ಸ್ತನ ಕ್ಯಾನ್ಸರ್ ಎಂದರೆ ಮಹಿಳೆಯರಿಗೆ ಮಾತ್ರ ಬರುವ ಕಾಯಿಲೆ ಎಂಬುದು ಸಾಮಾನ್ಯವಾಗಿ ಜನರಲ್ಲಿರುವ ತಪ್ಪು ಕಲ್ಪನೆ. ಆದರೆ ಪುರುಷರಲ್ಲಿಯೂ ಸ್ತನದ ಅಂಗಾಂಶ ಇರುವುದರಿಂದ ಅವರಿಗೆ ಕೂಡ ಸ್ತನ ಕ್ಯಾನ್ಸರ್ ಕಾಣಿಸಿಕೊಳ್ಳಬಹುದು. ಮಹಿಳೆಯರಿಗೆ ಹೋಲಿಸಿದರೆ ಪುರುಷರಲ್ಲಿ ಈ ಕಾಯಿಲೆ ಅಪರೂಪವಾಗಿದ್ದರೂ, ಅದರ ಲಕ್ಷಣಗಳ ಬಗ್ಗೆ ಅರಿವಿನ ಕೊರತೆ ಹಾಗೂ ಮುಜುಗರದಿಂದಾಗಿ ರೋಗ ಪತ್ತೆ ತಡವಾಗುವ ಸಾಧ್ಯತೆ ಇದೆ ಎಂದು ಕ್ಯಾನ್ಸರ್ ತಜ್ಞರು ಎಚ್ಚರಿಸಿದ್ದಾರೆ.
ಅಕ್ಟೋಬರ್ ತಿಂಗಳನ್ನು ಸ್ತನ ಕ್ಯಾನ್ಸರ್ ಜಾಗೃತಿ ಮಾಸವಾಗಿ ಆಚರಿಸಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಪುರುಷರಲ್ಲಿಯೂ ಸ್ತನ ಕ್ಯಾನ್ಸರ್ ಕಾಣಿಸಿಕೊಳ್ಳಬಹುದು ಎಂಬುದರ ಕುರಿತು ಜಾಗೃತಿ ಮೂಡಿಸುವುದು, ಆರಂಭಿಕ ಲಕ್ಷಣಗಳನ್ನು ಗುರುತಿಸುವುದು ಹಾಗೂ ವೈದ್ಯಕೀಯ ಪರೀಕ್ಷೆಗೆ ಹಿಂಜರಿಯದಂತೆ ಪ್ರೋತ್ಸಾಹಿಸುವುದು ಮುಖ್ಯವಾಗಿದೆ.
ಕೋಲ್ಕತ್ತಾದ ನಾರಾಯಣ ಆರ್.ಎನ್. ಟ್ಯಾಗೋರ್ ಆಸ್ಪತ್ರೆಯ ಸ್ತನ ಕ್ಯಾನ್ಸರ್ ತಜ್ಞೆ ಡಾ. ಪ್ರಗತಿ ಸಿಂಘಾಲ್ ಅವರು ಪುರುಷರಲ್ಲಿ ಈ ಕಾಯಿಲೆಯ ಬಗ್ಗೆ ಅರಿವು ಮೂಡಿಸುವ ಅಗತ್ಯವನ್ನು ಒತ್ತಿಹೇಳಿದ್ದಾರೆ.
ಪುರುಷರಲ್ಲಿ ಸ್ತನ ಕ್ಯಾನ್ಸರ್‌ನ ಪ್ರಮುಖ ಲಕ್ಷಣಗಳೇನು?
ಪುರುಷರಲ್ಲಿಯೂ ಮಹಿಳೆಯರಂತೆಯೇ ಸ್ತನದ ಅಂಗಾಂಶಗಳಲ್ಲಿ ಕ್ಯಾನ್ಸರ್ ಬೆಳವಣಿಗೆಯಾಗಬಹುದು. ಆರಂಭದಲ್ಲಿ ಕೆಲವು ಬದಲಾವಣೆಗಳು ಕಂಡುಬಂದರೂ ಅವುಗಳನ್ನು ಸಾಮಾನ್ಯ ಸಮಸ್ಯೆ ಎಂದು ಭಾವಿಸಿ ನಿರ್ಲಕ್ಷಿಸುವುದು ಅಪಾಯಕಾರಿ.
