ಪೋಸ್ಟ್ ಆಫೀಸ್ ಗ್ರಾಹಕರಿಗೆ ಬಿಗ್ ನ್ಯೂಸ್ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕದ ಹೊಸ ಬಡ್ಡಿದರ ಘೋಷಿಸಿದ ಕೇಂದ್ರ ಸರ್ಕಾರ: ಯಾವ ಸ್ಕೀಮ್‌ಗೆ ಎಷ್ಟು ಲಾಭ?

ಹೊಸ ದೆಹಲಿ: ಕೇಂದ್ರ ಸರ್ಕಾರವು 2026-27ರ ಪ್ರಸಕ್ತ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕಕ್ಕೆ (ಜುಲೈನಿಂದ ಸೆಪ್ಟೆಂಬರ್ ಅವಧಿ) ಸಣ್ಣ ಉಳಿತಾಯ ಯೋಜನೆಗಳ (Small Savings Schemes) ಬಡ್ಡಿದರದಲ್ಲಿ ಯಾವುದೇ ಬದಲಾವಣೆ ಮಾಡದೆ ಹಾಗೇ ಉಳಿಸಿಕೊಳ್ಳಲು ಮಹತ್ವದ ನಿರ್ಧಾರ ಮಾಡಿದೆ.

ಹಣಕಾಸು ಸಚಿವಾಲಯ ಹೊರಡಿಸಿರುವ ಅಧಿಕೃತ ಅಧಿಸೂಚನೆಯ ಪ್ರಕಾರ, ಸಾರ್ವಜನಿಕ ಭವಿಷ್ಯ ನಿಧಿ (PPF), ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರ (NSC), ಮತ್ತು ಹಿರಿಯ ನಾಗರಿಕರ ಉಳಿತಾಯ ಯೋಜನೆ (SCSS) ಸೇರಿದಂತೆ ಎಲ್ಲಾ ಜನಪ್ರಿಯ ಪೋಸ್ಟ್ ಆಫೀಸ್ ಯೋಜನೆಗಳ ಬಡ್ಡಿದರಗಳು ಹಿಂದಿನ ತ್ರೈಮಾಸಿಕದ ಮಟ್ಟದಲ್ಲೇ ಮುಂದುವರಿಯಲಿವೆ. ಸತತ 10ನೇ ಬಾರಿಗೆ ಸರ್ಕಾರ ದರಗಳನ್ನು ಸ್ಥಿರವಾಗಿಟ್ಟಿರುವುದು ಷೇರು ಮಾರುಕಟ್ಟೆಯ ಅಪಾಯಗಳನ್ನು ಇಷ್ಟಪಡದ ಮಧ್ಯಮ ವರ್ಗದ ಕುಟುಂಬಗಳು, ಮಹಿಳೆಯರು ಹಾಗೂ ಹಿರಿಯ ನಾಗರಿಕರಿಗೆ ಭಾರಿ ನೆಮ್ಮದಿ ತಂದಿದೆ.

ಆರ್ಥಿಕ ವ್ಯವಹಾರಗಳ ಇಲಾಖೆಯಿಂದ ದರ ಪರಿಶೀಲನೆ ಪೂರ್ಣ

ಕೇಂದ್ರ ಹಣಕಾಸು ಸಚಿವಾಲಯದ ಅಡಿಯಲ್ಲಿ ಬರುವ ಆರ್ಥಿಕ ವ್ಯವಹಾರಗಳ ಇಲಾಖೆಯು ಜುಲೈ-ಸೆಪ್ಟೆಂಬರ್ 2026 ರ ಹೊಸ ಅವಧಿಯ ಬಡ್ಡಿದರಗಳ ಪರಿಶೀಲನೆಯನ್ನು ಪೂರ್ಣಗೊಳಿಸಿದೆ. ಪ್ರಸ್ತುತ ಮಾರುಕಟ್ಟೆಯ ಟ್ರೆಂಡ್ ಹಾಗೂ ಹಣದುಬ್ಬರದ ಡೇಟಾವನ್ನು ಸಂಪೂರ್ಣವಾಗಿ ಲೆಕ್ಕಹಾಕಿರುವ ಸರ್ಕಾರ, ಈ ಬಾರಿ ಹೂಡಿಕೆದಾರರಿಗೆ ಬಿಗ್ ರಿಲೀಫ್ ನೀಡಿದ್ದು ಯಾವುದೇ ಸ್ಕೀಮ್‌ನ ಇಂಟರೆಸ್ಟ್ ರೇಟ್ ಕಡಿತ ಮಾಡಿಲ್ಲ. ಸಾಮಾನ್ಯವಾಗಿ ಆರ್‌ಬಿಐನ ಹಣಕಾಸು ನೀತಿ ಹಾಗೂ ಗವರ್ನಮೆಂಟ್ ಬಾಂಡ್ ಇಳುವರಿಗಳ ಆಧಾರದ ಮೇಲೆ ಪ್ರತಿ ಮೂರು ತಿಂಗಳಿಗೊಮ್ಮೆ ಈ ದರಗಳನ್ನು ಪರಿಶೀಲಿಸಲಾಗುತ್ತದೆ.

