ಕಣ್ಣು ಮಸುಕಾಗಿ ಕಾಣಿಸುವುದು, ದೃಷ್ಟಿ ಕ್ಷೀಣಿಸುವುದು ಸೇರಿದಂತೆ ಕಣ್ಣಿನ ಆರೋಗ್ಯದ ಬಗ್ಗೆ ಕಾಳಜಿ ಇರುವವರಿಗೆ ಪೌಷ್ಟಿಕಾಂಶಭರಿತ ಆಹಾರ ಸೇವನೆ ಮುಖ್ಯ. ಈ ಪೈಕಿ ಬೀಟಾ ಕ್ಯಾರೋಟಿನ್, ಲೈಕೋಪೀನ್ ಹಾಗೂ ಆ್ಯಂಟಿಆಕ್ಸಿಡೆಂಟ್ಗಳಿಂದ ಸಮೃದ್ಧವಾಗಿರುವ ಗಾಕ್ ಫ್ರೂಟ್ ಕಣ್ಣಿನ ಆರೋಗ್ಯಕ್ಕೆ ಹಲವು ರೀತಿಯಲ್ಲಿ ನೆರವಾಗಬಹುದು ಎಂದು ಹೇಳಲಾಗಿದೆ. ವಿಶೇಷವಾಗಿ ರೆಟಿನಾ ಮತ್ತು ಕಣ್ಣಿನ ಕೋಶಗಳ ಆರೋಗ್ಯ ಕಾಪಾಡುವಲ್ಲಿ ಇದರಲ್ಲಿರುವ ಪೋಷಕಾಂಶಗಳು ಸಹಾಯಕವಾಗಬಹುದು.
ಗಾಕ್ ಫ್ರೂಟ್ (Gac Fruit) ಹಲವು ಪೋಷಕಾಂಶಗಳನ್ನು ಒಳಗೊಂಡಿರುವ ಹಣ್ಣು. 100 ಗ್ರಾಂ ಗಾಕ್ ಫ್ರೂಟ್ನಲ್ಲಿ ಸುಮಾರು 43 ಕಿಲೋಕ್ಯಾಲರಿ, 9 ಗ್ರಾಂ ಕಾರ್ಬೋಹೈಡ್ರೇಟ್, 0.8 ಗ್ರಾಂ ಪ್ರೋಟೀನ್, ಅತಿ ಕಡಿಮೆ ಪ್ರಮಾಣದ ಕೊಬ್ಬು (0.09 ಗ್ರಾಂ), 1 ಗ್ರಾಂ ನಾರಿನಾಂಶ ಹಾಗೂ 20–25 ಮಿಲಿಗ್ರಾಂ ವಿಟಮಿನ್ ಸಿ ಇರುತ್ತದೆ.
ಇದರಲ್ಲಿರುವ ಪ್ರಮುಖ ಪೋಷಕಾಂಶಗಳೆಂದರೆ ಬೀಟಾ ಕ್ಯಾರೋಟಿನ್ ಮತ್ತು ಲೈಕೋಪೀನ್. ಬೀಟಾ ಕ್ಯಾರೋಟಿನ್ ದೇಹದಲ್ಲಿ ವಿಟಮಿನ್ ಎ ಆಗಿ ಪರಿವರ್ತನೆಯಾಗುತ್ತದೆ. ಇದು ಕಣ್ಣಿನ ಆರೋಗ್ಯಕ್ಕೆ ಅಗತ್ಯವಾದ ಪೋಷಕಾಂಶವಾಗಿದೆ. ಲೈಕೋಪೀನ್ ಶಕ್ತಿಶಾಲಿ ಆ್ಯಂಟಿಆಕ್ಸಿಡೆಂಟ್ ಆಗಿ ಕಾರ್ಯನಿರ್ವಹಿಸುತ್ತದೆ.
ಕಣ್ಣಿನ ಆರೋಗ್ಯಕ್ಕೆ ಹೇಗೆ ಸಹಾಯ ಮಾಡುತ್ತದೆ?
ಗಾಕ್ ಫ್ರೂಟ್ನಲ್ಲಿ ಹೆಚ್ಚಿನ ಪ್ರಮಾಣದಲ್ಲಿರುವ ಬೀಟಾ ಕ್ಯಾರೋಟಿನ್ ಮತ್ತು ಲೈಕೋಪೀನ್ ಕಣ್ಣಿನ ಆರೋಗ್ಯಕ್ಕೆ ಸಹಕಾರಿಯಾಗಬಹುದು. ವಿಶೇಷವಾಗಿ ಮಧುಮೇಹ ಇರುವವರಲ್ಲಿ ಕಣ್ಣಿನ ಮ್ಯಾಕ್ಯುಲಾ ಭಾಗಕ್ಕೆ ಉಂಟಾಗಬಹುದಾದ ಹಾನಿಯಿಂದ ರಕ್ಷಿಸಲು ಇದು ನೆರವಾಗಬಹುದು. ಕಣ್ಣು ಮಸುಕಾಗಿ ಕಾಣಿಸುವುದು ಸೇರಿದಂತೆ ಕೆಲವು ದೃಷ್ಟಿ ಸಮಸ್ಯೆಗಳನ್ನು ಕಡಿಮೆ ಮಾಡಲು ಸಹಾಯಕವಾಗಬಹುದು ಎಂದು ವರದಿಯಲ್ಲಿ ಹೇಳಲಾಗಿದೆ.