1. ಎದೆಯಲ್ಲಿ ಗಡ್ಡೆ ಕಾಣಿಸಿಕೊಳ್ಳುವುದು
ಮೊಲೆ ತೊಟ್ಟು ಅಥವಾ ಅದರ ಸುತ್ತಲಿನ ಭಾಗದಲ್ಲಿ ಗಟ್ಟಿಯಾದ ಗಡ್ಡೆ ಅಥವಾ ದಪ್ಪವಾದ ಅಂಗಾಂಶ ಕಂಡುಬರುವುದು ಪ್ರಮುಖ ಲಕ್ಷಣ. ಗಡ್ಡೆ ನೋವಿಲ್ಲದಿದ್ದರೂ ವೈದ್ಯಕೀಯ ಪರೀಕ್ಷೆ ಮಾಡಿಸಿಕೊಳ್ಳಬೇಕು.
2. ಮೊಲೆತೊಟ್ಟಿನಲ್ಲಿ ಬದಲಾವಣೆ
ಮೊಲೆತೊಟ್ಟು ಒಳಕ್ಕೆ ಎಳೆಯಲ್ಪಡುವುದು, ಅದರ ಆಕಾರ ಬದಲಾಗುವುದು ಅಥವಾ ಅಸಹಜ ಸ್ರಾವ ಕಾಣಿಸಿಕೊಳ್ಳುವುದು ಎಚ್ಚರಿಕೆಯ ಲಕ್ಷಣಗಳಾಗಿವೆ.
3. ಚರ್ಮದಲ್ಲಿ ಬದಲಾವಣೆ
ಎದೆಯ ಚರ್ಮ ಕೆಂಪಾಗುವುದು, ಸುಕ್ಕುಗಟ್ಟುವುದು, ಪದರಗಳಾಗಿ ಉದುರುವುದು ಅಥವಾ ಚರ್ಮದ ಸ್ವರೂಪದಲ್ಲಿ ಅಸಹಜ ಬದಲಾವಣೆ ಕಾಣಿಸಿಕೊಳ್ಳಬಹುದು.
4. ಕಂಕುಳಿನಲ್ಲಿ ಊತ
ಕಂಕುಳಿನ ಭಾಗದಲ್ಲಿ ಊತ ಅಥವಾ ಗಡ್ಡೆ ಕಾಣಿಸಿಕೊಳ್ಳುವುದು ಕೂಡ ಗಮನಿಸಬೇಕಾದ ಲಕ್ಷಣವಾಗಿದೆ. ಇಂತಹ ಬದಲಾವಣೆಗಳು ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸಬೇಕು.
ಮೇಲಿನ ಲಕ್ಷಣಗಳು ಕ್ಯಾನ್ಸರ್‌ನಿಂದಲೇ ಉಂಟಾಗುತ್ತವೆ ಎಂದರ್ಥವಲ್ಲ. ಇತರ ಕಾಯಿಲೆಗಳಲ್ಲಿಯೂ ಇವು ಕಾಣಿಸಿಕೊಳ್ಳಬಹುದು. ವೈದ್ಯಕೀಯ ಪರೀಕ್ಷೆಯಿಂದಲೇ ನಿಖರ ಕಾರಣ ತಿಳಿಯಬಹುದು.
ಪುರುಷರಲ್ಲಿ ಸ್ತನ ಕ್ಯಾನ್ಸರ್ ಗೆ ಕಾರಣವಾಗುವ ಅಪಾಯದ ಅಂಶಗಳು
ಪುರುಷರಲ್ಲಿ ಸ್ತನ ಕ್ಯಾನ್ಸರ್ ಉಂಟಾಗುವ ಅಪಾಯವನ್ನು ಹೆಚ್ಚಿಸಬಹುದಾದ ಕೆಲವು ಅಂಶಗಳಿವೆ.
* ವಯಸ್ಸು: ವಯಸ್ಸು ಹೆಚ್ಚಾದಂತೆ ಅಪಾಯ ಹೆಚ್ಚಾಗಬಹುದು.
* ಕುಟುಂಬದ ಇತಿಹಾಸ: ಕುಟುಂಬದಲ್ಲಿ ಸ್ತನ ಕ್ಯಾನ್ಸರ್ ಕಾಣಿಸಿಕೊಂಡಿದ್ದರೆ ಹೆಚ್ಚಿನ ಎಚ್ಚರಿಕೆ ಅಗತ್ಯ.
* ಆನುವಂಶಿಕ ಬದಲಾವಣೆಗಳು: BRCA1 ಮತ್ತು BRCA2 ಸೇರಿದಂತೆ ಕೆಲವು ಜೀನ್‌ಗಳಲ್ಲಿನ ಬದಲಾವಣೆಗಳು ಅಪಾಯವನ್ನು ಹೆಚ್ಚಿಸಬಹುದು.
* ಹಾರ್ಮೋನ್‌ಗಳ ಅಸಮತೋಲನ: ದೇಹದಲ್ಲಿ ಈಸ್ಟ್ರೋಜನ್ ಹಾರ್ಮೋನ್ ಪ್ರಮಾಣ ಹೆಚ್ಚಾಗುವ ಕೆಲವು ಪರಿಸ್ಥಿತಿಗಳು ಅಪಾಯಕ್ಕೆ ಕಾರಣವಾಗಬಹುದು.
