ಭಾರತೀಯ ಸಾಂಪ್ರದಾಯಿಕ ಆಹಾರ ಪದ್ಧತಿಯಲ್ಲಿ ರಾಜಸ್ಥಾನಿ ಅಡುಗೆಗಳಿಗೆ ವಿಶೇಷ ಸ್ಥಾನವಿದೆ. ಅಲ್ಲಿನ ಶ್ರೀಮಂತ ಮತ್ತು ಮಸಾಲೆಯುಕ್ತ ಖಾದ್ಯಗಳಲ್ಲಿ ‘ಕಢಿ ಕಚೋರಿ’ ಅತ್ಯಂತ ಜನಪ್ರಿಯವಾದ ಕಾಂಬಿನೇಷನ್ ಆಗಿದೆ. ಹುಳಿಯಾದ ಮೊಸರು ಮತ್ತು ಕಡಲೆಹಿಟ್ಟಿನಿಂದ ತಯಾರಾಗುವ ಕಢಿ ಹಾಗೂ ಖಾರವಾದ ಬೇಳೆ ತುಂಬಿದ ಗರಿಗರಿಯಾದ ಕಚೋರಿಯ ಈ ಜೋಡಿ ಕೇವಲ ರಾಜಸ್ಥಾನ ಮಾತ್ರವಲ್ಲದೆ ದೇಶಾದ್ಯಂತ ಆಹಾರ ಪ್ರೇಮಿಗಳ ನೆಚ್ಚಿನ ಆಹಾರವಾಗಿದೆ.
ಮನೆಯಲ್ಲೇ ಅತ್ಯಂತ ಸುಲಭವಾಗಿ ಮತ್ತು ಹೋಟೆಲ್ ಶೈಲಿಯಲ್ಲಿ ರಾಜಸ್ಥಾನಿ ಕಢಿ ಕಚೋರಿ ಮಾಡುವ ಸರಳ ವಿಧಾನ ಇಲ್ಲಿದೆ.
ಕಢಿ ತಯಾರಿಸಲು ಬೇಕಾಗುವ ಪದಾರ್ಥಗಳು
- ಮೊಸರು – 1 ಕಪ್
- ಕಡಲೆಹಿಟ್ಟು (ಬೇಸನ್) – 2 ಚಮಚ
- ಶುಂಠಿ ಪೇಸ್ಟ್ – 1 ಚಮಚ
- ಹಸಿಮೆಣಸಿನಕಾಯಿ ಪೇಸ್ಟ್ – 1 ಚಮಚ
- ಜೀರಿಗೆ ಮತ್ತು ಸಾಸಿವೆ – ತಲಾ 1/2 ಚಮಚ
- ಅರಿಶಿನ ಪುಡಿ – 1/2 ಚಮಚ
- ಎಣ್ಣೆ – 1 ಚಮಚ
- ನೀರು ಮತ್ತು ಉಪ್ಪು – ರುಚಿಗೆ ತಕ್ಕಷ್ಟು
ಕಚೋರಿ ತಯಾರಿಸಲು ಬೇಕಾಗುವ ಪದಾರ್ಥಗಳು
- ಮೈದಾ ಹಿಟ್ಟು – 1 ಕಪ್
- ತುಪ್ಪ – 2 ಚಮಚ
- ಉದ್ದಿನಬೇಳೆ – 1/2 ಕಪ್
- ಜೀರಿಗೆ ಮತ್ತು ಸೋಂಪು (ಫೆನ್ನೆಲ್ ಸೀಡ್ಸ್) – ತಲಾ 1/2 ಚಮಚ
- ಅಚ್ಚಖಾರದ ಪುಡಿ – 1 ಚಮಚ
- ಕರಿಯಲು ಎಣ್ಣೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು
ಮಾಡುವ ವಿಧಾನ:
ಹಂತ 1: ಹಿಟ್ಟು ಸಿದ್ಧಪಡಿಸುವುದು ಒಂದು ಪಾತ್ರೆಯಲ್ಲಿ ಮೈದಾ ಹಿಟ್ಟು, ತುಪ್ಪ ಮತ್ತು ಉಪ್ಪನ್ನು ಚೆನ್ನಾಗಿ ಮಿಶ್ರಣ ಮಾಡಿ. ನಂತರ ಸ್ವಲ್ಪ ಸ್ವಲ್ಪವೇ ನೀರು ಸೇರಿಸುತ್ತಾ ಮೃದುವಾಗಿ ಹಿಟ್ಟನ್ನು ನಾದಿಕೊಳ್ಳಿ. ಈ ಹಿಟ್ಟನ್ನು ಕನಿಷ್ಠ 30 ನಿಮಿಷಗಳ ಕಾಲ ಒದ್ದೆ ಬಟ್ಟೆ ಮುಚ್ಚಿ ನೆನೆಯಲು ಬಿಡಿ.