ಗಾಕ್ ಫ್ರೂಟ್ ಕಡಿಮೆ ಗ್ಲೈಸೆಮಿಕ್ ಇಂಡೆಕ್ಸ್ ಹೊಂದಿರುವ ಹಣ್ಣು ಎಂದು ಹೇಳಲಾಗುತ್ತದೆ. ಹೀಗಾಗಿ ಮಧುಮೇಹ ಇರುವವರು ಇದನ್ನು ಸೇವಿಸುವ ಮೊದಲು ತಮ್ಮ ವೈದ್ಯರ ಸಲಹೆ ಪಡೆಯುವುದು ಸೂಕ್ತ.
ಇದು ರೆಟಿನಾದ ಆರೋಗ್ಯ ಕಾಪಾಡಲು ಹಾಗೂ ರೆಟಿನಾದಲ್ಲಿರುವ ರಾಡ್ ಮತ್ತು ಕೋನ್ ಕೋಶಗಳ ಕಾರ್ಯಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಒದಗಿಸಲು ಸಹಾಯ ಮಾಡಬಹುದು. ಅಲ್ಲದೆ, ಆ್ಯಂಟಿಆಕ್ಸಿಡೆಂಟ್ ಗುಣಗಳಿಂದಾಗಿ ಕಣ್ಣಿನ ಕೋಶಗಳನ್ನು ಆಕ್ಸಿಡೇಟಿವ್ ಒತ್ತಡದಿಂದ ರಕ್ಷಿಸಲು ನೆರವಾಗಬಹುದು.
ಕಣ್ಣಿನ ಲೆನ್ಸ್ನಲ್ಲಿರುವ ಪ್ರೋಟೀನ್ಗಳಿಗೆ ಹಾನಿಯಾಗದಂತೆ ರಕ್ಷಿಸುವ ಮೂಲಕ ಕ್ಯಾಟರಾಕ್ಟ್ (ಮೋತಿಬಿಂದು) ಉಂಟಾಗುವ ಅಪಾಯವನ್ನು ಕಡಿಮೆ ಮಾಡಲು ಗಾಕ್ ಫ್ರೂಟ್ ಸಹಾಯ ಮಾಡಬಹುದು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಹೇಗೆ ಸೇವಿಸಬಹುದು?
ಗಾಕ್ ಫ್ರೂಟ್ ರುಚಿಯಲ್ಲಿ ಹಲಸಿನ ಹಣ್ಣಿನಷ್ಟು ಸಿಹಿಯಾಗಿರುವುದಿಲ್ಲ. ನೇರವಾಗಿ ತಿನ್ನಲು ಇಷ್ಟವಿಲ್ಲದವರು ಇದನ್ನು ಜ್ಯೂಸ್ ರೂಪದಲ್ಲಿ ಸೇವಿಸಬಹುದು. ಇತರ ಹಣ್ಣಿನ ರಸಗಳೊಂದಿಗೆ ಬೆರೆಸಿ ಅಥವಾ ಸಲಾಡ್ಗೆ ಸೇರಿಸಿಕೊಂಡು ಸೇವಿಸಬಹುದು.
ಒಂದು ಗಾಕ್ ಫ್ರೂಟ್ ಸಾಮಾನ್ಯವಾಗಿ ಸುಮಾರು ಅರ್ಧ ಕಿಲೋದಿಂದ ಒಂದು ಕಿಲೋವರೆಗೆ ತೂಕ ಹೊಂದಿರುತ್ತದೆ. ಮಾರುಕಟ್ಟೆಯಲ್ಲಿ ಇದರ ಬೆಲೆ ಸುಮಾರು ₹300ರಿಂದ ₹500ರವರೆಗೆ ಇರಬಹುದು. ಖರೀದಿಸಿದ ನಂತರ ಕತ್ತರಿಸಿ ಫ್ರಿಜ್ನಲ್ಲಿ ಇಟ್ಟು ಒಂದು ಅಥವಾ ಎರಡು ದಿನಗಳೊಳಗೆ ಬಳಸಬಹುದು.
