡ್ ಪೂರ್ಣಗೊಂಡ ಬಳಿಕ ಸೇವೆಗಳು ಇನ್ನಷ್ಟು ವೇಗವಾಗಿ, ಸುರಕ್ಷಿತವಾಗಿ ಹಾಗೂ ಪರಿಣಾಮಕಾರಿಯಾಗಿ ಲಭ್ಯವಾಗಲಿವೆ ಎಂದು ಸಂಸ್ಥೆ ಹೇಳಿದೆ. ಇದರಿಂದ ಸದಸ್ಯರಿಗೆ ಉತ್ತಮ ಡಿಜಿಟಲ್ ಅನುಭವ ದೊರೆಯಲಿದೆ ಎಂದು EPFO ತಿಳಿಸಿದೆ. ಸೇವೆಗಳು ಯಾವಾಗ ಪುನರಾರಂಭ? ಹೊಸ ವೇಳಾಪಟ್ಟಿಯ ಪ್ರಕಾರ, ಜುಲೈ 2ರ ಮಧ್ಯರಾತ್ರಿ 12 ಗಂಟೆಯಿಂದ EPFO ಆನ್ಲೈನ್ ಸೇವೆಗಳು ಮತ್ತೆ ಲಭ್ಯವಾಗಲಿವೆ. ಸೇವೆಗಳ ಸ್ಥಗಿತದಿಂದ ಉಂಟಾದ ಅಸೌಕರ್ಯಕ್ಕಾಗಿ EPFO ವಿಷಾದ ವ್ಯಕ್ತಪಡಿಸಿದ್ದು, ನಿರ್ವಹಣಾ ಅವಧಿಯಲ್ಲಿ ಯಾವುದೇ ಸಹಾಯ ಅಗತ್ಯವಿದ್ದರೆ ಸದಸ್ಯರು 14470 ಸಹಾಯವಾಣಿ ಸಂಖ್ಯೆಯನ್ನು ಸಂಪರ್ಕಿಸುವಂತೆ ಸೂಚಿಸಿದೆ