* ಸ್ಥೂಲಕಾಯ: ಅಧಿಕ ತೂಕವೂ ಅಪಾಯಕ್ಕೆ ಸಂಬಂಧಿಸಿರಬಹುದು.
* ಯಕೃತ್ತಿನ ಕಾಯಿಲೆಗಳು: ಕೆಲವು ಯಕೃತ್ತಿನ ಸಮಸ್ಯೆಗಳು ಹಾರ್ಮೋನ್‌ಗಳ ಸಮತೋಲನದ ಮೇಲೆ ಪರಿಣಾಮ ಬೀರಬಹುದು.
* ವಿಕಿರಣಕ್ಕೆ ಒಡ್ಡಿಕೊಳ್ಳುವುದು: ಹಿಂದೆ ಎದೆಯ ಭಾಗಕ್ಕೆ ವಿಕಿರಣ ಚಿಕಿತ್ಸೆ ಪಡೆದಿರುವುದು ಅಪಾಯದ ಅಂಶವಾಗಬಹುದು.
ಈ ಅಂಶಗಳಲ್ಲಿ ಯಾವುದಾದರೂ ಇದ್ದರೆ ಕ್ಯಾನ್ಸರ್ ಬರುತ್ತದೆ ಎಂದಲ್ಲ. ವೈಯಕ್ತಿಕ ಅಪಾಯದ ಮಟ್ಟವನ್ನು ವೈದ್ಯರ ಸಲಹೆಯೊಂದಿಗೆ ಅರ್ಥಮಾಡಿಕೊಳ್ಳಬೇಕು.
ರೋಗ ಪತ್ತೆ ಹೇಗೆ ?
ಎದೆಯಲ್ಲಿ ಗಡ್ಡೆ ಅಥವಾ ಅಸಹಜ ಬದಲಾವಣೆ ಕಂಡುಬಂದಾಗ ವೈದ್ಯರು ಮೊದಲು ದೈಹಿಕ ಪರೀಕ್ಷೆ ನಡೆಸುತ್ತಾರೆ. ಅಗತ್ಯವಿದ್ದರೆ ಮ್ಯಾಮೊಗ್ರಫಿ, ಅಲ್ಟ್ರಾಸೌಂಡ್‌ನಂತಹ ಚಿತ್ರಣ ಪರೀಕ್ಷೆಗಳನ್ನು ಮಾಡಿಸಬಹುದು. ಗಡ್ಡೆ ಕ್ಯಾನ್ಸರ್ ಆಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಬಯಾಪ್ಸಿ ಪರೀಕ್ಷೆ ಅಗತ್ಯವಾಗಬಹುದು.
ಪುರುಷರಿಗೆ ಸಾಮಾನ್ಯವಾಗಿ ಎಲ್ಲರಿಗೂ ನಿಯಮಿತವಾಗಿ ಮ್ಯಾಮೊಗ್ರಫಿ ಮಾಡಿಸುವ ಶಿಫಾರಸು ಇರುವುದಿಲ್ಲ. ಆದರೆ ಕುಟುಂಬದ ಇತಿಹಾಸ ಅಥವಾ ಇತರ ಅಪಾಯದ ಅಂಶಗಳಿರುವವರು ವೈದ್ಯರೊಂದಿಗೆ ಸಮಾಲೋಚಿಸಿ ಸೂಕ್ತ ತಪಾಸಣೆಯ ಬಗ್ಗೆ ನಿರ್ಧರಿಸಬೇಕು.
ಸ್ತನ ಕ್ಯಾನ್ಸರ್ ಗೆ ಚಿಕಿತ್ಸೆ ಇದೆಯೇ?
ಹೌದು. ರೋಗದ ಹಂತ, ಕ್ಯಾನ್ಸರ್‌ನ ಸ್ವರೂಪ ಮತ್ತು ರೋಗಿಯ ಆರೋಗ್ಯ ಸ್ಥಿತಿಯನ್ನು ಆಧರಿಸಿ ಚಿಕಿತ್ಸೆ ನೀಡಲಾಗುತ್ತದೆ. ಶಸ್ತ್ರಚಿಕಿತ್ಸೆ, ಕೀಮೋಥೆರಪಿ, ವಿಕಿರಣ ಚಿಕಿತ್ಸೆ ಹಾಗೂ ಹಾರ್ಮೋನ್ ಚಿಕಿತ್ಸೆ ಸೇರಿದಂತೆ ವಿವಿಧ ಚಿಕಿತ್ಸಾ ವಿಧಾನಗಳನ್ನು ಬಳಸಬಹುದು.