ಗಾಕ್ ಫ್ರೂಟ್ ಆ್ಯಂಟಿಆಕ್ಸಿಡೆಂಟ್ ಗುಣಗಳನ್ನು ಹೊಂದಿದ್ದು, ದೇಹದ ಒಟ್ಟಾರೆ ಆರೋಗ್ಯಕ್ಕೆ ಸಹಾಯಕವಾಗುವ ಹಲವು ಪೋಷಕಾಂಶಗಳನ್ನು ಒಳಗೊಂಡಿದೆ. ಯಕೃತ್ತು ಮತ್ತು ಮೆದುಳಿನ ಕೋಶಗಳಲ್ಲಿನ ಶಕ್ತಿಯ ಉತ್ಪಾದನೆಗೆ ಸಂಬಂಧಿಸಿದ ಪ್ರಕ್ರಿಯೆಗಳಿಗೆ ಸಹ ಇದು ನೆರವಾಗಬಹುದು ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಗಾಕ್ ಫ್ರೂಟ್ (Gac Fruit) ಅಥವಾ Momordica cochinchinensis ದಕ್ಷಿಣ ಏಷ್ಯಾ ಮತ್ತು ಆಸ್ಟ್ರೇಲಿಯಾ ಮೂಲದ, ಕುಂಬಳಕಾಯಿ ಕುಟುಂಬಕ್ಕೆ ಸೇರಿದ ಅಪರೂಪದ ಹಣ್ಣಾಗಿದೆ. ‘ಸ್ವರ್ಗದ ಹಣ್ಣು’ ಎಂದೂ ಕರೆಯಲ್ಪಡುವ ಇದು ಲೈಕೋಪೀನ್ ಮತ್ತು ಬೀಟಾ-ಕ್ಯಾರೋಟಿನ್ನಂತಹ ಪ್ರಮುಖ ಆ್ಯಂಟಿಆಕ್ಸಿಡೆಂಟ್ಗಳಿಂದ ಸಮೃದ್ಧವಾಗಿದೆ. ಇದರ ಗಾಢ ಕೆಂಪು ಬಣ್ಣದ ತಿರುಳು ಆಹಾರಕ್ಕೆ ಬಣ್ಣ ನೀಡಲು ಹಾಗೂ ಸಾಂಪ್ರದಾಯಿಕ ಅಡುಗೆಗಳಲ್ಲಿ ಬಳಸಲಾಗುತ್ತದೆ. ಗಾಕ್ ಫ್ರೂಟ್ ರೋಗನಿರೋಧಕ ಶಕ್ತಿಗೆ ಹಾಗೂ ದೇಹದ ಒಟ್ಟಾರೆ ಆರೋಗ್ಯಕ್ಕೆ ಸಹಕಾರಿಯಾಗುವ ಪೋಷಕಾಂಶಗಳನ್ನು ಹೊಂದಿದೆ ಎಂದು ವಿವಿಧ ಮೂಲಗಳು ಹೇಳುತ್ತವೆ. ವಿಯೆಟ್ನಾಂ ಸೇರಿದಂತೆ ಹಲವು ದೇಶಗಳಲ್ಲಿ ಬಳಕೆಯಲ್ಲಿರುವ ಈ ಹಣ್ಣಿನ ಕೃಷಿ ಭಾರತದಲ್ಲಿಯೂ, ವಿಶೇಷವಾಗಿ ಕೇರಳದ ಕೆಲವು ಭಾಗಗಳಲ್ಲಿ ನಡೆಯುತ್ತಿದ್ದು, ರೈತರಿಗೆ ಪರ್ಯಾಯ ಆದಾಯದ ಮೂಲವಾಗುತ್ತಿದೆ.
ಸೂಚನೆ: ಗಾಕ್ ಫ್ರೂಟ್ ತಿಂದರೆ ಕನ್ನಡಕದ ಅಗತ್ಯವೇ ಇರುವುದಿಲ್ಲ ಅಥವಾ ದೃಷ್ಟಿ ಸಮಸ್ಯೆಗಳು ಸಂಪೂರ್ಣ ಗುಣವಾಗುತ್ತವೆ ಎಂಬುದನ್ನು ಖಚಿತಪಡಿಸುವ ವೈದ್ಯಕೀಯ ಸಾಕ್ಷ್ಯವೆಂದು ಈ ಮಾಹಿತಿಯನ್ನು ಪರಿಗಣಿಸಬಾರದು. ದೃಷ್ಟಿ ಮಸುಕಾಗುತ್ತಿದ್ದರೆ ನೇತ್ರ ತಜ್ಞರನ್ನು ಸಂಪರ್ಕಿಸುವುದು ಮುಖ್ಯ.
