ದೇಶದ ಅತಿದೊಡ್ಡ ಖಾಸಗಿ ವಲಯದ ಬ್ಯಾಂಕ್ ಆಗಿರುವ ಎಚ್‌ಡಿಎಫ್‌ಸಿ ಬ್ಯಾಂಕ್ ಮಹತ್ವದ ಘೋಷಣೆ ಮಾಡಿದೆ. ಬ್ಯಾಂಕ್ ತನ್ನ ಮಾರ್ಜಿನಲ್ ಕಾಸ್ಟ್ ಆಫ್ ಫಂಡ್ಸ್ ಆಧಾರಿತ ಸಾಲದ ದರವನ್ನು (MCLR) ಹೆಚ್ಚಿಸಿದೆ.ಆಯ್ದ ಅವಧಿಗಳಿಗೆ ಬಡ್ಡಿ ದರವನ್ನು 10 ಬೇಸಿಸ್ ಪಾಯಿಂಟ್‌ಗಳವರೆಗೆ ಹೆಚ್ಚಿಸಲಾಗಿದ್ದು, ಈ ನಿರ್ಧಾರವು ಜೂನ್ 8, 2026 ರಿಂದಲೇ ಜಾರಿಗೆ ಬಂದಿದೆ ಎಂದು ಬ್ಯಾಂಕ್ ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ತಿಳಿಸಿದೆ. ಈ ಹಿಂದೆ ಎಚ್‌ಡಿಎಫ್‌ಸಿ ಬ್ಯಾಂಕ್‌ನಲ್ಲಿ MCLR ದರಗಳು 8.05% ರಿಂದ 8.60% ರಷ್ಟಿದ್ದವು, ಈಗ ಅವು 8.10% ರಿಂದ 8.65% ಕ್ಕೆ ಏರಿಕೆಯಾಗಿವೆ.
ಅವಧಿವಾರು ಬಡ್ಡಿ ದರಗಳ ವಿವರ:
- ಓವರ್‌ನೈಟ್ (Overnight): 8.05% ರಿಂದ 8.10% ಕ್ಕೆ (5 ಬೇಸಿಸ್ ಪಾಯಿಂಟ್ ಏರಿಕೆ)
- 3 ತಿಂಗಳು: 8.15% ರಿಂದ 8.20% ಕ್ಕೆ
- 6 ತಿಂಗಳು: 8.30% ರಿಂದ 8.35% ಕ್ಕೆ
- 1 ವರ್ಷ: 8.35% ರಿಂದ 8.40% ಕ್ಕೆ (ಗ್ರಾಹಕರ ಸಾಲಗಳಿಗೆ ಇದು ಪ್ರಮುಖವಾಗಿದೆ)
- 2 ವರ್ಷ: 8.45% ರಿಂದ 8.55% ಕ್ಕೆ (10 ಬೇಸಿಸ್ ಪಾಯಿಂಟ್ ಏರಿಕೆ)
- 3 ವರ್ಷ: 8.60% ರಿಂದ 8.65% ಕ್ಕೆ
- 1 ತಿಂಗಳು: ಈ ಅವಧಿಯ ದರದಲ್ಲಿ ಯಾವುದೇ ಬದಲಾವಣೆ ಇಲ್ಲ, ಇದು 8.05% ನಲ್ಲಿ ಸ್ಥಿರವಾಗಿದೆ.
RBI ರೆಪೊ ದರ ಯಥಾಸ್ಥಿತಿ: ಭಾರತೀಯ ರಿಸರ್ವ್ ಬ್ಯಾಂಕ್ ಇತ್ತೀಚೆಗೆ ರೆಪೊ ದರವನ್ನು 5.25% ನಲ್ಲಿ ಯಥಾಸ್ಥಿತಿಯಲ್ಲಿ ಮುಂದುವರಿಸುವುದಾಗಿ ಘೋಷಿಸಿತ್ತು. ಸಾಮಾನ್ಯವಾಗಿ ಆರ್‌ಬಿಐ ಬಡ್ಡಿ ದರ ಬದಲಿಸಿದಾಗ ಬ್ಯಾಂಕ್‌ಗಳು ದರ ಬದಲಿಸುತ್ತವೆ. ಆದರೆ, ಆರ್‌ಬಿಐ ರೆಪೊ ದರವನ್ನು ಬದಲಿಸದಿದ್ದರೂ, ಎಚ್‌ಡಿಎಫ್‌ಸಿ ಬ್ಯಾಂಕ್ ಬಡ್ಡಿ ದರಗಳನ್ನು ಹೆಚ್ಚಿಸಿರುವುದು ಗಮನಾರ್ಹವಾಗಿದೆ.
MCLR ಅಂದ್ರೆ ಏನು ? MCLR ಎಂದರೆ ಬ್ಯಾಂಕ್‌ಗಳು ಅಥವಾ ಹಣಕಾಸು ಸಂಸ್ಥೆಗಳು ಸಾಲದ ಮೇಲೆ ವಿಧಿಸುವ ಕನಿಷ್ಠ ಬಡ್ಡಿ ದರ. ಅಂದರೆ, ಇದಕ್ಕಿಂತ ಕಡಿಮೆ ಬಡ್ಡಿ ದರಕ್ಕೆ ಬ್ಯಾಂಕ್‌ಗಳು ಸಾಲ ನೀಡಲು ಸಾಧ್ಯವಿಲ್ಲ. 2016ರಲ್ಲಿ ಆರ್‌ಬಿಐ ಈ ಪದ್ಧತಿಯನ್ನು ಜಾರಿಗೆ ತಂದಿತ್ತು. MCLR ಹೆಚ್ಚಾದರೆ, ಅದಕ್ಕೆ ಲಿಂಕ್ ಆಗಿರುವ ಬ್ಯಾಂಕ್ ಸಾಲಗಳ ಬಡ್ಡಿ ದರವೂ ಹೆಚ್ಚಾಗುತ್ತದೆ. ಇದರಿಂದ ಫ್ಲೋಟಿಂಗ್ ದರದಲ್ಲಿ ಸಾಲ ಪಡೆದವರಿಗೆ ಇಎಂಐ (EMI) ಹೊರೆಯನ್ನು ಹೆಚ್ಚಾಗುತ್ತದೆ.
ಎಚ್‌ಡಿಎಫ್‌ಸಿ ಬ್ಯಾಂಕ್ ಎಫ್‌ಡಿ (FD) ದರಗಳು: ಮತ್ತೊಂದೆಡೆ, ಎಚ್‌ಡಿಎಫ್‌ಸಿ ಬ್ಯಾಂಕ್ ತನ್ನ ಸ್ಥಿರ ಠೇವಣಿಗಳ (Fixed Deposits) ಮೇಲೆ ಸಾಮಾನ್ಯ ಜನರಿಗೆ 2.75% ರಿಂದ 6.50% ವರೆಗೆ ಮತ್ತು ಹಿರಿಯ ನಾಗರಿಕರಿಗೆ 3.25% ರಿಂದ 7% ವರೆಗೆ ಬಡ್ಡಿ ನೀಡುತ್ತಿದೆ.