ಪುರುಷರಲ್ಲಿ ಕಂಡುಬರುವ ಅನೇಕ ಸ್ತನ ಕ್ಯಾನ್ಸರ್‌ಗಳು ಹಾರ್ಮೋನ್ ರಿಸೆಪ್ಟರ್ ಪಾಸಿಟಿವ್ ಆಗಿರುತ್ತವೆ. ಇಂತಹ ಸಂದರ್ಭಗಳಲ್ಲಿ ಸೂಕ್ತ ರೋಗಿಗಳಿಗೆ ಹಾರ್ಮೋನ್ ಚಿಕಿತ್ಸೆಯೂ ಪ್ರಯೋಜನಕಾರಿಯಾಗಬಹುದು. ಆರಂಭದಲ್ಲೇ ರೋಗ ಪತ್ತೆಯಾದರೆ ಚಿಕಿತ್ಸೆಯ ಫಲಿತಾಂಶ ಉತ್ತಮವಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
ವೈದ್ಯರನ್ನು ಸಂಪರ್ಕಿಸಲು ಮುಜುಗರ, ಹಿಂದೇಟು ಬೇಡ
ಪುರುಷರಲ್ಲಿ ಸ್ತನ ಕ್ಯಾನ್ಸರ್ ಅಪರೂಪವಾಗಿರುವುದರಿಂದ ಕೆಲವರು ಎದೆಯಲ್ಲಿ ಕಾಣಿಸಿಕೊಳ್ಳುವ ಗಡ್ಡೆಯನ್ನು ಹಾರ್ಮೋನ್ ಬದಲಾವಣೆ ಅಥವಾ ಸಾಮಾನ್ಯ ಊತ ಎಂದು ಭಾವಿಸಿ ನಿರ್ಲಕ್ಷಿಸಬಹುದು. ಇನ್ನೂ ಕೆಲವರು ಇದು ಮಹಿಳೆಯರಿಗೆ ಮಾತ್ರ ಬರುವ ಕಾಯಿಲೆ ಎಂಬ ತಪ್ಪು ಕಲ್ಪನೆಯಿಂದ ವೈದ್ಯರ ಬಳಿ ಹೋಗಲು ಹಿಂಜರಿಯುತ್ತಾರೆ.
ಆದರೆ ಹೊಸದಾಗಿ ಗಡ್ಡೆ ಕಾಣಿಸಿಕೊಂಡರೆ, ಮೊಲೆತೊಟ್ಟಿನಿಂದ ರಕ್ತಮಿಶ್ರಿತ ಸ್ರಾವ ಬಂದರೆ ಅಥವಾ ಚರ್ಮದಲ್ಲಿ ಅಸಹಜ ಬದಲಾವಣೆ ಕಂಡುಬಂದರೆ ತಡಮಾಡದೆ ವೈದ್ಯಕೀಯ ಸಲಹೆ ಪಡೆಯಬೇಕು. ಪ್ರತಿಯೊಂದು ಗಡ್ಡೆಯೂ ಕ್ಯಾನ್ಸರ್ ಆಗಿರುವುದಿಲ್ಲ; ಆದರೂ ಪರೀಕ್ಷೆ ಮಾಡಿಸಿಕೊಳ್ಳುವುದು ಅತ್ಯಂತ ಮುಖ್ಯ.
ಒಟ್ಟಾರೆ ಹೇಳುವುದಾರೆ ಸ್ತನ ಕ್ಯಾನ್ಸರ್ ಮಹಿಳೆಯರಿಗೆ ಮಾತ್ರ ಸೀಮಿತವಾದ ಕಾಯಿಲೆಯಲ್ಲ. ಪುರುಷರಲ್ಲಿಯೂ ಕಾಣಿಸಿಕೊಳ್ಳಬಹುದಾದ ಈ ಕಾಯಿಲೆಯ ಬಗ್ಗೆ ಜಾಗೃತಿ ಮೂಡಿಸುವುದು, ಲಕ್ಷಣಗಳನ್ನು ನಿರ್ಲಕ್ಷಿಸದಿರುವುದು ಮತ್ತು ಸೂಕ್ತ ಸಮಯದಲ್ಲಿ ವೈದ್ಯಕೀಯ ನೆರವು ಪಡೆಯುವುದು ಜೀವ ರಕ್ಷಣೆಗೆ ಮಹತ್ವದ್ದಾಗಿದೆ.
(ಸೂಚನೆ: ಈ ವರದಿ ಆರೋಗ್ಯ ಜಾಗೃತಿಗಾಗಿ ಮಾತ್ರ. ವೈಯಕ್ತಿಕ ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಅರ್ಹ ವೈದ್ಯರನ್ನು ಸಂಪರ್ಕಿಸಿ.)