ಹಂತ 2: ಹೂರಣ ತಯಾರಿಕೆ ಉದ್ದಿನಬೇಳೆಯನ್ನು ಸಣ್ಣ ಉರಿಯಲ್ಲಿ ಹದವಾಗಿ ಹುರಿದುಕೊಂಡು, ತಣ್ಣಗಾದ ನಂತರ ಮಿಕ್ಸಿಯಲ್ಲಿ ತರಿತರಿಯಾಗಿ ಪುಡಿ ಮಾಡಿಕೊಳ್ಳಿ. ಈ ಪುಡಿಗೆ ಜೀರಿಗೆ, ಸೋಂಪು, ಅಚ್ಚಖಾರದ ಪುಡಿ ಮತ್ತು ಉಪ್ಪು ಸೇರಿಸಿ ಮಿಶ್ರಣ ಮಾಡಿ ಕಚೋರಿಯ ಒಳಗಿನ ಹೂರಣವನ್ನು ಸಿದ್ಧಪಡಿಸಿಕೊಳ್ಳಿ.
ಹಂತ 3: ಕಚೋರಿ ಆಕಾರ ನೀಡುವುದು ನೆನೆಸಿಟ್ಟ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿಕೊಳ್ಳಿ. ಪ್ರತಿಯೊಂದು ಉಂಡೆಯನ್ನು ಲಟ್ಟಿಸಿ ಅಥವಾ ಕೈಯಿಂದಲೇ ಸ್ವಲ್ಪ ಅಗಲ ಮಾಡಿ, ಅದರ ಮಧ್ಯದಲ್ಲಿ ಸಿದ್ಧಪಡಿಸಿದ ಉದ್ದಿನಬೇಳೆಯ ಹೂರಣವನ್ನು ಇಟ್ಟು, ಎಲ್ಲೂ ಗ್ಯಾಪ್ ಇಲ್ಲದಂತೆ ಸಂಪೂರ್ಣವಾಗಿ ಮುಚ್ಚಿ ಮತ್ತೆ ದುಂಡಗಿನ ಆಕಾರ ನೀಡಿ.
ಹಂತ 4: ಕಚೋರಿ ಕರಿಯುವುದು ಬಾಣಲೆಯಲ್ಲಿ ಎಣ್ಣೆಯನ್ನು ಮಧ್ಯಮ ಉರಿಯಲ್ಲಿ ಕಾಯಿಸಿ. ಸಿದ್ಧಪಡಿಸಿದ ಕಚೋರಿಗಳನ್ನು ಎಣ್ಣೆಗೆ ಹಾಕಿ, ಅವು ಹೊಂಬಣ್ಣಕ್ಕೆ ತಿರುಗಿ ಗರಿಗರಿಯಾಗುವವರೆಗೆ ಎರಡು ಕಡೆ ಚೆನ್ನಾಗಿ ಬೇಯಿಸಿ ಎಣ್ಣೆಯಿಂದ ಹೊರಗೆ ತೆಗೆಯಿರಿ.
ಹಂತ 5: ಕಢಿ ಸಿದ್ಧಪಡಿಸುವುದು ಒಂದು ಪಾತ್ರೆಯಲ್ಲಿ ಮೊಸರು ಮತ್ತು ಕಡಲೆಹಿಟ್ಟನ್ನು ಗಂಟಿಲ್ಲದಂತೆ ಚೆನ್ನಾಗಿ ಫೆಂಟಿಕೊಳ್ಳಿ. ನಂತರ ಮತ್ತೊಂದು ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಸಾಸಿವೆ, ಜೀರಿಗೆ ಒಗ್ಗರಣೆ ಕೊಡಿ. ಇದಕ್ಕೆ ಶುಂಠಿ-ಮೆಣಸಿನಕಾಯಿ ಪೇಸ್ಟ್, ಅರಿಶಿನ ಹಾಗೂ ಮೊಸರಿನ ಮಿಶ್ರಣವನ್ನು ಸುರಿದು, ನೀರು ಮತ್ತು ಉಪ್ಪು ಸೇರಿಸಿ ಸಣ್ಣ ಉರಿಯಲ್ಲಿ ಅದು ದಪ್ಪಗಾಗುವವರೆಗೆ ಚೆನ್ನಾಗಿ ಕುದಿಸಿ.
ಈಗ ಬಿಸಿಬಿಸಿಯಾದ ಗರಿಗರಿ ಕಚೋರಿಯನ್ನು ಪ್ಲೇಟ್ನಲ್ಲಿ ಸ್ವಲ್ಪ ಒಡೆದು, ಅದರ ಮೇಲೆ ಬಿಸಿಬಿಸಿ ಕಢಿ ಹಾಗೂ ಕೊತ್ತಂಬರಿ ಸೊಪ್ಪನ್ನು ಉದುರಿಸಿ ಸರ್ವ್ ಮಾಡಿ.