ಜುಲೈ-ಸೆಪ್ಟೆಂಬರ್ 2026 ರ ಕಂಪ್ಲೀಟ್ ಬಡ್ಡಿದರಗಳ ಪಟ್ಟಿ ಇಲ್ಲಿದೆ:

ಸುಕನ್ಯಾ ಸಮೃದ್ಧಿ ಯೋಜನೆ (SSY): 8.2%

ಹಿರಿಯ ನಾಗರಿಕರ ಉಳಿತಾಯ ಯೋಜನೆ (SCSS): 8.2%

ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರ (NSC): 7.7%

ಕಿಸಾನ್ ವಿಕಾಸ್ ಪತ್ರ (KVP): 7.5% (135 ತಿಂಗಳುಗಳಲ್ಲಿ ದ್ವಿಗುಣ)

5 ವರ್ಷಗಳ ಪೋಸ್ಟ್ ಆಫೀಸ್ ಟೈಮ್ ಠೇವಣಿ (FD): 7.5%

ಅಂಚೆ ಕಚೇರಿ ಮಾಸಿಕ ಆದಾಯ ಯೋಜನೆ (MIS): 7.4%

ಸಾರ್ವಜನಿಕ ಭವಿಷ್ಯ ನಿಧಿ (PPF): 7.1%

3 ವರ್ಷಗಳ ಪೋಸ್ಟ್ ಆಫೀಸ್ ಟೈಮ್ ಠೇವಣಿ (FD): 7.1%

2 ವರ್ಷಗಳ ಪೋಸ್ಟ್ ಆಫೀಸ್ ಟೈಮ್ ಠೇವಣಿ (FD): 7.0%

1 ವರ್ಷದ ಪೋಸ್ಟ್ ಆಫೀಸ್ ಟೈಮ್ ಠೇವಣಿ (FD): 6.9%

ಅಂಚೆ ಕಚೇರಿ ಉಳಿತಾಯ ಖಾತೆ: 4.0%

ಹಿರಿಯ ನಾಗರಿಕರಿಗೆ ಬ್ಯಾಂಕ್ ಎಫ್‌ಡಿಗಿಂತಲೂ ಬೆಸ್ಟ್ ರಿಟರ್ನ್ಸ್

ಹಿರಿಯ ನಾಗರಿಕರಲ್ಲಿ ಸಖತ್ ಫೇಮಸ್ ಆಗಿರುವ ಎಸ್‌ಸಿಎಸ್ಎಸ್ (SCSS) ಯೋಜನೆಯ ಬಡ್ಡಿದರವನ್ನು ಶೇ. 8.2 ರಷ್ಟೇ ಸ್ಥಿರವಾಗಿ ಇಡಲಾಗಿದೆ, ಇದು ಸದ್ಯದ ಬ್ಯಾಂಕ್ ಫಿಕ್ಸ್ಡ್ ಡೆಪಾಸಿಟ್‌ಗಳಿಗಿಂತಲೂ ಅತ್ಯುತ್ತಮ ಆದಾಯವಾಗಿದೆ. ಇದರೊಂದಿಗೆ 5 ವರ್ಷಗಳ ಅವಧಿಯ ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರಕ್ಕೆ (NSC) ಶೇ. 7.7 ಮತ್ತು ಮಾಸಿಕ ಆದಾಯ ಯೋಜನೆಗೆ (MIS) ಶೇ. 7.4 ರಷ್ಟು ಬಡ್ಡಿ ಸಿಗುತ್ತಾ ಹೋಗುತ್ತದೆ. ನಿವೃತ್ತಿಯ ನಂತರ ಪ್ರತಿ ತಿಂಗಳು ರೆಗ್ಯುಲರ್ ಇನ್‌ಕಮ್ ನಂಬಿಕೊಂಡಿರುವ ವೃದ್ಧರು ತಮ್ಮ ಮಾಸಿಕ ಬಜೆಟ್ ಪ್ಲಾನ್ ಮಾಡಲು ಈ ನಿರ್ಧಾರದಿಂದ ದೊಡ್ಡ ನಿರಾಳತೆ ಸಿಕ್ಕಂತಾಗಿದೆ.

ಪೋಸ್ಟ್ ಆಫೀಸ್ ಎಫ್‌ಡಿ ಮತ್ತು ಕಿಸಾನ್ ವಿಕಾಸ್ ಪತ್ರದ ಲೆಕ್ಕಾಚಾರ

ಇನ್ನು ಪೋಸ್ಟ್ ಆಫೀಸ್ ಟೈಮ್ ಠೇವಣಿ ಅಥವಾ ಎಫ್‌ಡಿ (Fixed Deposit) ಗಳ ಮೇಲೂ ಹಳೇ ದರಗಳೇ ಜಾರಿಯಲ್ಲಿರಲಿವೆ. 1 ವರ್ಷದ ಎಫ್‌ಡಿಗೆ ಶೇ. 6.9, 2 ವರ್ಷಕ್ಕೆ ಶೇ. 7.0, 3 ವರ್ಷದ ಎಫ್‌ಡಿಗೆ ಶೇ. 7.1 ಹಾಗೂ 5 ವರ್ಷದ ದೀರ್ಘಾವಧಿ ಎಫ್‌ಡಿಗೆ ಶೇ. 7.5 ರಷ್ಟು ಬಡ್ಡಿ ಲಾಭ ಸಿಗಲಿದೆ.

ಹೂಡಿಕೆದಾರರ ಹಣವನ್ನು ಡಬಲ್ ಮಾಡುವ ಕಿಸಾನ್ ವಿಕಾಸ್ ಪತ್ರ (KVP) ಯೋಜನೆಗೆ ಶೇ. 7.5 ರಷ್ಟು ಬಡ್ಡಿದರವನ್ನು ಕಾಯ್ದಿರಿಸಲಾಗಿದ್ದು, ನಿಮ್ಮ ಒಟ್ಟು ಠೇವಣಿ ಹಣವು ಪಕ್ಕಾ 135 ತಿಂಗಳುಗಳಲ್ಲಿ (ಅಂದರೆ 11 ವರ್ಷ ಹಾಗೂ 3 ತಿಂಗಳು) ಸಂಪೂರ್ಣವಾಗಿ ಡಬಲ್ ಆಗುವುದು ನೂರಕ್ಕೆ ನೂರು ಗ್ಯಾರಂಟಿ